Read Ebaibuli 1961 Yokana 21 Bible Online

Yokana 21 - Ebaibuli 1961 bible

Yokana 21

¹Akaulo kaŋun kitakanikin bobo Yesu ikesisiak kaŋolol naka Tiberia; kitakanikin kwanata:

² kejaas nepepe Simon Petero, ka Tomas loenyaritai Didumo, ka Natanael, loko Kana loko Galilaya, ka odwe luka Sebedayo, ka ice iarei kokesisiakake.

³ Kotema Simon Petero kes atiar, “Alosi ailok.” Kotemasi atiar, “Isio da kiupari kajo.” Kolomasi, kodokasi ataker; konye kakuar kaŋin mam ikamuna ibore.

⁴ Napiwalari akwap kobwo Yesu koitolima; konye mam ikesisiak ajenete ebe erai ŋesi Yesu.

⁵ Kosodi kotema Yesu kes atiar, “Idwe, ejaas yes idinyaman?” Koboŋokis ebe, “Mam.”

⁶ Kotema kes atiar, “Kocakakisi eboi kowai lokoteten loka ataker, idumunete yesi.” Kosodete kocakakis, kwana do mam epedorete airiun kanuka aipues naka lukecor.

⁷ Kosodi ekesisian lokemina Yesu kotema Petero atiar, “Ŋes Ejakait.” Nakiiraria Simon Petero ebe ŋes Ejakait, konap akenapito (naarai kimujalal), kibirokin aŋolol,

⁸Konye kopotu ikesisiak ice kotoma ataker, iriitos eboi ileleba lukecor, naarai mam kelwanikina kaneeoŋit, konye bala iyadin akwatat.

⁹Kosodi nakedokuniata oitolima koanyut kanen akim naka atotol, ibwaikinitai yenikecor ka emugati da.

¹⁰Kotema Yesu kes atiar, “Koyaut lukecor ice luikamunito.”

¹¹Kosodi kodoka Simon Petero ataker kiriu eboi oitolima, ileleba lukecor luepolok, akwatat ka akaisakany ka luuni: karaida kipu kwaŋin, mam eboi eŋeda,

¹²Kotema Yesu kes atiar, “Kopotu konyama.” Kwabo emamei ediopet kokesisiak loketitiŋikini aiŋit ŋes ebe, “Iŋai bo ijo?” Kojenut ebe kerai Ejakait.

¹³ Kobu Yesu, kolem emugati koinak kes, ka yenikecor da kwape kwaŋin.

¹⁴ Ŋin ŋes irwan nakiwuniet nakitakanikinor Yesu ikekesisiak kedau ajarun kokatwak.

¹⁵ Nakedauniata ainyam, kotema Yesu Simon Petero atiar, “Simon, okoku loka Yona, kimina eoŋ aitelekarit lu?” Kotema ŋes atiar, “Eebo, Ejakait, ijo ijeni ebe kamina.” Kotema ŋes atiar, “Kitadakenenei idwe luka amerekekinika.”

¹⁶ Kolimok bobo nakiareit ebe, “Simon, okoku loka Yona, kimina eoŋ?” Kotema ŋes atiar, “Eebo, Ejakait, ijo ijeni ebe kamina,” Kotema ŋes atiar, “Kipisenenei akamerekekin.”

¹⁷ Kolimok irwan nakiwuniet ebe, “Simon okoku loka Yona, kimina eoŋ?” Kokadak Petero naarai abu kolimok irwan nakiwuniet ebe, “Kimina eoŋ?” Kotema ŋes atiar, “Ejakait, ijeni akiro kere; ijeni kamina.” Kotema Yesu ŋes atiar, “Kitadakenenei akamerekekin.

¹⁸ Abeit, abeit, katemari jo atiar, Nairaar kolo ikatumunan ikapakini bon, ilosi neikoto: konye naimojoŋia iriori akonikanin, kisikapi ece, kiyaŋaari nemam ikoto.”

¹⁹ Kinera ŋun itodikini atwanare naetopolooria Edeke. Nakedaunia einer ŋun, kotema atiar, “Kotupunai.”

²⁰ Kibelokin Petero, koany ekesisian lokemina Yesu etupit, ŋes ŋol lokegoŋakina katorob naka Yesu kapak kaya naka inyamat lukatiboŋ, loabala ebe, “Ejakait, iŋai bo kibilakini ebotet?”

²¹Aso keanyu Petero ŋol, kotema ŋesi Yesu atiar, “Ejakait, ido bo lo ikwaikinio ai?”

²²Kotema Yesu ŋes atiar, “Arai akoto ŋol aidarit aitodol neabunio, ipodo bo ijo inyo? Kotupunai ijo eoŋ.”

²³Kisiarakin akirot ŋin oinacan, ebe mam ekesisian ŋol etwani, konye mam kebala Yesu ebe mam etwani; konye ebe, “Arai akoto ŋol aidarit aitodol neabunio, ipodo bo ijo inyo?”

²⁴ Ŋol ŋes ekesisian ŋol loitejenuni akiro ŋun, loewadikai ŋun; kijeni oni ebe akeitejenun erai nakabeit.

²⁵ Ejaas da akiro ace nuipu nueswamat Yesu, arai kiwadikatai ŋinidiopet, aomit ti mam akwapin ilosikinos iitabon lutikiwadikai.