Read Ebaibuli 1961 Yokana 18 Bible Online

Yokana 18 - Ebaibuli 1961 bible

Yokana 18

¹ Nakedaunia Yesu einer akiro ŋun, koloma nepepe kikekesisiak kodoka aguurut Kidiron, nekejai emanikor, koloma ŋesi ka ikekesisiak.

² Kejeni Yuda da loakoto abilakin ŋes ebotet aibois ŋin; naarai kelosenenei Yesu ŋina irwan ipu nenipe kikekesisiak.

³Kosodi kedau Yuda ainakinio erioŋet loka iserikalei, ka ikejaanakinak kama kisasedotin lupeti ka Iparisayon, kolot ŋina katalai ka akalasia ka lujiis.

⁴ Kosodi Yesu, kojeni kere nuedoikinete, kolom kotema kes atiar, “Iŋai bo imootos?”

⁵Koboŋokis ebe, “Yesu loko Nasaret.” Kotema Yesu kes atiar, “Eoŋ lo.” Kebwoi Yuda da lokebilakini ŋes ebotet nenipe kakes.

⁶Nakelimokinia kes ebe, “Eoŋ lo,” koboŋosi kau, kibirokinos kwap.

⁷Kosodi kiŋit bobo ebe, “Iŋai bo imootos?” Kotemasi atiar, “Yesu loko Nasaret.”

⁸Koboŋok Yesu ebe, “Kadau alimokin yes ebe eoŋ lo: aso arai kimootos eoŋ, kinyeis lu koloto.”

⁹ Tetere edoli akirot naenerit ebe, “Lukiinakinit eoŋ mam etooliorit ediopet.”

¹⁰Kosodi Simon Petero, kejai ekileŋ, kout kinom ebulesit loka losasedoti lopeti, kotub akekit nakoteten. Kerai ekiror loka ebulesit Malako.

¹¹ Kotema Yesu Petero atiar, “Kinyakak ekileŋikon akuraruke; mam kereka eoŋ amasi akoli nakainakinit Papa?”

¹² Kosodete iserikalei ka ekapolokiton ka ikejaanakinak luka Iyudayan kikamut Yesu, koena,

¹³Koyaŋaasi ber mama ejai Anas; naarai kerai ekamuran loka Kaiapa lokerai esasedoti lopeti okaru ŋol.

¹⁴ Kaiapa ŋol lokeinakin Iyudayan aomisioit ebe ejok etuŋanan ediopet atwanikin ituŋa.

¹⁵ Kotupa Simon Petero Yesu, ka ekesisian ece da. Kejenikina ekesisian ŋol kama ka losasedoti lopeti, koloma ŋesi nepepe ka Yesu alaro naka losasedoti lopeti;

¹⁶konye kobwoi Petero korute kokiŋa. Kosodi kolom ekesisian ece lokejenikina kama ka losasedoti lopeti, kinerata ka akagolon, kitolom Petero.

¹⁷Kosodi kotema apese nakagolon Petero atiar, “Irai kereka ijo da ediopet kokesisiak luka etuŋanan kaŋol?” Konye ŋes kobala ebe, “Mere eoŋ.”

¹⁸Kebwoete ibulesin ka ikejaanakinak inokokinito akim naka atotol; naarai kededen aaterot; ipierete akim; kejai Petero da nenipe kakes ebwoi ipieri.

¹⁹Kiŋit losasedoti lopeti Yesu nuka ikekesisiak ka nuka akeisisianakin da.

²⁰ Koboŋok Yesu ebe, “Enerit eoŋ kakwapin kaitebeikin; esisianakinenei apaarasia kere katukosia ka oyekalu da, neatukonokinos Iyudayan kere; kwabo mam eoŋ enerit akirot kere kaiyeiyea.

²¹Kanukinyo kiŋisitor eoŋ? Kiŋit lukeirarito anyoika nukalimokinit kes; koany, ejenete ŋul nuenerit eoŋ.”

²² Nakedaunia einer ŋun, abu ekejaanakinan lokebwoi aapu kaŋes kibapa Yesu, kobala ebe, “Iboŋokini kwaŋin esasedoti lopeti?”

²³Koboŋok Yesu ebe, “Arai enerit nukaronok kitejen nukaronok; konye arai enerit nuejok, kanukinyo kibapia?”

²⁴Kosodi kijuka Anas ŋes eenitai mama ejai Kaiapa losasedoti lopeti.

²⁵Kebwoi Simon Petero ipieri akim. Kosodete kobalas ŋes ebe, “Irai kereka ijo da ediopet kokesisiakake?” Koŋer kobala ebe, “Mere eoŋ.”

²⁶Kobala ediopet kobulesin luka losasedoti lopeti, lokerai lokajen naka je loketubi Petero akekit ebe, “Mam kereka kaanyunit jo komanikor nepepe kaŋesi”

²⁷Kosodi koŋer bobo Petero: atipet koruik ekokor.

²⁸ Kosodete koyaŋaasi Yesu anyoun kama ka Kaiapa kiton ore loka ekayaiton: kerai napetupuruc sek: konye mam kes elomara toma ore loka ekayaiton, kinyeis amunaar, konye kopedosi ainyam lukaleleŋ,

²⁹Kosodi kolom Pilato kiŋa mamakec, kobala ebe, “Nunyoika iwosatere etuŋanan lo?”

³⁰Koboŋokis kotemasi atiar, “Arai mam etuŋanan lo iswamat nueroko, timam kiyau mamakon.”

³¹ Kotema Pilato kes atiar, “Aso koyaŋaasi yesi, kotubokis kokisilikus.” Kotemasi Iyudayan ŋes atiar, “Emamei sio apedor aiar ituŋanan.”

³² Tetere edoli akirot naka Yesu nakinerit, itodikini atwanare naekoto atwanare.

³³Kosodi koloma Pilato bobo toma ore loka ekayaiton, konyarau Yesu, kotema ŋes atiar, “Irai kereka ijo Ekabaka loka Iyudayan?”

³⁴ Koboŋok Yesu ebe, “Inera kereka ijo nu kanukon bon, arai bo kilimokis ituŋa ice nukaŋ?”

³⁵ Koboŋok Pilato ebe, “Arai tope eoŋ Eyudayat? Akoniteker ka isasedotin lupeti kes kijaikinete mamakaŋ, Iswamat anyoika?”

³⁶Koboŋok Yesu ebe, “Akajakanut mere naka akwapin kanu: arai kerai akajakanut naka akwapin kanu, tikejioto ikakejaanakinak, kenyek aijaikin mama ejaas Iyudayan; konye akajakanut mere naka ne.”

³⁷ Kotema Pilato ŋes atiar, “Irai kereka ijo ekabaka?” Koboŋok Yesu ebe, “Ijo ibala ebe arai eoŋ ekabaka. Kauritai eoŋ kanuka ŋun, kanuka ŋun da abu kabu akwapin, tetere etejenuni abeit. Yenerai yenikabeit iirari ekaporoto.”

³⁸Kotema Pilato atiar, “Inyo bo abeit?” Kedau einer ŋun, koloma bobo mama ejaas Iyudayan, kotema kes atiar, “Mam eoŋ aanyunit adioronis kamakeŋ.

³⁹Konye ejai yes epone, eoŋ aosikin yes ediopet apak naka Aleleŋ: aso ikotosi kereka kaosikis Ekabaka loka Iyudayan?”

⁴⁰Kiworoto bobo ebe, “Mere lo, dimarai Baraba.” Kerai Baraba ŋol ekaŋatan.