Read Ebaibuli 1961 Yokana 7 Bible Online

Yokana 7 - Ebaibuli 1961 bible

Yokana 7

¹ Akaulo kaŋun kitorite Yesu Galilaya; naarai mam kekoto aitorit Yudaya, naarai kemootos lyudayan aiar ŋes.

² Keapie epucit loka lyudayan loka iswamin.

³ Aso kotemasi ŋes ikeinacan atiar, “Konyou kane kolot Yudaya, tetere eanyunete ikonikesisiak akoniswamisio nuiswamai.

⁴Naarai emamei ituŋanan yeniswamai akiro kaiyeiyea, yenekoto ŋes elopet aitebeun. Arai kiswama nu kitodiar kakwapin.”

⁵ Naarai ikeinacan da mam eyuunito ŋes.

⁶ Aso kotema Yesu kes atiar, “Eroko akapak edolo; konye itemokino akusipak apaarasia kere.

⁷ Mam akwapin kipedorete aila yes, konye kalaito eoŋ, naarai etejenu eoŋ ebe eroko akeceswamisio.

⁸Kodokasi yesi opucit, mam ber eoŋ edokari opucit ŋol, naarai eroko akapak itodolikino.”

⁹Nakedaunia alimokin kes ŋun kosalak Galilaya.

¹⁰Konye nakedauniata ikeinacan adokar opucit, kanen kodoka ŋesi da elopet, mere kaitebeikin konye bala kaiyeiyea.

¹¹Aso komoata Iyudayan ŋes kopucit, kobalas ebe, “Ai bo ejai ŋol?”

¹²Kojau airuruma naepol kokodeta kanukeŋ; kobalas ice ebe, “Erai etuŋanan loejok.” Kobalas ice da ebe, “Mere kwaŋin, konye itapaari ekodet.”

¹³ Konye emamei ituŋanan yeninera kaitebeikin naarai kekuriaka Iyudayan.

¹⁴Kosodi kanen kokidiŋ kepucit kodoka Yesu, koloma oyekalu, kogeu aisisianakin.

¹⁵ Koumokis Iyudayan, kobalas ebe, “Kikonakini lo ai ecouni komam isisiat?”

¹⁶ Aso Koboŋok Yesu kotema kes atiar, “Akaisisianakin mere nakaŋ dimarai naka ŋol lokejukuni;

¹⁷arai ekoto ituŋanan aswam nuekot ŋol, ejenuni nuka aisisianakin kana, arai kebuni kama ejai Edeke, arai bo enera kanukaŋ bon.

¹⁸ Yeninera kanukeŋ bon emoot akeibuses ilopet; konye yenemoot aibuses naka ŋol kalokijukuni ŋes erai yenikabeit, ido kotomake emamei aiŋalanut.

¹⁹ Mam kereka Musa kiinakinit yes ikisila? Konye emamei idio kayesi yenericit ikisila. Kanukinyo kimoiata aiar eoŋ?”

²⁰ Koboŋok ekodet ebe, “Ejai jo ajokit! Iŋai bo emoot aiar jo?”

²¹ Koboŋok Yesu kotema kes atiar, “Abu keswama aswamisioit adiopet, iwumokinito yesi kere.

²² Kanuka ŋun abu Musa koinak yes aikep (konye mam abuni kama ka Musa, konye kama ka lukapapaa); ikepete yesi etuŋanan kapaaran nakasabato.

²³ Arai ekepio etuŋanan kanakasabato, tetere mam ekisil loka Musa ebila, kinyunyurikis kereka eoŋ kanu etaŋaleunio cut etuŋanan kapaaran nakasabato?

²⁴ Sirikituboto kwape eseseniata akusikonye, konye kotuboto kotoma adolit.”

²⁵ Aso kotemasi ice lukoYerusalem atiar, “Mere lo loemootos kesi aiar?

²⁶Konye, koany, inera kaitebeikin, kwabo mam elimokinete adiokirot! Motoko ejenete ikayaitok abeit ebe erai lo Kristo?

²⁷ Konye kijeni lo neebunitor; konye naebunio Kristo, emamei yenejeni neebunio.”

²⁸Kiworo Yesu isisianakini koyekalu kobala ebe, “Ijenete eoŋ, ijenete nekabunio da; kwabo mam eoŋ abunit kanukaŋ, konye ŋol lokejukuni erai lokabeit, lomam yes ijenete.

²⁹ Ajeni eoŋ ŋes; naarai abuni kamakeŋ, ŋes da kejukuni.”

³⁰ Kosodete komootos aikamun ŋes; konye mam etuŋanan abu korio akekanin aikamunia, naarai ariŋa edoluno ekesawa.

³¹ Konye luipu lukokodet kiyuut ŋes; kobalas ebe, “Naebunio Kristo, iswamai kereka ŋesi aanyuneta nuipu aitelekarit nuiswamat lo?”

³²Kiirasi Iparisayon ikodeta irurumaete ŋun kanukeŋ; kosodete isasedotin lupeti ka Iparisayon kijukasi ikejaanakinak aikamun ŋes.

³³ Kosodi Yesu kobala ebe, “Eroko apak edit ajai nenipe kayes, kasodi alosit mama ejai lokejukuni.

³⁴ Kimoete eoŋ komam kidumunete: neajai eoŋ mam yes ipedorete aponare.”

³⁵Kosodete kineranakinos Iyudayan ebe, “Ai bo elosi lo nemam oni kipedori adumunia ŋes? Elosi kereka ŋesi mama ejaas luisiarakina oYonanin, ka aisisianakin da Iyonanin?

³⁶Akirot anyoin na nainerit ebe, ‘Kimoete eoŋ komam kidumunete’, ido, ‘Neajai eoŋ mam ipedorete aponare’?”

³⁷ Kosodi kapaaran nakawasia naka epucit, ŋes apaaran nakapolon, kobwo Yesu kiworo ebe, “Arai kejak ituŋanan akur, kobu mamakaŋ komat.

³⁸ Yenikeyuuni, kwape ineratar nuiwadikatai ebe, ‘Eleleete icorin luka akipi nukajarak kotomakeŋ.’ ”

³⁹ Enerit akirot ŋin kanuka Emoyo, loeinakinio luiyuunito ŋes: naarai ariŋa ber Emoyo einakina, naarai eriŋa Yesu itopolooro.

⁴⁰ Aso nakiirariata ice kokodet akiro ŋun, kobalas ebe, “Abeit erai lo enabi je.”

⁴¹ Ice da kobalas ebe, “Erai lo Kristo.” Konye ice kobalas ebe, “Mam, ebuni tope Kristo koGalilaya?

⁴² Mam kereka ebalas nukiwadikatai ebe ebuni Kristo kaur naka Daudi, kotoma Betelekem, ere lokejai Daudi?”

⁴³ Kwaŋin kojai atiakatiakaun kotuŋa kanukeŋ.

⁴⁴ Kokotosi ice aikamun ŋes, konye komamei yenikibwaikini ŋes akanin.

⁴⁵ Koboŋosi ikejaanakinak mama ejaas isasedotin lupeti ka Iparisayon, luketemarete kes atiar, “Kanukinyo mam kiyauniata ŋes?”

⁴⁶ Koboŋokis ikejaanakinak ebe, “Mam inerit cut idiotuŋanan kwape inerar etuŋanan lo.”

⁴⁷Kosodete koboŋokis Iparisayon ebe, “Aso cama kitapaa yes da?

⁴⁸ Iŋai bo kotoma ikayaitok loiyuunit ŋes, arai kotoma oParisayon?

⁴⁹Konye ikenitoi ekodet ŋol lomam ejeni ikisila.”

⁵⁰ Kobala Nikodemo, ŋes lokelosit kolo mama ejai Yesu, lokerai ediopet kakesi ebe,

⁵¹ “Etubokinete kereka ikisilawok etuŋanan, eriŋa ber iirara ŋes ka ajenun nuiswamai?”

⁵² Koboŋokis kotemasi ŋes atiar, “Ibunit kereka ijo da koGalilaya? Koŋic, koany ebe mam enyouni enabi koGalilaya.”

⁵³Koboŋo ŋolituŋanan oreke.