Read Ebaibuli 1961 Ikisila 5 Bible Online

Ikisila 5 - Ebaibuli 1961 bible

Ikisila 5

¹Konyarau Musa Isirael kere, kotema kes atiar, “Ijo ba Isirael, kiira ikisila ka itubesia lualimokini akiikus lolo, tetere isisiaete kes, kosodete airic aiswamaenen.

² Abu EJAKAIT Ewokodeke kitutukik oni koKoreb.

³ Mam EJAKAIT abu kitutukik lukapapaawok aitutuket ŋin, konye oni, oni lukija ne kere lukijari lolo.

⁴ Abu EJAKAIT kiner kayes kiteos komoru kokidiŋ kakim.

⁵ (Abwoi eoŋ kokidiŋ EJAKAIT ka yes kapak kaŋin, aitodikin yes akirot naka EJAKAIT: naarai ikuriaka yesi akim, mam ipotu kodokasi moru,) ebe,

⁶ “ ‘Arai eoŋ EJAKAIT Ekonideke, loketolomuni jo kakwap nako Misiri, kotogo loka ebulesene.

⁷ “ ‘Sirijaenena kicedekesio nabarai EOŊ.

⁸ “ ‘Sirikisub adioput naegerer, karaida asima naka ibore kere yenejai kuju toma akuj, karaida yenejai kwap toma alup, karaida yenejai toma akipi nuejaas kwap kalup:

⁹ Sirikikukonokin kes, karaida aijaanakin kes: naarai eoŋ EJAKAIT Ekonideke arai Edeke lokekolo, edopet kodwe numam adolit nuka lukapapaakec, kiton atur nakiwuniet ka nakiwoŋonet naka ŋul kalukalaito eoŋ;

¹⁰ Ido etimi ilukumin luka ituŋa lukaminas eoŋ koricito akaicorakineta.

¹¹ “ ‘Sirilimit atai ekiror loka EJAKAIT Ekonideke; naarai mam EJAKAIT isikai aitetelekar akirot, ŋin yenelimit atai ekekiror.

¹² “ ‘Koricite apaaran nakasabato, aitalaun ŋes, kwape kicorakinia jo EJAKAIT Ekonideke.

¹³ Kitaaritoi apaarasia akanykape, kiswama akoniswamisio kere;

¹⁴ Konye do apaaran nakikanyetekaarei ŋes asabato naka EJAKAIT Ekonideke: apaaran ŋin sirikiswama adioswam kere, ijo, ka okokukon, ka akokukon, ka ekonikejaanakinan, ka akonikejaanakinan, ka ekonimoŋ, ka akonisigiria, ka ikonibaren kere, ka imoit yenejai orekon; tetere ekonikejaanakinan ka akonikejaanakinan iyeŋete kwape kajo.

¹⁵Kiitu ijo ebe irai kolo ijo ebulesit kakwap nako Misiri, kitolom EJAKAIT Ekonideke jo kakan nakagogoŋ, ka akan naerioro: kanuka ŋun kicorakinit EJAKAIT Ekonideke jo airic apaaran nakasabato.

¹⁶ “ ‘Koyoŋitenenei papakon ka totokon, kwape kicorakinia jo EJAKAIT Ekonideke: tetere akonipaarasia iyatakinos, tetere da ijaun ejok kakwap nakiinakini EJAKAIT Ekonideke.

¹⁷ “ ‘Siriarenenei.

¹⁸ “ ‘Karaida adotenen.

¹⁹ “ ‘Karaida akokoenen.

²⁰ “ ‘Karaida asabanakin ikoniidunyet.

²¹ “ ‘Karaida aiŋobelenen aberu naka eidunyetekon; karaida eimiel etogo loka eidunyetekon, alupoke, arai ekekejaanakinan, arai akekejaanakinan, ekemoŋ arai akesigiria, arai ibore kere yenerai yenika eidunyetekon.’

²² “Abu EJAKAIT kolimok ekodetekus kere akiro ŋun keporoto loepol komoru kokidiŋ kakim, kodou, ka amuton naajesi cucucuc: mam abu kiyatak ace da. Abu kiwadik kes amor aarei, kainak eoŋ;

²³Kosodi naipupunioto yesi eporoto kokidiŋ kamuton, konoki akim komoru, ipotu kikunyut neajai eoŋ, ikapolok kere luka atekerinikus, ka imakiokus;

²⁴Kotemasi yesi atiar, ‘Koany, kitodik EJAKAIT Ewokodeke oni akeibuses ka akepolou, kipupu da ekeporoto kokidiŋ kakim: kijenu lolo ebe ineras Edeke kituŋanan, ido ejari.

²⁵Kanukinyo do kitwakia isio? Naarai kinyamaari sio akim na naepol: kitwaki arai kiipupu bobo eporoto loka EJAKAIT Ewokodeke.

²⁶ Naarai iŋai yenejai akuan, yenikepupunit eporoto loka Edeke lokajaran inera kokidiŋ kakim, kwape kipupunio oni, kosodi aijar?

²⁷ Kikunyak ijo, kopup kere nuetemari EJAKAIT Ewokodeke: kosodi ijo alimokin sio kere nukilimonokini EJAKAIT Ewokodeke; kipupuni isio, kiswamai da.’

²⁸“Abu EJAKAIT kopup eporoto loka akirokus, nakilimokiniata eoŋ; katema EJAKAIT eoŋ atiar, ‘Apup eporoto loka akiro nuka ituŋa kalu, nukilimokis jo: alimut ejok ŋun kere nuenerata.

²⁹ Bala ti kojaenena etau loikoni nen kotomakec, kayoŋito eoŋ, koricito akaicorakineta tiritir, tetere ejaunos ejok ka ikecedwe ikar kere!

³⁰Kolot kolimok kes ebe, “Koboŋosi yesi owemanakus.”

³¹ Konye ijo, kobwo kane, kalimokini jo aicorakineta kere, ka ikisila, ka itubesia, luisisianakini ijo kes, tetere iswamaenenete kes kakwap naainakini kes airum.’

³² Kanuka ŋun iricete aswam kwape kicorakinia yes EJAKAIT Ekusideke: mam ipaarete akan nakoteten karaida nakokediany.

³³ Ilosenenete koroietin kere lukorak yes EJAKAIT Ekusideke, tetere ijarete, ijaunos ejok, iyatakinos da akusipaarasia kakwap nairumete.