Read Ebaibuli 1961 Yokana 17 Bible Online

Yokana 17 - Ebaibuli 1961 bible

Yokana 17

¹ Kinera Yesu ŋun; kikeu akekonye akuj, kobala ebe, “Papa, adol esawa; kitopolo Okokukon, tetere Okokukon da kitopoloori jo.

² Kwape ibu koinakinia apedor kama kaluejaas awat kere, tetere einakini kere lukiinakini ŋes aijar namam edaun.

³ Aijar namam edaun ŋes na ebe, kojenutu jo Edeke ediopet lokabeit, ka Yesu Kristo Iokijukuni.

⁴ Ketopolo eoŋ jo kakwap, naarai etodolik aswam naibu koinak eoŋ aswam.

⁵ Kwana da, wu Papa, kitopolooroi eoŋ kamakon kaibuses nakijaar eoŋ kajo eroko akwapin ejauna.

⁶ “Etodia ekonikiror mama ejaas ituŋa lukiinakinit kakwapin; araas lukon kosodi ainakin eoŋ: aricata da akonikirot.

⁷Kwana ejenete ebe kere lukiinak apote kamakon:

⁸ naarai akiro nukiinakinit eoŋ ainak kes; acamut, ajenut da abeit ebe abu kalom kamakon, eyuut ebe ijo kijukuni eoŋ.

⁹ Elipakini eoŋ ŋul: mam elipakini akwapin, konye ŋul lukiinak; naarai eraas lukon.

¹⁰ Ŋul da kere lueraas lukaŋ eraas lukon, lueraas lukon da lukaŋ; ketopolooritai eoŋ tomakec.

¹¹ Mam eoŋ aroko bobo ajai toma akwapin, konye lu ejaas toma akwapin, abuni eoŋ mamakon. Papa Lokalaunan, kidar kotoma okirorikon lukiinakinit eoŋ, tetere eraunete ipe, kwape kiraar oni ipe.

¹² Naariŋar ajai kakes, abu kedar kes kotoma okirorikon lokiinakinit; kegalikinite kes, kwabo emamei ediopet kakesi loeoliorit dimarai okoku loka aolior; tetere edoli nakiwadikatai.

¹³ Konye kwana abuni mamakon; enera akiro nu toma akwapin, tetere ejaunete kaiyalamaka naedolit kotomakec.

¹⁴ Ainak eoŋ kes akonikirot; alaata akwapin kes naarai mam eraas luka akwapin, kwape mam eoŋ araar loka akwapin.

¹⁵ Mam eoŋ elipi ebe kolema kes kakwapin, konye kidar kes kama ejai lokaronon,

¹⁶Mam kes eraas luka akwapin, kwape mam eoŋ araar loka akwapin.

¹⁷ Kitalau kes kotoma abeit; akonikirot ŋes abeit.

¹⁸ Kwape ibu kijukunia eoŋ toma akwapin, ejuka eoŋ da kes kwape kwaŋin.

¹⁹ Etalauna kanukec, tetere italaunio kes da kotoma abeit.

²⁰ “Mam elipakini lu bon, konye ŋul da lukeyuunete kanuka akecekirot;

²¹ tetere eraunete kere ipe; kwape ijo Papa ijaar tomakaŋ, eoŋ da tomakon, ŋul da kojaut tomawok: tetere iyuunete akwapin ebe ijo ŋes kijukunit.

²² Eoŋ da ainak kes aibuses nakiinakinit eoŋ; tetere eraunete ipe, kwape kiraar oni ipe:

²³ eoŋ tomakec, ijo da tomakaŋ, tetere edolete aitekoro naka eipeone; tetere ejenunete akwapin ebe ijo ŋes kijukunit, komina kes kwape ibu kominar eoŋ.

²⁴ Papa, akoto kes lukiinakinit ajaut nenipe keoŋ kere neajai; koanyutu akaibuses nakiinakinit; naarai ibu komina eoŋ eriŋa epesikina apetetait naka akwapin.

²⁵Wu Papa Ekadoliton, mam akwapin kijenete, konye kajeni jo; ejenete lu ebe ijo ŋes kijukunit.

²⁶Etejenu eoŋ kes ekonikiror, ido etejenuni, tetere amina nakiminar eoŋ ejaun tomakec, eoŋ da tomakec.”