Read Ebaibuli 1961 Yokana 5 Bible Online

Yokana 5 - Ebaibuli 1961 bible

Yokana 5

¹Akaulo kaŋun kojai epucit loka Iyudayan, kodoka Yesu Yerusalem.

²KoYerusalem ejai atapar ariri kerute loka amerekekin, nakenyaritai kAburanian Betesata, naejaas alomareta akany.

³Koperenenete lukadekak luipu kanen, imudukiok, ka luicodos, ka lukasenyak da, [lukidarito akulaun naka akipi,

⁴Naarai kejai apak nakedokununia emalaika loka Ejakait atapar, kigur akipi: aso yenikegei alomar kedaun aigur akipi koŋaleuni adeka kere nakikamunit.]

⁵Kojai nen etuŋanan, lokedeka ikar akaisauni ka lukanykauni.

⁶Nakeanyunia Yesu ŋol eperi kojen ebe kikoni nen ikar luipu, kotema ŋes atiar, “Ikoto aŋaleun?”

⁷Koboŋok lokadekan ebe, “Ejakait, emamei eoŋ etuŋanan lokebwaikini eoŋ atapar naitukulaunere akipi, konye naalosio, kageikini icetuŋanan adokar.”

⁸ Kotema Yesu ŋes atiar, “Konyou, kibwok akonikapet, kolot.”

⁹ Atipet koŋaleu etuŋanan ŋol, kibwok akekapet, kolot. Kerai da apaaran ŋin nakasabato.

¹⁰ Kanuka ŋun kolimokis Iyudayan etuŋanan lokitaŋaleunio ebe, “Erai lolo nakasabato, mam ibus jo aibwok akonikapet.”

¹¹Konye Koboŋok ebe, “Ŋol loketaŋaleuni ŋes kalimokini ebe, ‘Kibwok akonikapet, kolot.’ ”

¹² Kiŋita ebe, “Iŋai bo ŋol lokilimokini ebe, ‘Kibwok, kolot?’ ”

¹³Konye etuŋanan lokitaŋaleunio mam kejeni ebe erai iŋai, naarai koekarite Yesu, naarai ajaas ituŋa luipu aibois ŋin.

¹⁴ Kokau kaŋun kodum Yesu ŋes koyekalu, kotema ŋes atiar, “Koany, iŋaleu! Sirikidiaka bobo, kinyek akirot naerono adepar ŋin adoikin jo.”

¹⁵Kolot etuŋanan kolimok Iyudayan ebe kerai Yesu lokitaŋaleuni ŋes.

¹⁶ Kanuka ŋun kimanata Iyudayan Yesu, naarai kiswamai ŋun kapaaran nakasabato.

¹⁷ Konye Koboŋok Yesu kes ebe, “Iswamai Papaka kiton kwana, eoŋ da eswamai.”

¹⁸ Aso kanuka akirot kaŋin kiyatakis Iyudayan amoot aiar Ŋes, naarai mere bon aibil asabato, konye kanu anyaritor Edeke Papake, kitiriana da ka Edeke.

¹⁹ Aso Koboŋok Yesu kotema kes atiar, “Abeit, abeit, katemari yes atiar, Mam Okoku epedori aswam adiokirot elopet, dimarai ŋin naeanyuni ŋesi Papa iswamai; naarai nuiswamai Papa kere, ŋupeŋun iswamai Okoku da.

²⁰ Naarai emin Papa Okoku, itodikini ŋes kere nuiswamai ŋesi elopet; itodikini da aswamisio nuitelekarito ŋun, tetere yes iwumokinete.

²¹Naarai kwape itajaria Papa lukatwak ka ainakin kes aijar, kwaŋin einakinia Okoku da ŋul luekot aijar.

²² Mam Papa etubokini idiotuŋanan kere akiro, konye ainak Okoku etube kere,

²³ tetere ituŋa kere itopoloorete Okoku, kwape itopolooritotor Papa. Ŋin yenimam itopoloori Okoku mam itopoloori Papa da lokijukuni.

²⁴ Abeit, abeit, katemari yes atiar, ŋin yeniirari akakirot ka aiyuun ŋol lokejukuni, ejaas kaijar naka ikar kere; kwabo mam elomari toma atubokinio, konye anyou kotoma atwanare aloma aijar.

²⁵ “Abeit, abeit, katemari yes atiar, Ebunit esawa, ejai da kwana, loiirariata lukatwak eporoto loka Okoku loka Edeke, ŋul da luiirarete ejarete.

²⁶ Naarai kwape ejaatar Papa aijar kotomakeŋ, kwape kwaŋin abu koinak Okoku da ajaut kaijar kotomakeŋ;

²⁷ koinak ŋes apedor naka aitub, naarai erai Okoku loka etuŋanan,

²⁸Sirikiwumokis akiro nu; naarai ebunit esawa, loiirariata ituŋa kere luejaas toma atesin ekeporoto,

²⁹ elomunete; ŋul luiswamato nuejok mama ejai ajarun naka aijar; ka ŋul da luiswamato nueroko, mama ejai ajarun naka atubokinio.

³⁰ “Mam eoŋ apedori aswam adiokirot kanukaŋ elopet; kwape eiraria, kwape kwaŋin atubio: ekatube da erai lokabeit, naarai mam amoot nuakot eoŋ dimarai nuekot ŋol lokejukuni.

³¹ Arai ketejenu eoŋ nukaŋ elopet, akaitejenun mam erai nakabeit;

³² ejai ece loitejenuni nukaŋ, ajeni eoŋ ebe akeitejenun naitejenunia nukaŋ erai nakabeit.

³³ Ipotu yesi kijukut ituŋa mama ejai Yokana, kitejenu ŋesi abeit.

³⁴Konye eoŋ mam adumuni aitejenunio naebuni kotuŋa; konye enera eoŋ nu tetere yes kitajario.

³⁵ Kerai ŋol atala naenoki kocai, yes da ikotos aisiyalamikin akeica apak naedit.

³⁶ Konye aitejenun nakijaar eoŋ erai naepol adepar naka Yokana; naarai aswamisio nukainakinit Papa aitodolikin, aswamisio akulepek nueswamai, itejenunito nukaŋ ebe, kejukunit Papa.

³⁷ Papa da lokejukunit, etejenunit nukaŋ, Mam yes iirarito ekeporoto apaarasia kere, karaida aanyun akeput.

³⁸Mam da akekirot esalit tomakus, naarai mam yes iyuunitos lokijukuni ŋesi.

³⁹ Imoete kotoma nukiwadikatai, naarai iwomito ebe ijaunete kaijar naka ikar kere kotomakec; ŋun da itejenunito nukaŋ;

⁴⁰kwabo iŋerete aponare mamakaŋ tetere ijaunete kaijar.

⁴¹Mam eoŋ adumuni aibuses kotuŋa.

⁴²Konye kajeni yes, ebe emamei amin naka Edeke kotomakus.

⁴³ Abu kabu kokiror loka Papaka, mam yes kisukunyikis eoŋ; arai kebu ece kokirorike elopet, isukunyikinete ŋol.

⁴⁴ Ipedorete biai aiyuun, yes luidumanakinos aibuses bonik komam imoete aibuses naebuni kama ejai Edeke ediopet bon?

⁴⁵ Siriwomito ebe kewosai yes kama ejai Papa; ejai lokiwosai, ŋes Musa, loimunosi yesi.

⁴⁶ Naarai arai kiyuunito Musa, tikiyuut eoŋ da, naarai abu ŋesi kiwadika nukaŋ.

⁴⁷ Konye arai mam iyuunito akeiwadikaeta, ikwaikinete ai iyuunete akakiro?”