Read Ebaibuli 1961 Yokana 16 Bible Online

Yokana 16 - Ebaibuli 1961 bible

Yokana 16

¹ “Abu kalimok yes akiro nu, kinyeis aitiguikinio.

² Kireŋeanario katukosia; eebo, ebunit esawa loeomitor ŋinituŋanan yenikiari yes ebe ijaanakini Edeke.

³ Iswamaete ŋun da naarai mam ejenunito Papa, karaida eoŋ.

⁴ Konye abu kalimok yes ŋun tetere naedolio esawakec, kiitunete ebe abu kalimokinite yes.

⁵ Mam abu kalimok yes nu ameun kageunet, naarai ajai nepepe kayes. “Konye kwana alosi mama ejai je lokejukunit; emamei edio kayesi lokeŋisi ebe, ‘Ilosi bo ai?’

⁶Konye naarai kalimokis yes akiro nu, elelebunos ican otauonokus.

⁷ Konye eoŋ kalimokini yes abeit; ejok kamakus arai kalot eoŋ, naarai arai mam alosi mam ebuni Ekayuunan mama ijaas; konye arai alosi ejukuni ŋes mamakus.

⁸ Kebu ŋol, ilepilepi ŋesi akwapin kanuka aronis ka adolit, ka etube da.

⁹ Aronis, naarai mam keyuunito eoŋ;

¹⁰ adolit, naarai alosi mama ejai Papa, mam bobo kianyunete;

¹¹ ka etube da, naarai adaun lokapolon loka akwapin kanu atubokinio.

¹² “Eroko ejaas eoŋ nuipu alimokin yes, konye mam ipedorete atitiŋikin kwana.

¹³ Kebu je, Emoyo loka abeit, kiŋarenikini yes kabeit kere; naarai mam inera nuke bon, konye inera kere nuepupuni, kitejenuni da yes akiro nuepote.

¹⁴Ketopoloori ŋesi eoŋ, naarai elemuni nueraas nukaŋ kitejenuni yes.

¹⁵ Nuejaatar Papa kere eraas nukaŋ; kanuka ŋun ŋes abalar ebe elemuni nueraas nukaŋ ka aitejenun yes.

¹⁶ “Apak naedit, mam kianyunete eoŋ; bobo da apak naedit, kianyunete.”

¹⁷Kineranakinos ice kokesisiakake atiar, “Anyoika bo nu nuebala ŋesi oni ebe, ‘Apak naedit, mam kianyunete eoŋ, bobo da apak naedit, kianyunete’; ido ebe, ‘Naarai alosi mama ejai Papa’?”

¹⁸Kobalas ebe, “Anyoika bo nu nuebala ebe, ‘Apak naedit’? Mam kijeni nuinera.”

¹⁹Kojeni Yesu ebe ekotosi aiŋit ŋes; kotema kes atiar, “Nupenu kereka nuiŋitanaros yesi nuabala eoŋ ebe, ‘Apak naedit, mam kianyunete eoŋ, bobo da apak naedit kianyunete’?

²⁰Abeit, abeit, katemari yes atiar, Imonyete yesi, ka aibworo, konye iyalamikinos akwapin; itururwete yesi, konye akusiiturur eraun ailel.

²¹ Naeriebar aberu aidoun eanyuni ican, naarai adolu ekesawa; konye kedau auruun ikoku, mam bobo iituni ariebo ŋin, kanuka ailel! naarai aurii ituŋanan kotoma akwapin.

²² Yes da, kwape kwaŋin ianyunete ican kwana, konye eoŋ kaanyuni yes bobo, elelete ikusitauon, emamei yenikidemari akusiilel.

²³ Kapaaran kaŋin mam kiŋisete eoŋ adiokirot. Abeit, abeit, katemari yes atiar, Arai kilipa Papa akirot kere kiinakini kokirorika.

²⁴ Kiton kwana mam ipotu kilipata akirot kokirorika; kilipa, idumunete tetere itodolikin akusiilel.

²⁵ “Enera eoŋ ŋun kayes kawaragasia; konye ebunit esawa lomam kinerar bobo kayes kawaragasia, konye kalimokinete kaitebeikin nuka Papa.

²⁶Kapaaran kaŋin ilipete kokirorika; kwabo mam kabala ebe eoŋ kelipakini yes kama ejai Papa;

²⁷ naarai Papa elopet kimina yes, naarai kiminasi yesi eoŋ, ido iyuunito ebe abu kabu kama ejai Papa.

²⁸Abu kabu kama ejai Papa, kabu toma akwapin; bobo da enyeini akwapin, alosi mama ejai Papa.”

²⁹ Kotemasi ikekesisiak atiar, “Kwana do inera kaitebeikin, kwabo mam bobo inera kawaragan.

³⁰ Kijeni do kwana ebe ijeni akiro kere, mam bobo ipuda ituŋanan aiŋit jo; kanuka ŋun kiyuunit ebe ibu kobu kama ejai Edeke.”

³¹Koboŋok Yesu kes ebe, “Aso iyuunito do kwana?

³² Koany, ebunit esawa, eebo, adau adolun, naisiarakinotor ŋolituŋanan oreke, ka ajalakin eoŋ kasilikinit, Konye mam eoŋ kasilikini, naarai ejai Papa keoŋ.

³³ Kalimokis yes akiro ŋun tetere ijaunete kainapakin tomakaŋ, Toma akwapin ejaas yes ican; konye kotitiŋikis, epiko eoŋ akwapin.”