Read Ebaibuli 1961 Ikisila 6 Bible Online

Ikisila 6 - Ebaibuli 1961 bible

Ikisila 6

¹“Aso na ŋes aicorakinet, ka ikisila, ka itubesia, lukicorakinit EJAKAIT Ekusideke aisisianakin yes, tetere iswamaenenete kakwap naidokarete airum:

² Tetere iyoŋit EJAKAIT Ekonideke, iricenenei ikekisila kere ka akeicorakineta, nukecorakini jo, ka ikonikoku ka epapaitikon, apaarasia kere nuka aijarakon; tetere ibusi apaarasia nuipu.

³Aso kiira, ijo Isirael, koricite aiswamaenen kwaŋin; ijaun ejok, ido kipuaros noi, kwape kolo kisumunio EJAKAIT, Edeke loka lukapapaakon, kakwap naeleleete akile ka esik.

⁴ “Kiira, ijo Isirael: EJAKAIT Ewokodeke erai EJAKAIT ediopet:

⁵ Kominenena EJAKAIT Ekonideke kekonitau kere, ka akoniijar kere, ka akonigogoŋ kere.

⁶ Akiro nu da, nukecorakini lolo, kojaananas otaukon:

⁷ Ido kodunyakinite aisisianakin kes ikonidwe, kinerenena da kes iboienenei kotogokon, ilosenenei korot, iperenenei, inyoununei da.

⁸ Koenanakini da akanikon araut aanyunet, kotorokinite da kidiŋ oreet.

⁹ Kiwadikaenenei da ategerio nukotogokon, koruteikon de.

¹⁰ “Kosodi nakitolomaria EJAKAIT Ekonideke akwap nakolo eyapoikini lukapapaakon, Aburaam, ka Isaak, ka Yakob, ainakin; ireria lupekos, ka luejok, lumam idukit.

¹¹Ka itogoi luileleba iboro lukajokak kere, lumam jo ilelebit, ka amototin nuebokok, numam jo ibokit, imanikoria luka emusabibu ka iseitunin, lumam irait, konyam kimonikin;

¹²Ŋes konyet icoitor sirikiimurwok EJAKAIT, lokitonyouni kakwap nako Misiri, kotogo loka ebulesene.

¹³ Koyoŋitenenei EJAKAIT Ekonideke; kijaanakinenei ŋes, ido kiyapoenenei kokirorike.

¹⁴ Siritupanarete icedekesio, kodekesio luka atekerin nukilukunitos yes;

¹⁵Naarai EJAKAIT Ekonideke loejai kidiŋikon erai Edeke lokekolo; kinyek anyunyura naka EJAKAIT Ekonideke adakakin jo, komudia kakwap.

¹⁶ “Sirikodununete EJAKAIT Ekusideke, kwape kikoduniata ŋes koMasa.

¹⁷ Kodunyakinito airic aicorakineta nuka EJAKAIT Ekusideke, ka aitejenunetake, ka ikekisila, lukicorakini jo.

¹⁸Kiswamaenenei da naedolit ka naejok kakonyen nuka EJAKAIT: tetere ijaun ejok, ilomari da airum akwap nakajokan nakiyapoikini EJAKAIT lukapapaakon.

¹⁹Aireŋear lukasurupokon kere kakonyenekon, kwape kinerar EJAKAIT.

²⁰“Kiiŋit okokukon kapaarasia kanuepote ebe, ‘Inyo bo apolou naka aitejenuneta, ka ikisila, ka itubesia lukicorakini EJAKAIT Ewokodeke?’

²¹Kosodi itemari okokukon atiar, ‘Kirai ibulesin luka Parao koMisiri; kitonyou EJAKAIT koMisiri kakan nakagogoŋ:

²²Ido kitodu EJAKAIT aanyuneta ka nukaumokin, nukos ka nuetioko, koMisiri, ka Parao da, ka eketogo kere, kakonyekosi:

²³Kitonyou kaŋina, tetere kitolomari ainakin akwap nakiyapoikini lukapapaawok.

²⁴ Ido kicorak EJAKAIT aiswamaenen ikisila ŋul kere, ayoŋenen EJAKAIT Ewokodeke, kanuka ajokisiwok apaarasia kere, tetere kidarenenei kijarete, kwape lolo.

²⁵ Eraun da adolit kamawok, arai kikokit aswam aicorakinet na kere kakonyen nuka EJAKAIT Ewokodeke, kwape kicorakinia.’