Read Ebaibuli 1961 Yokana 15 Bible Online

Yokana 15 - Ebaibuli 1961 bible

Yokana 15

¹ “Arai eoŋ emusabibu lokabeit, Papaka da ŋes lokeswaman.

² Ŋinitenu kotomakaŋ namam erai araito, elemari ŋesi, ka ŋinitenu da naerai araito igweri, tetere iyatakini aira araito.

³Idaut yesi araut luilaete kanuka akirot nakalimokinit.

⁴Kosalakis tomakaŋ, eoŋ da tomakus. Kwape mam epedoria atenu aira araito alopet bon, arai mam esalit toma omusabibu, kwape kwaŋin yes da mam ipedorete, arai mam isalito tomakaŋ.

⁵ Arai eoŋ emusabibu, iraas yesi atenun. Yenesalit tomakaŋ, eoŋ da tomakeŋ, erai ŋin araito nuipu, naarai neamamea eoŋ mam ipedorete ibore.

⁶ Ituŋanan arai mam esali tomakaŋ, ecakario kiŋa kwape katenu, erinyori; etukokinio atenuna, ecakakinio akim, kidoposi.

⁷ Arai isalito tomakaŋ, akakiro da esalito tomakus, kilipata nuikotosi kere, kiswamakinio.

⁸ Itopolooritai Papaka kotoma nu arai iraete yesi araito nuipu, iraunos da ikakesisiak,

⁹Kwape kaminar Papa, eoŋ da kamina yes kwape kwaŋin; kosalata toma aminaka.

¹⁰ Arai iricete akaicorakineta, isalete toma aminaka, kwape aricitor eoŋ aicorakineta nuka Papaka, asalit da toma aminake.

¹¹ Kalimokis yes akiro ŋun tetere ejaun aiyalamaka tomakus, kitodolikinoi da aiyalamakus.

¹² “Na ŋes akaicorakinet ebe Kominanaros, kwape abu kaminar yes.

¹³ Emamei yenejaas kamin naepol aitelekarit na, ituŋanan ainakin akeijar kanuka ipaperoke.

¹⁴ Iraas yesi ikapapero arai iswamaete nukecorakini yes.

¹⁵Mam kanyarit bobo ibulesin, naarai ebulesit mam ejeni nuiswamai ejakaitike, konye kanyara yes ikapapero, naarai ketejenu yes kere nueirarit kama ejai Papaka.

¹⁶ Mere yes kiseunete eoŋ, dimarai eoŋ kaseu yes, kadakak yes tetere ilosete koraata araito, araitokus da kosalito; tetere nuilipete Papa kere kokirorika, kiinakini.

¹⁷Kecorakini yes ŋun tetere iminanaros.

¹⁸ “Arai kilai yes akwap, kojenutu ebe abu kala eoŋ eriŋa elaa yes.

¹⁹ Arai kiraas lukakwap, tiemina akwap yenerai yenikeŋ; konye naarai mam iraas lukakwap, konye abu kaseu yes kotoma akwap, kanuka ŋun ŋes kilaia yes akwap.

²⁰ Kiitunito akirot nakalimokinit yes ebe, Mam ebulesit itelekarit ejakaitike kapolou. Arai kareito eoŋ, kireete yes da; arai kericito akakirot, ericete nakus da.

²¹ Konye kiswamakinete yes ŋun kere kanuka ekakiror, naarai mam ejenete lokejukunit,

²²Arai kemam abunit einer kakes, timam ejaas karonis; konye kwana mam eiyaros karonisikec.

²³ Yenikaŋara eoŋ eŋara Papaka da.

²⁴ Arai mam keswamat kamakec aswamisio numam icetuŋanan iswamat, timam ejaas karonis, konye kwana kaanyut kaŋarut eoŋ ka Papaka da.

²⁵ Konye itodolikinio akirot naewadikatai kotoma okisilakec ebe, ‘Apotu kalaata atitai.’

²⁶ Konye kebu Ekayuunan, lokejukakini yes anyoun kama ejai Papa, ŋes Emoyo Lokabeit, loebuni kama ejai Papa, itejenuni ŋol nukaŋ;

²⁷ Yes da itejenunete, naarai ijaas keoŋ ameun kageunet.