Read Ebaibuli 1961 Yokana 6 Bible Online

Yokana 6 - Ebaibuli 1961 bible

Yokana 6

¹ Akaulo kaŋun kolot Yesu okekwa juwai loka aŋolol naka Galilaya, naerai naka Tiberia.

²Kotupa ekodet loepol, naarai apotu koanyut aanyuneta nukiswamakini lukadekak.

³Kodoka Yesu oroŋat, kiboikin nen nepepe kikekesisiak.

⁵Aso kikeu Yesu akekonye, koany ekodet loepol ebunit mama ejai, kotema ŋesi Pilip atiar, “Kigweli kai inyamat, konyamata lu?”

⁶Kinera ŋun aitem ŋes: naarai ajeni ŋesi elopet nuelosi aswam.

⁷Koboŋok Pilip ebe, “Inyamat luka adenarin akwat aarei mam ilosikinos kes, arai kenyam ŋinituŋanan idis tai.”

⁸Ediopet kokesisiakake, ŋes Anderea onace loka Simon Petero, kotema ŋes atiar,

⁹ “Ejai ne isapat, yenejaas imugatin ikany lukesairi, ka agaria aarei: konye epedorete inyo ŋul kotuŋa luetia nen?”

¹⁰Kotema Yesu atiar, “Kisiboikis ituŋa.” Kejaas anya nuipu aibois ŋin, Aso kiboikinos ikiliok, kwaka ilukumin ikany.

¹¹Kosodi kolem Yesu imugatin; kedau aimal, kokorak lukiboiete; kikonak nen agaria, koinak kwape akototor.

¹²Nakimonikinotor, kolimok ikekesisiak ebe, “Kotukonokisi atutubeta nuabilibila nuesalito, sirikedepar imodiobore.”

¹³Kosodete kotukonokis, kilelebata ibukito itomon ka luarei atutubeta nuabilibila nuka imugatin ikany lukesairi, nukitasalete kwi lukenyamete.

¹⁴ Kosodete nakeanyuniata ituŋa aanyunet naeswamai, kobalas ebe, “Abeit lo ŋes enabi loebunit akwapin.”

¹⁵ Kosodi kejenu Yesu ebe kekotosi aponare aikamun ŋes tetere itaraunete ekabaka, kogitar kolot bobo oroŋan ŋes elopet bon.

¹⁶ Nakitiboŋia kijesaros ikekesisiak aŋolol,

¹⁷kodokas ataker, kogeut aikwaŋar alosit Kaparanaum. Komutonor akwap, komam ber Yesu ebunit mamakec.

¹⁸Kogeu aŋolol akulaun kanuka aikut naka ekwam loepol.

¹⁹Nakikwaŋarotor bala amairon auni arai aoŋon, koanyut Yesu itorit aŋolol, ikunyunit ataker; kokuriakaros.

²⁰Konye kotema kes atiar, “Eoŋ lo: sirikikuriakaros.”

²¹Aso kokotosi aisukunyuun ŋes ataker; atipet kodol ataker akwap naabeete kesi.

²²Apaaran naatupakini keany ekodet loabwoi kokekwa kaŋolol ebe emamei acetaker, dimarai adiopet bon, bobo da ebe mam Yesu adokarit ataker ŋin nepepe kikekesisiak, konye alosito ikekesisiak bonik.

²³ (Konye kopotu atakerin ace anyoun koTiberia koapias kaibois nakenyamiata imugatin kedau Ejakait aimal.)

²⁴Aso nakeanyunia ekodet ebe emamei Yesu kanen, karaida ikekesisiak, kodokasi kesi ikulepek atakerin, koloto Kaparanaum, emooto Yesu.

²⁵Nakedumuniata ŋes kokekwa kaŋolol, kotemasi ŋes atiar, “Rabi, kibuni ijo ne wori?”

²⁶Koboŋok Yesu ebe, “Abeit, abeit, katemari yes atiar, kimoete eoŋ, mere kanuianyuniata aanyuneta, konye naarai ipotu konyama imugatin kimonikinos.

²⁷ Siritaaritos kanuka inyamat luedaunos, konye kanuka inyamat luikuniasi kiton aijar naka ikar kere, lukiinakini Okoku loka etuŋanan; naarai ŋol ŋes loepucakinit Papa.”

²⁸Kosodete kotemasi ŋes atiar, “Kikonakini ai tetere kiswamai aswamisio nuka Edeke?”

²⁹ Koboŋok Yesu kotema kes atiar, “Na Ŋes aswam naka Edeke, kiyuut ŋol lokijukuni ŋesi.”

³⁰ Kosodete kotemasi ŋes atiar, “Aso ca iswamai aanyunet anyoin, tetere kianyun keyuutu jo? Iswamai aswam anyoin?

³¹ Apotu lukapapaakosi konyama emanu kamodiŋ; kwape iwadikatere ebe, ‘Koinak kes inyamat lukepote kotoma akuj ainyam.’ ”

³² Kotema Yesu kes atiar, “Abeit, abeit, katemari yes atiar, Mere Musa kiinakini yes inyamat ŋul lukepote kotoma akuj; konye Papaka ŋes kiinakini yes inyamat lukabeit luepote kotoma akuj.

³³ Naarai inyamat luka Edeke ŋes ŋin yenijesuni kotoma akuj, ka ainakin akwapisinei aijar.”

³⁴Kotemasi ŋes atiar, “Ejakait, koinakinai inyamat lu apaarasia kere.”

³⁵ Kotema Yesu kes atiar, “Arai eoŋ inyamat luka aijar; ŋin yenebuni mamakaŋ mam cut eriebi eteŋei, ŋin da yenikeyuuni eoŋ mam cut ejakenenei akur.

³⁶ Konye katema yes atiar kianyut eoŋ, komam iyuunito.

³⁷ Kere lukainakini Papa epote mama ajai; ŋin da yenebuni mamakaŋ mam cut ereŋeari.

³⁸ Naarai ejesuna kotoma akuj, mere aswam nuakoto eoŋ, dimarai nuekot lokejukuni.

³⁹ Nuekot lokejukuni kes nu ebe, Kotoma kaŋul kere lukainakini siriketoolio idiopet da, konye ketajar kapaaran nakawasia.

⁴⁰ Naarai nuekot Papaka kes nu ebe, Yeneanyuni Okoku ka aiyuun ŋes kojaut kaijar naka ikar kere; etajaruni eoŋ ŋes kapaaran nakawasia.”

⁴¹Kosodete kirurumakis ŋes Iyudayan, naarai abala ebe, “Arai eoŋ inyamat lukijesunos kotoma akuj.”

⁴² Kobalas ebe, “Mere kereka lo Yesu, okoku loka Yosep, lokijeni papake ka totoke? Ikwaikini ai ebala ebe, Ejesun eoŋ kotoma akuj?”

⁴³Koboŋok Yesu kotema kes atiar, “Sirikirurumata bonik ka bonik.

⁴⁴ Emamei ituŋanan yenepedori abunore mamakaŋ arai mam eriunit Papa lokejukuni; eoŋ da etajaruni ŋes kapaaran nakawasia.

⁴⁵ Iwadikatai kotoma onabin ebe, ‘Isisianakini Edeke kes kere.’ Ŋin yeniirarit, ka aisisiaun kaneejai Papa, ebuni mamakaŋ.

⁴⁶ Mere ebe eanyunit ituŋanan Papa, dimarai ŋol loabuu kama ejai Edeke; ŋol ŋes eanyunit Papa.

⁴⁷ Abeit, abeit, katemari yes atiar, Yeniyuunit ejaas kaijar naka ikar kere.

⁴⁸ Arai eoŋ inyamat luka aijar.

⁴⁹ Apotu lukapapaakus konyamata emanu kamodiŋ, kotwaka da.

⁵⁰Lu kes inyamat luijesunos kotoma akuj, tetere enyami ituŋanan kes komam etwani.

⁵¹ Arai eoŋ inyamat lukajarak lukijesunos kotoma akuj; arai kenyam ituŋanan inyamat lu, ebusi ikar kere; inyamat da luainakini eoŋ kanuka aijar naka akwapisinei ŋes akakuan.”

⁵² Kopegasi Iyudayan bonik ebe, “Epedori biai etuŋanan lo ainakin oni akekuan ainyam?”

⁵³Aso kotema Yesu kes atiar, “Abeit, abeit, katemari yes atiar, Arai mam inyamete akuan naka Okoku loka etuŋanan, ka aimat da akeokot, emamei aijar kotomakus.

⁵⁴Yenenyami akakuan ka aimat da akaokot ejaas kaijar naka ikar kere, eoŋ da etajaruni ŋes kapaaran nakawasia.

⁵⁵Naarai akakuan kes inyamat lukabeit, akaokot da kes numatan nukabeit.

⁵⁶ Yenenyami akakuan ka aimat da akaokot esalakini tomakaŋ, eoŋ da tomakeŋ,

⁵⁷Kwape kejukunia Papa lokajaran eoŋ, ajari eoŋ da kanuka Papa, kwape kwaŋin yenikanyami eoŋ ejari kanukaŋ,

⁵⁸Lu kes inyamat lukijesunos kotoma akuj, mere kwape kenyamiata lukapapaa kotwaka; yenenyami inyamat lu ejari ikar kere.”

⁵⁹Enera ŋesi akiro ŋun kotoma atukos, naesisianakinia Kaparanaum.

⁶⁰Nakiirariata ice luipu kokesisiakake kobalas ebe, “Etiono ca akirot na; iŋai bo epedori aiirar?”

⁶¹Konye kojeni Yesu kotauke ebe erurumata ikekesisiak kanuka akirot kaŋin, kotema kes atiar, “Kitiguiki ca yes akirot na?

⁶² Ikonakinete bo do ai arai ianyunete Okoku loka etuŋanan edokari nekolo kejai sek?

⁶³ Emoyo ŋes einakini aijar, mam akuan epedori ibore; akiro nukalimokinit yes eraas emoyo, eraas da aijar.

⁶⁴ Konye ejaas ice kotomakus lumam iyuunito.” Naarai kejeni Yesu ameun kageunet lumam iyuunito, ka ŋol da loebilakini ŋes ebotet.

⁶⁵ Kobala ebe, “Kanuka ŋun katema yes ebe emamei ituŋanan yenepedori abunore mamakaŋ, dimikito einakinitai kama ka Papa.”

⁶⁶Kanuka ŋun koboŋosi luipu kokesisiakake, komam bobo eupasi kaŋes.

⁶⁷Aso kotema Yesu lutomon kaarei atiar, “Ikotosi kereka yesi da aboŋor?”

⁶⁸ Koboŋok Simon Petero ebe, “Ejakait, kilosi mama ejai iŋai? Ijaas ijo kakiro nuka aijar naka ikar kere.

⁶⁹ Kiyuunit isio, bobo da kijeni ebe irai ijo Lokalaunan loka Edeke.”

⁷⁰Koboŋok Yesu kes ebe, “Mere kereka eoŋ kaseunit yes lutomon kaarei, ediopet da kayesi erai Satan?”

⁷¹Enera nuka Yuda okoku loka Isikariot, naarai ŋol loebilakini ŋes ebotet, ŋes da ediopet kotomon ka luarei.