Read Ebaibuli 1961 Aswamisio 19 Bible Online

Aswamisio 19 - Ebaibuli 1961 bible

Aswamisio 19

¹Nakejaar Apolo Korinto, kitor Paul akwap naimukurur, kodol Epeso. Kodum ikesisiak ice kaŋina.

² Kiŋit kes atiar, “Ipotu kereka ko dumut Emoyo Lokalaunan nakiyuuniata?” Kobalas ebe, “Mam, karaida aiirarit ebe ejai Emoyo Lokalaunan.”

³Kotema atiar, “Aso kibatisatai yes aibatis anyoin?” Kotemasi atiar, “Aibatis naka Yokana.”

⁴ Kotema Paul atiar, “Abu Yokana kibatis kaibatis naka aitoronikin, elimonokin ituŋa aiyuun loebunit kokaukeŋ ŋes Yesu.”

⁵Nakiirariata ŋun, kibatisaunos kokiror loka Ejakait Yesu.

⁶ Kosodi nakedaunia Paul aidokokin kes akekanin, kodoik kes Emoyo Lokalaunan; kinerata kaŋajepa, ka aidwar.

⁷Keraas kere bala ituŋa itomon ka luarei.

⁸Koloma Paul atukos, kinerenena katitiŋ ilapio iuni, epesi akiro kituŋa kiyamuyam kes toma akiro nuka ajakanut naka Edeke.

⁹ Konye ice lueninik kogiroto aiyuun, kinerasi nueroko nuka Erot kakonyen nuka ekodet, kosodi kinyek kes, kogita ikesisiak, kopegenenas ka ituŋa ŋinipaaran kosomero loka Turano.

¹⁰Kiyatanakinos akiro ŋun apak naka ikar iarei; kiton lukiboiete kere koAsia aiirar akirot naka Ejakait, Iyudayan ka Iyonanin da.

¹¹ Kiswama Edeke nukaumokin nuedeparito kakanin nuka Paul,

¹² kiton ayaŋaar iitabalan ka inapen kakuanake mama ejaas ikadekak, konyout adekesia kamakec, kolomut da ajokin nueroko kamakec.

¹³ Konye koŋasikinos ice koYudayan lukerimok, ikereŋeak ajokin, alimor ekiror loka Yesu mama ejaas lukejaas ajokin nueroko, kobalas ebe, “Kecorak yes kanuka Yesu loelimonokini Paul.”

¹⁴Kosodi kojaas idwe ikanykaarei luka Sekeba esasedoti lopeti loYudayat, lukiswamaenenete ŋun.

¹⁵ Konye Koboŋok kes ajokit naerono ebe, “Ajeni Yesu, ajeni Paul da; konye yes lukaŋai?”

¹⁶Kosomakin kes etuŋanan lokejai ajokit naerono, kiteleka kes kere, kipiko, tape ekerete kotogo kaŋol imujalalas, imusuŋitai.

¹⁷ Kojenut ŋun kere Iyudayan ka Iyonanin lukiboiete ko Epeso; kirum akurian kes kere; kitopolooroi da ekiror loka Ejakait Yesu.

¹⁸Kopotu luipu da kaŋul luiyuunito, kolimosi, kilepilepata da akeceswamisio.

¹⁹Ka ituŋa luipu kaŋul lukiswamaete nukamurwonut, kotukonokis ikeceitabon, kicweata kakonyen nuka ituŋa kere; kimarata etiaikec, kodumut ebe edolit atutubeta alukumin akaisakany nuka epuesa.

²⁰ Kwaŋin kopoloor akirot naka Ejakait, kitelekarit kagogoŋ.

²¹ Kedaunos akiro ŋun kolosik Paul Komoyo aitor Makedonia ka Akaia alosit Yerusalem, kobala ebe, “Kadau ajaut ŋina, kebusakinit aanyun Rome da.”

²² Kiyakia iarei kokejaanakinakake alosit Makedonia, kes Timoteo ka Erasito, kosalak ŋes elopet Asia apak.

²³ Kapak kaŋin kodakun aigurun namere naedit kanuka Erot.

²⁴ Naarai etuŋanan ekekiror Demeterio ekatatan epuesa, lokesubenenei abilai nuka epuesa nuka Aratemi, lokedumanakini ikeswamak luepiriaka ameda naepol;

²⁵kotukonoki ŋul nepepe ka ikeswamak ice luka aswam kaŋin, kobala kes ebe, “Ikatuŋa, ijenete yesi ebe kidumuni abarawok kotoma aswam kana.

²⁶ Bobo da ianyut, iirarete da ebe, mere koEpeso bon, konye eapie toma Asia kere, ejodijod Paul lo ituŋa luipu ka aijulakin akeceomisio, ebala ebe ŋulluiswamao kakanin mam eraas idekesio:

²⁷mere atemar ebe aswamuwok na bon emwaŋio, konye eyekalu da loka adeke nakapolon Aratemi mam imario araut ibore, ebuni aitisilio kapolouke, ŋin naemaete luko Asia kere ka akwapisinei da.”

²⁸Nakiirariata ŋun konyunyurikinos, kiworoto kobalas ebe, “Aratemi naka Ipeson ŋes nakapolon!”

²⁹ Kilelebun ere ecelet; komotaros ketau ediopet alomar alaro naka aboliasio, kedaut aikamun Gaio ka Arisitariko, ituŋa luko Makedonia, lukeupas ka Paul kalositeke.

³⁰Kokoto Paul alomar otuŋa, kisimika ikesisiak.

³¹Ikapolok ice da luka Asia, lukeraas ikepapero kiyakiasi mamakeŋ, kiŋaiŋaata ŋes kinyek alomar alaro naka aboliasio,

³²Aso kiworoto ice ace, ka ice da ace; naarai kitolutoluno ekodet; naarai luipu kakesi mam kejenete akirot naeinakinit kes atukokin.

³³Kolemut Alegesanda kotoma okodet, lokisibwoete Iyudayan kakonyen nuka ituŋa. Kokwetu Alegesanda kakanike, kokoto apurokin kakonyen nuka ituŋa.

³⁴Konye nakejenuniata ebe erai ŋesi Eyudayat, kiworoto kere keporoto ediopet bala apak naka isawan iarei ebe, “Aratemi naka Ipeson ŋes nakapolon!”

³⁵Nakedaunia ekewadikan loka ere aisiyamikin ekodet, kobala ebe, “Okwe ikatuŋa luko Epeso, iŋai bo ituŋanan yenimam ejeni ebe, erai ere loka Epeso ekedaran loka eyekalu loka Aratemi nakapolon, ka loka aput nakedouni kokuju?

³⁶Aso naarai mam epedorio aiŋer akiro ŋun, ibusakinit yes aiyamakin, komam isunyito akirot,

³⁷Naarai iyaut ituŋa lu ne lumam ekokoto iboro luka eyekalu, karaida ainyanakin adekewok.

³⁸Aso arai ejaas Demeterio ka ikeswamak ice ipaupake akiro nuiwosaete kituŋanan, ejai airabet, ejaas da ikayaitok; kiwosakinos.

³⁹Konye arai imootos acekirot, itemonokinio katukot naduc.

⁴⁰Naarai kija toma aronis aiwosao kanuka ecelet loka lolo, loemamei akirot; ido kotoma akirot kana mam kipedori aitojok atukokin na.”

⁴¹Kedau einer ŋun kotwar atukot.