Read Ebaibuli 1961 Ikisila 21 Bible Online

Ikisila 21 - Ebaibuli 1961 bible

Ikisila 21

¹ “Arai kedumun idiopet earitai eperi kais kakwap nakiinakinit jo EJAKAIT Ekonideke airum, komam ejenio yenikeseni ŋes:

²Epote do imakiokon ka ikatubokokon, kosodete aitem kiton oreria luelukunito ŋin yenearitai:

³Kosodi ere loeapie kituŋanan yenearitai, elemunete imakio luka ere kaŋol ataok nakosipan, namam itwasamatai, namam iriit ajokot;

⁴Eyaŋaarete imakio luka ere kaŋol ataok aditot naeleleete akip, namam ekoritai, karaida ayeit, ebilete emurisiŋ loka ataok kaditot:

⁵ Ikunyunete isasedotin odwe luka Lebi; naarai aseu EJAKAIT Ekonideke kes aijaanakin ŋes, ka aisirereŋ kokiror loka EJAKAIT; ido kwape ejaar akecekirot ŋes ejaunor ŋolipeget ka ŋiniromait:

⁶ Ilotakinete imakio kere luka ere kaŋol loeapie kituŋanan yenearitai, akecekanin, neejai ataok naabilio emurisiŋike kaditot:

⁷ Eboŋokinete ebe, ‘Mere akosikanin abukorete aokot nu, karaida akosikonyen mam eanyunito.

⁸ Wu EJAKAIT, kisioni ikonituŋa Isirael, luilaku, sirikicamak aokot numam akirot asalakin mama ejaas ikonituŋa Isirael.’ Isionio kes nuka aokot.

⁹ Ilemari kwaŋin aokot numam akirot kamakon, naiswamaa ijo nuedolito kakonyen nuka EJAKAIT.

¹⁰ “Nailomaria aitiji lukasurupokon, ido kijaik EJAKAIT kes akaninikon, kijoreu da ijo kes.

¹¹Kosodi aanyun kaneejaas lukijoreuno aberu naitemelel, kimielakin ŋes, kokoto aimany ŋes;

¹²Ŋes do iyaŋaaria ŋes togokon; ebareni ŋesi akekou, ekepi da akebelekeka;

¹³ Elacari anapito naka aŋatunioke, esalakini togokon, emonyi papake ka totoke elap ediopet: akaulo kaŋun ilomari mamake araun okilenike, eraun ŋesi da akoniberu.

¹⁴ Kosodi, arai mam jo itojokit ŋes, ijalakini do ŋes alosit neekot; konye sirikigwela ŋes cut apesan, sirikikonak ŋes bala abulesit, naarai ibu kitisil ŋes.

¹⁵ “Arai ejaas etuŋanan aŋor aarei, komina adiopet, kolaite da adiopet, kourikinito da ŋes idwe, kesi aarei, naminat, ka naelaitai; ido arai erai ekiyai losapat loka ŋin naelaitai;

¹⁶ Kosodi kapaaran naisurumia ŋesi odweke iboro luejaatar ŋesi, mam ŋes ituluori okoku loka naminat ekiyai ageikin okoku loka naelaitai, loerai ekiyai obe:

¹⁷ Konye ecamuni ŋesi ekiyai, okoku loka naelaitai, ekorakini ŋes iboro luejaatar irwan aarei: naarai ŋol ŋes ageunet naka akegogoŋ; ewai loka ekiyai erai ekeŋ.

¹⁸ “Arai ejai etuŋanan okokuke loeninik loipaliono da, lomam erimari eporoto loka papake, karaida eporoto loka totoke, lomam iirari kes karaida kelecosi ŋes:

¹⁹Ikamunete do ŋes papake ka totoke, eyaŋaunete mama ejaas imakio luka ereke, kiton orute loka aiboisike;

²⁰Etemarete kesi imakio luka ereke ebe, ‘Eninik okokukosi lo, ipaliono da, eŋerit arimar eporotokosi; erai otaupe, emerana da.’

²¹ Ibiribirete ŋes ituŋa kere luka ereke kamor, kotwana: ilemari kwaŋin aronis kamakon; epupuni Isirael kere, kosodi aiyoŋ.

²² “Arai ediakarit ituŋanan adiakaret naibusakinitor atwanare, koarai, kosodi aikajakin ŋes okitoi;

²³ Sirikesalaki akekuan okitoi akuare kere, konye idaete ŋes apaaran ŋipeŋin; naarai ikenit Edeke ŋin yenikajakinitai; kinyek amunaun akonikwap nakiinakinit jo EJAKAIT Ekonideke airum.