Read Ebaibuli 1961 Ikisila 15 Bible Online

Ikisila 15 - Ebaibuli 1961 bible

Ikisila 15

¹ “Kosaŋe loka ŋulukar ikanykaarei ejaun aosikin.

²Lo ŋes epone loka aosikin: eosikini ŋinikeburan ibore yenikeyuunia ŋesi ekeidunyet; mam cut iburai ŋin kaneejai eidunyeteke ka onaceke; naarai alimor aosikin naka EJAKAIT.

³ Ipedori aibura yenikacekwap: konye ŋiniborekon yenejai neejai onacekon, iwosikini.

⁴ Konye emameun lokican kamakus; (naarai kisirereŋi cut EJAKAIT kakwap nakiinakinit jo EJAKAIT Ekonideke airum;)

⁵Arai kipup ijo kojokan eporoto loka EJAKAIT Ekonideke, aidar aitodol aicorakinet na kere nakecorakini jo lolo.

⁶ Naarai kisirereŋi jo EJAKAIT Ekonideke, kwape abu kisumunio jo: iyuununei atekerin nuipu, konye ijo mam iyuun kamakec; iyai atekerin nuipu, konye mam kes kiyaete jo.

⁷ “Arai ejai yenikican kajo, ediopet koinacanakon, koreriakon kere kakwapukon nakiinakinit jo EJAKAIT Ekonideke, sirikitininik ekonitau, karaida abunakin akonikan kaneejai onacekon lokican:

⁸ Konye abeit ijaikini ŋes yenejai akanikon, abeit iinakini ŋes luitodolete eipudake koboro luilipit ŋesi.

⁹ Kocoite sirikejaun aomisioit naerono otaukon, ebe, ‘Aapu ekaru lokikanyetekaarei, ekaru loka aosikin’; kosodi aite onacekon loicana kakoŋu naerono, komam iinakini idiobore; kosodi ŋesi amonyia jo kaneejai EJAKAIT, koraun adiakaret kamakon.

¹⁰ Abeit koinanakinene ŋes, sirekadanakini ekonitau naiinakinia ŋes: naarai kanuka ŋun kisirereŋi jo EJAKAIT Ekonideke kaswamisiokon kere nuiswamaenenei.

¹¹ Naarai mam lukican edaunos kakwap: kanuka ŋun kecorakini jo ebe, Abeit ijaikini yenejai akanikon, onacekon, ka yenikon yenilwaritoi, ka yenikicanikon, kakwapukon.

¹² “Arai kiitwegel ijo onacekon, Eburaniat arai Aburaniat, kosodi aijaanakin jo ikar ikanykape; iwosikini ŋes anyoun kamakon kokaru lokikanyetekaarei.

¹³Naiwosikinia ŋes anyoun kamakon, sirikiwosik ŋes alosit komam ibore;

¹⁴ Ikorakini ŋes luipu luka esipanikon, ka luka epejalikon, ka luka acuesikon naka ebino: iinakini ŋes kwape kisirereŋitor EJAKAIT Ekonideke jo.

¹⁵Kiitununei ebe irai kolo ebulesit kakwap nako Misiri, kosodi EJAKAIT Ekonideke alakun jo: kanuka ŋun kecorakini jo akirot ŋin lolo.

¹⁶ Kosodi arai kiitema ŋesi jo atiar, ‘Mam anyouni kaneijai ijo’; naarai emina ŋesi ijo ka ekonikal, naarai ejai ejok kajo;

¹⁷Ŋes konyet iyaŋaaria emutu apedokinio akekit okirigi, eraun do ekonibulesit ikar kere. Iswamakini da akonibulesit kwaŋin.

¹⁸ Mam kitionikini ijo naiwosikinia ŋes anyoun kamakon; naarai abu kijaanak jo ikar ikanykape itia neeti kiropia ekewoteon irwan aarei: kisirereŋi jo EJAKAIT Ekonideke kanuiswamai kere.

¹⁹ “Italauni ikiyaik kere lukiliok lueuriete isipaninikon luka aituk ka amerekekin mama ejai EJAKAIT Ekonideke; siritwasamaenenei ikiyaikikon lumoŋin adioswam, karaida aitub ajul nuka ikiyaik luka esipanikon loka amerekekin.

²⁰ Inyamanakini ŋes akonyen nuka EJAKAIT Ekonideke ŋolikaru kaibois naeseuni EJAKAIT, ijo ka ekonikal.

²¹ Arai eŋwalit ŋesi adioŋwal kere, arai icoda, arai emudukana, aŋwal kere naerono, sirikiinak araun asubanit mama ejai EJAKAIT Ekonideke.

²² Inyamakini ŋes orekon: enyamete lumam elaete ka luelaete da, kwape amori ka amiam.

²³ Konye sirinyamenenei aokotoke; ibukonori kwap bala akipi.