Read Ebaibuli 1961 Ikisila 17 Bible Online

Ikisila 17 - Ebaibuli 1961 bible

Ikisila 17

¹“Sirikiinak EJAKAIT Ekonideke asubanit naka emoŋ arai amerekek naejai aŋwal, arai yenerono: naarai erai ŋin naketal mama ejai EJAKAIT Ekonideke.

²“Arai kedumakin mamakon, oreriakon lukiinakinit jo EJAKAIT Ekonideke, etuŋanan arai aberu, yeniswamai nueroko kakonyen nuka EJAKAIT Ekonideke, adiakar aitutuketeke.

³ Kosodi alosit aijaanakin icedekesio, aima kes, arai akoloŋ, arai elap, arai idiopet yenika ajore naka akuj, yenimam kecorakinit;

⁴Kosodete alimokin jo, kopup ijo nuke, kosodi ijo aiŋitun kojokan, ido koany, arai erai abeit, kitogogoŋitete akirot, ebe eswamaun naketal ŋin koIsirael;

⁵ Ŋes do iyaŋaunia etuŋanan ŋol arai aberu ŋin, yeniswamat aronis ŋin, kiton orutekon, etuŋanan arai aberu; ibiribirete kes kamor, kotwaka.

⁶ Kakirot naka ikajenak iarei arai iuni, ŋes earere ŋin yeneario; mam eario kakirot naka ekajenan ediopet.

⁷ Ikajenak kes kigeikinete aiar ŋes, kosodete konyet ituŋa kere. Ilemari do kwaŋin aronis kamakon.

⁸ “Arai ketakanu akirot nakitionikinit ijo aitub, kidiŋ aokot ka aokot, kidiŋ akirot ka akirot, kidiŋ aromait ka aromait, koraas akiro nuka epeget koruteikon: ŋes konyet inyounio alosit aibois naeseuni EJAKAIT Ekonideke;

⁹ Idolokini isasedotin Ilebin, ka ekatubon loejaun kapaarasia kaŋun: iŋituni; kilimokinete jo akirot naka etube:

¹⁰Iswamai ijo cut kwape ejaar akirot nakilimokinete kesi jo, kaibois kaŋin naeseuni EJAKAIT; irici ijo aiswamaenen kwape ejaatar kere nukisisianakinete kesi jo:

¹¹Iswamaenenei cut kwape ejaar ekisil lokisisianakinete kesi jo, kwape ejaar etube lokilimokinete: sirikipaa teten arai kediany, ainyein akirot nakilimokinete kesi jo.

¹² Etuŋanan loeninik, komam epupuni esasedoti loebwoi aijaanakin kanen kakonyen nuka EJAKAIT Ekonideke, arai ekatubon, eario etuŋanan ŋol: ilemari aronis koIsirael.

¹³Epupunete ituŋa kere, eyoŋete, komam bobo eninikaros.

¹⁴ “Kidol akwap nakiinakinit jo EJAKAIT Ekonideke, kirum, kiboikin da toma; kosodi atemar atiar, ‘Adakakini ekabaka ayait eoŋ, kwape katekerin kere nukalukunito’;

¹⁵ Idakakini ŋol loeseuni EJAKAIT Ekonideke araun ekabakakus: ediopet koinacanakon ŋes idakakini araun ekabakakus: sirikidakak lokacekwap lomam erai onacekon ayait jo.

¹⁶ Konye siri ŋes kitupuu ikebalasin, karaida aitoboŋor ituŋa Misiri, tetere itupui ibalasin: naarai abu EJAKAIT kotema yes ebe, ‘Amear lolo mam bobo iboŋorete ŋina.’

¹⁷ Siri ŋes kitupuu da akeŋor, kinyek eketau apaar; karaida aitupuu noi ekepuesa ka ekesabu.

¹⁸ “Kosodi naiboikinor ŋesi oicoloŋ loka ajakanutuke, etakakini oitabo ekisil ŋol loejai akonyen nuka isasedotin Ilebin:

¹⁹ Ejaenena kaŋes, esiomenenei ŋesi apaarasia kere nuka aijarake: tetere isisiauni ayoŋit EJAKAIT Ekedeke, aidar akiro kere nuka ekisil kaŋol ka ikisila ŋul, aiswamaenen:

²⁰ Kinyek eketau aomiara adepar iinacanake, tetere mam epaari teten arai kediany ainyein aicorakinet: tetere iyatakinos akepaarasia kajakanutuke, ŋes ka ikedwe, koIsirael.