Read Ebaibuli 1961 Yokana 9 Bible Online

Yokana 9 - Ebaibuli 1961 bible

Yokana 9

¹ Nakitoritor, koany etuŋanan emuduki ameun kaurioke.

² Kiŋita ŋes ikekesisiak ebe, “Rabi, iŋai bo kediakarit, etuŋanan lo arai bo ikekauriak, tape eurio emudukana?”

³ Koboŋok Yesu ebe, “Mam lo ediakarit, karaida ikekauriak; konye tetere itodiaros aswamisio nuka Edeke kotomakeŋ.

⁴ Kibusakinit aswam aswamisio nuka ŋol lokejukuni, eroko apaaran; ebuni akuar, namam epedoria ituŋanan aswam.

⁵ Naajaar eoŋ akwapin, arai eoŋ aica naka akwapin.”

⁶ Nakedaunia einer ŋun, kimuik aimul kwap, kosubunia elupe, kinyonyo akonye nuka etuŋanan kelupe,

⁷Kotema ŋes atiar, “Kolot kilota katapar naka Siloam” (apolouke ebe Loiyakiaritai), Kosodi kolot, kilota, koboŋu eseseni,

⁸Kosodete ikeidunyeta ka lukeanyununete lem erai ekelipan kotemasi atiar, “Mere kereka lo lolem iboienenei ilipitoi?”

⁹Kobalas ice ebe, “Ŋes ŋol”; ka ice da ebe, “Mam, konye eputosi kaŋes.” Kobala ŋesi ebe, “Eoŋ lopelo.”

¹⁰Kotemasi ŋes atiar, “Kekwenyunete biai akonikonye?”

¹¹Koboŋok ebe, “Etuŋanan loenyaritai Yesu kosub elupe kenyonyoik akakonye katema atiar, ‘Kolot Siloam kilota’; kasodi kalot, kelota, kakweny.”

¹²Kotemasi ŋes atiar, “Ai bo ejai ŋol?” Kotema atiar, “Mam eoŋ ajeni.”

¹³Koyaŋaasi lokerai lem emuduki mama ejaas Iparisayon.

¹⁴ Kerai apaaran nakasabato nakesubia Yesu elupe ka aitwekenyun da akekonye.

¹⁵Aso kiŋita ŋes bobo Iparisayon da epone lokekwenyunia, Kotema kes atiar, “Abu kibwaik elupe akonyeka, kelota, kwana do aseseni.”

¹⁶ Kobalas ice koParisayon ebe, “Mam etuŋanan ŋol ebunit kama ejai Edeke, naarai mam ericit nakasabato.” Konye kobalas ice ebe, “Epedori biai ekadiakanaran aswam aanyuneta nuikote nen?” Kojaun atiakatiakaun kamakec.

¹⁷ Kobalas bobo emuduki ebe, “Ido bo jo ibala biai kanukeŋ, naarai abu kitwekeny akonikonyen?” Kobala ebe, “Erai enabi.”

¹⁸Aso mam Iyudayan apotu kiyuut akekiro ebe kerai lem emuduki, kosodi akwenyun, kiton neanyarauniata ikauriak luka lokitwekenyunio,

¹⁹kiŋita kes ebe, “Erai kereka lo okokukus? Loibalasi aurio emudukana? Ikwaikini bo ai ekwenyi kwana?”

²⁰Koboŋokis ikekauriak ebe, “Kijeni ebe lo ŋes okokukosi, ebe da aurio emudukana;

²¹konye epone loekwenyia kwana mam kijeni; mam kijeni da yenikitwekenyuni ŋes akonye. Kiŋita ŋes; epol ŋesi, ineri elopet kanukeŋ.”

²² Enerasi ikekauriak kwaŋin naarai akuriaka Iyudayan; naarai enerunitos Iyudayan ebe arai elimori ituŋanan ŋes araut Kristo, ireŋeario katukos.

²³Kanuka ŋun ŋes eneratar ikekauriak ebe, “Epol ŋesi; kiŋita ŋes.”

²⁴ Konyaraut nakiareit etuŋanan loamudukana, kotemasi ŋes atiar, “Kitopolo Edeke; kijeni isio ebe erai etuŋanan ŋol ekadiakanaran.”

²⁵Koboŋok ebe, “Arai ca erai ekadiakanaran, mam eoŋ ajeni; ajeni adiopekirot ebe karai eoŋ emuduki, kwana do akwenyi.”

²⁶Kosodete kotemasi ŋes atiar, “Kiikonakini ai? Kiitwekenyuni biai akonikonye?”

²⁷Koboŋok kes ebe, “Kadau alimokin yesi komam iirarete. Kanukinyo bobo ikototor akiirar? Ikotosi yesi da araun ikekesisiak?”

²⁸Komoromoroto, kobalas ebe, “Ijo irai ekekesisian; konye kirai isio ikesisiak luka Musa.

²⁹Kijeni isio ebe abu Edeke kinera ka Musa; konye ŋol mam kijeni nekebunio.”

³⁰Koboŋok etuŋanan kotema atiar, “Eraas nu nukaumokin, ebe mam yes ijenete nekebunio, konye abu ketwekeny akakonye.

³¹ Kijeni ebe mam Edeke iirari ikadiakanarak; konye arai emai ituŋanan Edeke, iswamai da nuekoto ŋesi, iirari ŋol.

³²Ameun kageunet naka akwapin mam lem iiraritai ebe itwekenyunit ituŋanan akonye nuka yeneuritai emudukana.

³³ Arai kemam ŋol ebunit kama ejai Edeke, ti mam kepedo aswam akirot kere.”

³⁴ Koboŋokis kotemasi ŋes atiar, “Kiwuritai cut jo kotoma adiakar, kisisianakini kereka ijo da sio?” Kireŋeasi ŋes kiŋa.

³⁵Kiira Yesu ebe ereŋeasi kiŋa, kodum ŋes kotema atiar, “Iyuunit kereka ijo Okoku loka etuŋanan”

³⁶Koboŋok ŋesi kotema atiar, “Ŋes bo iŋai, Ejakait, keyuu ŋes?”

³⁷ Kotema Yesu ŋes atiar, “Iany ŋes, ŋes ŋol loineras kajo.”

³⁸Kotema atiar, “Ejakait, eyuunit.” Komaa ŋes.

³⁹ Kotema Yesu atiar, “Abu kabu toma akwapin nu kanuka etube, tetere eanyunete lumam eanyunete, koraut da lueanyunete imudukiok.”

⁴⁰ Nakiirariata ice koParisayon lukejaas nepepe kaŋes, kotemasi ŋes atiar, “Kirai kereka isio da imudukiok?”

⁴¹ Kotema Yesu kes atiar, “Arai kiraas imudukiok, timam ijaas kadiakar; konye kwana ibalasi ebe ‘Kikwenyi,’ aso esalit adiakarikus.”