Read Ebaibuli 1961 Yokana 12 Bible Online

Yokana 12 - Ebaibuli 1961 bible

Yokana 12

¹ Kosodi esalito apaarasia akanykape eriŋa edoluno Aleleŋ, kobu Yesu Betaniya, nekejai Lasaro, lokitajaruni Yesu kotoma okatwak.

² Kitemokinoi epucit kanen; kijaanak Marita, konye kerai Lasaro ediopet kalukemorete kaŋes.

³ Kosodi kolem Mariam elatiri loka akinyet naelai naka etiai loepol, kinyonyoanak akeje nuka Yesu, konina akekeje kitimake; kilelebun aures naka akinyet etogo kere,

⁴Konye kobala Yuda Isikariot, ediopet kokesisiakake, loekoto abilakin ŋes ebotet, ebe,

⁵“Kanukinyo mam egwelarere akinyet na adenarin akwat auni, koinakinai lukican?”

⁶ Kinera nu mere kanu etimitor lukican; konye naarai kerai ekokolan, ŋes etiŋenenei eriagi koyaŋanar nukibwaanakinio toma.

⁷Kosodi kotema Yesu atiar, “Kinyeisi ŋes, kiŋadak kanuka apaaran naka aidaioka.

⁸ Naarai ejaas lukican nenipe kayes apaarasia kere, konye eoŋ mam kija kayes apaarasia kere.”

⁹Kosodete kejenut luipu koYudayan ebe ejai ŋina; kopotu kesi, mere kanuka Yesu bon, dimarai aanyun Lasaro da, lokitajaruni ŋesi kotoma okatwak.

¹⁰Konye kinerut isasedotin lupeti aiar Lasaro da;

¹¹naarai kanukeŋ apotu luipu koYudayan kotiakas, kiyuut Yesu.

¹² Apaaran naatupakini kiira ekodet loepol loabunit kanuka epucit ebe ebuni Yesu Yerusalem.

¹³ Kogweununut atenieik nuka amusogon, kolomasi aisiriam ŋes, kiworoto ebe, “Kosana! Isirereŋitoi ŋol loebunit kokiror loka Ejakait, Ekabaka loka Isirael!”

¹⁴ Adumunit Yesu ikoku yenika asigiria, kibwanen; kwape iwadikatere ebe,

¹⁵“Sirikikurianar, ijo akoku naka Sion; Koany ebunit Ekonikabaka, Ibwanenit ikoku yenika asigiria.”

¹⁶ Mam ber ikekesisiak apotu kojenut ŋun: konye kedau Yesu aitopoloorio, ŋes konyet kiitunioto ebe iwadikatai ŋun kanukeŋ, eswamakis da ŋes ŋun.

¹⁷Kitejen ekodet lokejai kaŋes nakenyaraunia Lasaro alomun kates, kitajaru da ŋes kokatwak.

¹⁸Kanuka ŋun kolot ekodet aisiriam ŋes naarai apotu kiirasi ebe eswamat aanyunet ŋin.

¹⁹ Kineranakinos Iparisayon bonik ebe, “Koanyutu mam ipedorete ibore; koany, atupasi ŋes lukakwapin kere.”

²⁰ Kejaas Iyonanin ice kotoma kalukedokarito aima kopucit.

²¹ Aso koloto ŋul mama ejai Pilip, etuŋanan loko Betesaida loko Galilaya, kilipata ŋes ebe, “Ejakait, kikoto isio aanyun Yesu.”

²²Kolot Pilip kolimok Anderea; kouparos Anderea ka Pilip, kolimokis Yesu.

²³Koboŋok Yesu kes ebe, “Adol esawa kitopolooroi Okoku loka etuŋanan.

²⁴ Abeit, abeit, katemari yes atiar, Arai mam ecokat loka akimait edoi kwap kotwani, esalit ikoni nepenen; konye arai ketwana, erai araito nuipu.

²⁵ Yenemina akeijar itooliori; ka yenelait akeijar kakwapin kanu idari kiton aijar naka ikar kere.

²⁶ Arai kejaanakini ituŋanan eoŋ, katup; neajai eoŋ ejauni ikakejaanakinan da nepenen; arai kejaanakini ituŋanan eoŋ, itopoloori Papa ŋes.

²⁷ “Kwana ekadakinit ekatau; atemari ai? Papa, koyuunai kosawa kalo. Konye kanuka ŋun abu kadol osawa lo.

²⁸ Papa, kitopoloo ekonikiror.” Kosodi kobu eporoto kotoma akuj ebe, “Etopolo, ido etopoloori bobo.”

²⁹ Nakiiraria ekodet lokebwoi kanen kobalas ebe Eretu akuj; kobalas ice ebe, “Emalaika enerata kaŋes.”

³⁰ Koboŋok Yesu kotema atiar, “Mam ebunit eporoto lo kanukaŋ, konye kanukus.

³¹ Atubokin kwana akwapin nu akiro: ereŋear kwana ekapolon loka akwapin kanu.

³² Eoŋ da arai keekiar kakwap, eriari ituŋa kere mamakaŋ.”

³³Konye kinera nu itodikini aketwanare naetwani.

³⁴ Koboŋok ekodet kotema ŋes atiar, “Kiirarit isio kotoma okisila ebe ebusi Kristo ikar kere: ikwaikini ai ijo inera ebe ibusakinit Okoku loka etuŋanan aikiario? Iŋai bo ŋol erai Okoku loka etuŋanan?”

³⁵ Kotema Yesu kes atiar, “Eroko aica ejai kayes apak naedit. Koloto yesi eroko aica ejai kayes, kinye amuton adolokin yes; ŋin yenelosi kamuton mam ejeni neelosi.

³⁶ Eroko aica ejai kayes, kiyuutu aica ŋin, tetere iraunete idwe luka aica.” Kiner Yesu ŋun, konyou kamakec koŋop.

³⁷Karaida abu kiswama aanyuneta nuipu noi kakonyenekec mam apotu kiyuut ŋes;

³⁸ tetere edoli akirot naka enabi Isaia nakinerit ebe, “Ejakait, iŋai eyuunit akosikirot? Iŋai da epukokinitai akan naka Ejakait?”

³⁹ Kanuka ŋun ŋes mam kiyuuniata naarai enerit bobo Isaia ebe,

⁴⁰“Etumudak akecekonye, etininik ikecetauon, Kinyeis aanyun kakecekonye, kojenut kotauonokec, Ka aibelokin, ketaŋaleu kes.”

⁴¹ Kinera Isaia akiro ŋun naarai abu koany aibusesuke, kolimo akiroke.

⁴² Konye kiton ikayaitok da kiyuut ŋes luipu; konye kanuka Iparisayon mam apotu kolimosi, kinyeis aireŋeario katukos:

⁴³ naarai keminasi aibuses naka ituŋa aitelekarit aibuses naka Edeke.

⁴⁴ Kiworo Yesu kobala ebe, “Ŋin yenikeyuunit eoŋ, mam keyuunit eoŋ, dimarai je lokejukuni.

⁴⁵ Yenikaanyuni eoŋ, eanyuni je lokejukuni.

⁴⁶ Abu eoŋ kabu araun aica toma akwapin, tetere ŋin yenikeyuunit mam esalakini amuton.

⁴⁷ Arai kiira ituŋanan akakiro, komam erici, mam eoŋ atubokini ŋes; naarai mam eoŋ abunit atubokin akwapin, dimarai aitajar akwapin.

⁴⁸ Yenikaŋeri eoŋ, yenimam ecamuni akakiro, ejai ekatubokinanike: akirot naenerit, ŋes etubokini kapaaran nakawasia.

⁴⁹Naarai mam eoŋ enerit kanukaŋ bon; konye Papa lokejukuni kainakinit aicorakinet, nuatemari ka nuenera da.

⁵⁰ Ajeni ebe akeicorakinet erai aijar naka ikar kere: aso akiro nuenera eoŋ, kwape kalimokinitor Papa, kwape kwaŋin enerar.”