Read Ebaibuli 1961 Aswamisio 15 Bible Online

Aswamisio 15 - Ebaibuli 1961 bible

Aswamisio 15

¹ Konye kijesunos icetuŋa anyoun koYudaya, kisisianakis iinacan ebe, “Arai mam kikepio kwape ejaar epone loka Musa, mam ipedorete aitajario.”

² Kosodi kedaut Paul ka Baranaba epeget kituŋa kaŋul ka aibakibak noi, kicorakis iinacan Paul ka Baranaba ka ice kakesi adokar Yerusalem mama ejaas ikiyakia ka imakio kanuka akirot kaŋin.

³Aso kotwar ekanisa kes kitoro akwapin nuko Poinike ka Samaria, itatamete aibelokin naka Imo, kisiyalamikis noi iinacan.

⁴ Nakedolioto Yerusalem, kisukunyik ekanisa, ka ikiyakia ka imakio, kitejenut akiro kere nukiswamai Edeke nepepe kakes.

⁵Konye konyout lukiyuunito ice lukorioŋet loka Iparisayon, kobalas ebe, “Ibusakinit aikep kes, ka aicorakin da airic ikisila luka Musa.”

⁶Kotukokinos ikiyakia ka imakio tetere eomoomoete akirot ŋin.

⁷ Kedaut aibakibak noi, kobwo Petero kotema kes atiar, “Iinacan, ijenete ebe kapaarasia nugeet, abu Edeke koseu kokidiŋikus, tetere iirarete Imo akirot naka Akiro Nukajokak kaitukuka, kiyuut.

⁸ Edeke da loejeni itauon luka ituŋa kitejenik kes, koinak Emoyo Lokalaunan kwape kiinakinia oni;

⁹ kwabo mam etiakit oni ka kes, konye itesegaari itauonokec kaiyuun.

¹⁰ Aso kanukinyo ikoduniata Edeke kanuka aibwaikin ajookot omurisiŋa luka ikesisiak, namam lukapapaawok karaida oni kipedorit airioŋ?

¹¹ Konye kiyuunit ebe kitajario kanuka asianut naka Ejakait Yesu, kwape kakesi.”

¹²Kosodi kililiŋ atukot kere; kopupokis Baranaba ka Paul itatamete aanyuneta ka nukaumokin nukiswamai Edeke kotomakec komo.

¹³ Nakedauniata aililiŋ koboŋok Yakob ebe, “Iinacan, kiirarai.

¹⁴ Kitejenu oni Simeon kwape kisiaunia Edeke aanyanar Imo, alemun kotomakec ituŋa kanuka ekekiror.

¹⁵ Ecamanara nu kakiro nuka inabin, kwape iwadikatere ebe,

¹⁶ ‘Akaulo kaŋun aboŋuni, Aduki bobo ewema loka Daudi lokibiror; Aduki bobo amejeke, Eticasi ŋes.

¹⁷Tetere luesalito luka ituŋa emoete Ejakait, Ka Imo kere luenyaritai ekakiror.

¹⁸ Ebala Ejakait nu, loitejenunit akiro nu ameun apeŋo.’

¹⁹Kanuka ŋun atubi eoŋ kwanata ebe, Mam kiticani ŋul luibelokinos mama ejai Edeke kotoma Imo,

²⁰ konye kewadikakisi kes kinaca nuesiliaka nuka aputosia, ka adoteu, ka itiaŋ luemiedio ka aokot.

²¹ Naarai ameun katurio nupeŋo ajaas lualimonokinete akiro nuka Musa kaŋolire, naarai esiomio ŋinisabato kotoma atukosia.”

²²Kosodete kitojoka ikiyakia ka imakio ka ekanisa kere, aseun ituŋa lukotomakec, aiyakiar Antiokia nepepe ka Paul ka Baranaba; kes luta, Yuda loenyaritai Barasaba, ka Sila, lukeraas ikeŋarenikinok koinacan:

²³kiwadikata kwanata kijukasi kakaninikec ebe: “Iinacan ikiyakia ka imakio mama ejaas iinacan lueraas Imo kotoma Antiokia ka Suria ka Kilikia, ayogan.

²⁴ Naarai kipupu ebe ituŋa ice lukepote kamakosi kiticanata yes kakirokec, isibuonokinete itauonokus, numam sio kicorakinit,

²⁵kitojok sio, kemorikikina ketau ediopet, aseun ituŋa aiyakuun mama ijaas nepepe ka Baranaba ka Paul luminanawok,

²⁶ituŋa luijaikinito aijarakec kanuka ekiror loka Ejakaitiwok Yesu Kristo,

²⁷aso kijuku Yuda ka Sila, lukilimokinete akiro nupenu kaitukekec.

²⁸ Naarai itojokit Emoyo Lokalaunan ka sio da kenyeis aisibwok yes abwokon naitelekarit akiro nu nuibusakinito:

²⁹Kes nuta ebe, Kinaca iboro lueinakinio aputosia araut asuban, ka aokot, ka itiaŋ luemiedio, ka adoteu da. Arai kitikokinos kaŋun, iswamaete ejok, Yoga do,”

³⁰Kosodi ketwar, kijesaros Antiokia; kotukokis ekodet kere, koinakis ebalua.

³¹Nakesiomiata, kiyalamikinos kanuka aitalakario kaŋin.

³² Yuda ka Sila da, lukeraas inabin, kitalakasi iinacan kakiro nuipu, kitogogoŋo kes.

³³Kosalakis ŋina adaun apak, kotwara kes iinacan aboŋor kainapakin mama ejaas lukiyakuunete. [

³⁴Konye kitojok Sila asalakin nen.]

³⁵Konye kosalakis Paul ka Baranaba Antiokia, isisianakinete ka alimonokin akirot naka Ejakait, nepepe ka icetuŋa da luipu.

³⁶ Ketuboros apaarasia adis, kotema Paul Baranaba atiar, “Aso kaboŋosi kwana kaanyanasi iinacan kaŋolire nekiilimonokinit akirot naka Ejakait, kaanyutu kwape ejaatar.”

³⁷ Kokoto Baranaba ayaŋaar Yokana loenyaritai Marako aupar kakes.

³⁸ Konye mam kitojokit Paul ayaŋaar ŋol lokinyeini kes koPampulia, komam elosete kakes aswam.

³⁹ Kosodi kojau epeget loepol kidiŋikec kiton neatiakatar, koyaŋa Baranaba Marako kikwaŋaros Kupuro,

⁴⁰konye Paul koseu Sila konyou, ilipakinete iinacan tetere einakinio asianut naka Ejakait.

⁴¹Kitor Suria ka Kilikia, itogogoŋi ikanisan.