Read Ebaibuli 1961 Ikisila 32 Bible Online

Ikisila 32 - Ebaibuli 1961 bible

Ikisila 32

¹ “Kitoik akit, ijo akuj, kener; Akwap da kopup akiro nuka aitukuka:

² Edouni aisisianakinika kwape kakiru, Ijililiun einerika kwape kakopyo; Kwape kakiru naedit naetepakini amelo, Kwape kelimilim loilimilimi okui.

³Naarai alimori eoŋ ekiror loka EJAKAIT: Kitopoloosi yesi Ewokodeke!

⁴ “Atiiba, edolit aswamuke; Naarai eraas irotinike kere etube. Edeke lomunot loemameete numam adolit, Erai ŋesi lokabeit ido loedolit.

⁵Amunaunos kamake, mam eraas idweke, Aŋwalata; Erai atur naepaarit namagul da.

⁶ Ikwaikinete kereka yesi EJAKAIT kwaŋin, Yes ituŋa lubaŋiok ka lumam acoa? Mere ŋesi papakon lokidumunit jo? Kisub jo kiticat da.

⁷Kiitu apaarasia nukolo ŋo kasonya, Koomoom nuka ikar luka aturio nuipu: Kiŋit papakon, kitodikini ŋesi jo; Imakiokon da, kilimokinete jo.

⁸ Naeinakinia Loejai kuju kakuj atekerin airumetekec, Naatiakia idwe luka ituŋa, Abu kibwaik iikorun luka ituŋa Kwape ejaar etiai loka idwe luka Isirael.

⁹ Naarai akorakinet naka EJAKAIT ŋes iketuŋa; Yakob ŋes eroet loka airumeteke.

¹⁰ “Abu kodumak ŋes akwap nakamodiŋ, Amodiŋ naelapat naegatatar itiaŋ; Abu kirimo ŋes, koric ŋes, Kidar ŋes bala ecopot loka akoŋuke:

¹¹Bala emorukaalet loitetemonokini lukokaike, Loeporitoi kaneejaas idweke, Abu korio akebebenoka, koyaŋa kes, Kodaka kes kabebenokake:

¹²EJAKAIT bon ŋes eŋarenikinit ŋes, Amamei edeke lomoit kaŋes.

¹³ Kitodoka ŋes kaiboisio nuiceleleete nuka akwap, Konyam da amio naka emanikor; Koinak ŋes aijuju esik loalomuni katiiba, Ka akinyet naalomuni kamoru naegogoŋ;

¹⁴ Akinyet naka aituk, ka akile nuka amerekekin, Ka asiepai nuka imerekekin ludidik, Ka imerekekin luka Basan, ka ikorwa, Ka akima nuturaŋ; Ibu komat ebino loka aokot nuka emusabibu.

¹⁵ “Konye kotum Yesurun, kopetonor: Ibu kotum, koburior, kinutakin: Kosodi konyet aijal Edeke lokesubi ŋes, Komen Atiiba naka aitajarioke.

¹⁶Apotu kisurumata ŋes ekokote kanuka idekesio lumo, Kitunyunyurikisi da ŋes kitalesia.

¹⁷ Apotu koinakis ajokin asuban, numam eraas Edeke, Koinakis asuban idekesio lumam lem ejenete, Lukitetiak luapote kokau, Lumam lem lukapapaakus eyoŋito.

¹⁸Mam iwomit nuka Atiiba nakiwuruuni jo, Kimurwok jo Edeke lokiwuruuni jo.

¹⁹“Koany EJAKAIT, kola kes, Kanuka aitunyunyurikin naka ikedwe lusap ka lupesur.

²⁰ Kotema atiar, ‘Ebwai ekareet kamakec, Aanyuni ejautene loka esaŋekec: Naarai eraas atur naepaarit, Idwe lumam eraas lumunon.

²¹ Kesurumata ekokote kanuka yenimam erai Edeke; Ketunyunyurikis kanuka aamameakakec: Esurumi kes ekokote kanuka ŋul lumam eraas ateker; Etunyunyurikini kes kateker naebaŋaana.

²² Naarai enepu akim kotoma anyunyuraka, Enoki kiton aipany nakokwap cut, Enyami akwap ka amioke, Icwei da apeteta nuka iroŋan.

²³“ ‘Eculakini kes aronisio; Adaikini ikakojoi mamakec:

²⁴Idokoraros kanuka eteŋei, Enomorio kes keimilia kaloesarani, Ka amudiario naedwar ria: Ejukakini kes ikel luka itiaŋ, Aisorit naka lueliatos luka apua.

²⁵ Eari ekileŋ kokiŋa, Ejaun etasuro agolai; Emudiari ekatumunan ka abekot, Yenenaki ka ituŋanan yenebwaŋunito akorwo.

²⁶Abu katema atiar, “Tikesiarisiara kes neelwana, Tiketanan aiitununokec kotuŋa”:

²⁷ Kedim eoŋ aiyoŋ aitunyunyurikin naka lokasurup, Kinyeis lukasurupokec asabanakin, Kinyeis kesi atemar atiar, “Itopolooritai awokokan, Mere EJAKAIT eswamai nu kere.” ’

²⁸“Naarai eraas ateker naemamei ainerun, Emamei da aijen kotomakec.

²⁹ Arai keraas lukacoa, tikejenut ŋun, Tieomito nuka esaŋekec loebuni!

³⁰ Ikwaikini ai etuŋanan erukitor elukumit, Ka iarei da aiteker ilukumin itomon, Dimikito egwelarit Atiibakec kes, Dimi ijaikinit EJAKAIT kes?

³¹ Naarai atiibakec mam eputos ka Atiibawok, Eraas lukasurupowok da ikatubok luka ŋun.

³²Naarai emusabibukec erai emusabibu loka Sodom, loka imanikoria luka Gomora: Ikecemusabibun eraas imusabibun luka epiu, Edwarak aibuŋetakec:

³³Ekecebino ŋes aisorit naka imunwo lurwopopoete, Ka aisorit naededeŋ naka imusagan.

³⁴ Mam kereka ŋun eŋadakinitai mamakaŋ, Kipucuc kotoma aiŋadisiaka?

³⁵ Enyaŋit ŋes lokaŋ, ka etacit, Kapak naejurusiarotor akecekejen: Naarai aapu apaaran naka amudiariokec, Ido iwonyunete nuebunokinete kes.

³⁶ Naarai etubokini EJAKAIT iketuŋa, Iituni ikebulesin; Keanyu ebe alemar akecegogoŋ, Emamei da yenideuna yeneenitai arai yeneosikinitai.

³⁷ Etemari atiar, ‘Ai bo ejaas idekesiokec, Atiiba naamunosi kesi;

³⁸Luanyamete asiepai nuka asubanakec, Luamasete ebino loka ainakinetekec namatat? Konyoutu kesi, kiŋarakis yes, Koraunos kesi amecisikus.

³⁹ “Aso do koany ebe, ‘Eoŋ, Eoŋ obe, arai ŋopeŋol, Emamei edeke keoŋ: Aari, ido etajari; Emusuŋi, ido etaŋaleuni: Emamei idio da yenepedori ademari kakanika.

⁴⁰ Naarai ekiari akakan akuj, Ebe, Kwape ajaria ikar kere.

⁴¹Arai kepen ekileŋika loemwekimweki, Kosodi akakan aikod etube; Enyaŋi mama ejaas lukasurupoka, Ataci ŋul lukalaito eoŋ.

⁴² Etemerikini ikojoika aokot, Enyami ekakileŋ akiriŋ; Kaokot nuka luearitai ka iŋatan, Ageun kakwes nuka itima lueojak luka lukasurupo.’

⁴³ “Kolelata yesi atekerin, ka iketuŋa: Naarai inyaŋi aokot nuka ikekejaanakinak, Inyaŋi mama ejaas lukasurupoke, Itegeli kanuka akwapuke, kanuka iketuŋa da.”

⁴⁴Kobu Musa kiner akiro kere nuka ekosio kaŋol kaki nuka ituŋa, ŋes ka Kosea okoku loka Nun.

⁴⁵Kitanaŋ Musa einer akiro ŋun kere mama ejai Isirael kere:

⁴⁶Kotema kes atiar, “Kibwaikisi itauonokus akiro kere nuketejen yes lolo; nuicorakinete yesi ikusidwe, airic aiswamaenen akiro kere nuka ikisila kalu.

⁴⁷ Naarai mam eraas akamameak kamakus; naarai erai aijarakus, kanuka ŋun iyatakinete yesi akusipaarasia kakwap naidokarete airum okekwa loka Yorodan.”

⁴⁸ Kotema EJAKAIT Musa kapaaran kaŋin ebe,

⁴⁹“Kodoka ijo oroŋat lo Abarim, moru Nebo loejai akwap naka Moab, naitei Yeriko; koseseni akwap naka Kanaan, naainakinit idwe luka Isirael araun airumet:

⁵⁰Kotwanik moru loidokari ijo, koyanaar mama ejaas ikonituŋa; kwape atwanikinia onacekon Aaron moru Kor, koyaŋaarai mama ejaas iketuŋa:

⁵¹ Naarai ipotu kibuceasi kama ajai kokidiŋ kidwe luka Isirael kakipi nuka Meriba naka Kades, kamodiŋ naka Sin; naarai mam ipotu kitalaut eoŋ kokidiŋ kidwe luka Isirael.

⁵²Naarai ianyuni akwap kakonyenekon; konye mam ilomari akwap naainakinit idwe luka Isirael.”