Read Ebaibuli 1961 Aswamisio 20 Bible Online

Aswamisio 20 - Ebaibuli 1961 bible

Aswamisio 20

¹Kinapakin ailoŋiloŋa, konyarau Paul ikesisiak, kicor, kotwar kes, konyou kolot Makedonia,

²Nakedaunia aitor atutubeta ŋun, ka aitalakar kakiro nuipu, kodol Yonan.

³Kosalak nen ilapio iuni, ido nakineruniata Iyudayan asurokin ŋes edwar aikwaŋar alosit Suria, kopeleik aboŋor korot loko Makedonia.

⁴ Kouparos kituŋa kalu, Sopater loka Beroea, okoku loka Puro, ka Arisitariko ka Sekundo Isesalonikan; ka Gaio loka Derube, ka Timoteo; ka Tukiko ka Toropimo luko Asia.

⁵ Konye keliŋara ituŋa ŋul, kidareut sio koTiroa,

⁶kekwaŋaros isio anyoun koPilipi akaulo kapaarasia nuka imugatin lumam itubuunitoi, kadolokis kes koTiroa kalosit naka apaarasia akany; kasalakis nen apaarasia akanykaarei.

⁷ Kapaaran nasodit nakasabato, nakiriamunor tetere kibili emugati, kiner Paul kakes, apele alosit apaaran naatupakini; kiyatak einerike kiton kidiŋebai.

⁸Kojaas atalai nuipu kagola nakokuju kama kitukokina.

⁹Iboie etelepat ekekiror Eutuko kadirisa; kilurutu noi ajo; kiyatakinit Paul noi alimonokin, kipikosi ajo, kibiror kwap kagola nakiwuniet, kodakunai etwanit.

¹⁰ Konye kodoka Paul kokukum kamake, kotun, kobala ebe, “Sirikiyaloŋoŋoto; naarai eroko ŋesi ejari.”

¹¹Kodoka bobo kuju, kobil emugati, konyam, kiyatak einer kakes apak naepol, kiton tupuruc, kosodi kolot.

¹²Koyaut etelepat ejari, kolakara alakara naepol.

¹³Konye sio kaliŋa alosit ataker, kekwaŋaros kiton Assos, kamunos aitodokun Paul ataker kaŋina; naarai kitemokinit ŋesi kwaŋin, komuno ŋes; aitorit neeonit,

¹⁴Nakiriamunor Assos, ketodokutu ŋes ataker, kasodete kadoloto Mitulene,

¹⁵Kekwaŋaros anyoun kaŋina kadolo apaaran nakiareit aibois naetereikina ka Kios; apaaran da naatupakini kabwoutu koSamos, ka naatupakini ŋin kadoloto Mileto.

¹⁶ Naarai abu Paul kitojokite ainac Epeso tetere mam itumor kotoma Asia; naarai kemarani arai epedori adolore Yerusalem eroko apaaran naka Pentekote edolo.

¹⁷Nakejaar Mileto kiyakik anyaraun imakio luka ekanisa koEpeso.

¹⁸ Nakedolunioto mamakeŋ, kotema kes atiar, “Ijenete yesi kwape keboienenoo kayes apak kere ageun kapaaran kanasodit naadolio Asia,

¹⁹ ejaanakinenei Ejakait kaitasono kere, ka akiyo, ka acoduneta nukadoikinete kobotei luka Iyudayan,

²⁰mam abu kenac alimonokin yes akirot kere naeyaun ajokis, kesisianakinenei yes kaitebeikin, ido kaŋolitog,

²¹etejenuni lyudayan ka Iyonanin da nuka aitoronikin mama ejai Edeke ka aiyuun da Ejakaitiwok Yesu Kristo.

²² Aso kwana, koany, alosi Yerusalem, kaenitai komoyo, mam ajeni akiro nukadoikinete kaŋina,

²³ dimarai ketejenuni Emoyo Lokalaunan kaŋolire ebe kedareto aeneta ka areio.

²⁴ Konye mam apodo akaijar araun naketiai kamakaŋ, dimikito kaŋetak akaigerosit ka aijaanakin nakadumuni kama ejai Ejakait Yesu, aitejenun Akiro Nukajokak nuka asianut naka Edeke.

²⁵Aso kwana, koany, ajeni eoŋ ebe yes kere lukerimorit alimonokin ajakanut naka Edeke mam bobo ianyunete akakonyen.

²⁶ Kanuka ŋun ketejenuni yes lolo ebe mam akusiwokot kabeikinete eoŋ,

²⁷naarai mam abu kenac alimonokin yes ainerun kere naka Edeke.

²⁸ Kocoito yesi, ka esipan da kere loadakaki Emoyo Lokalaunan yes araut ikaanyanarak, tetere icokiete ekanisa loka Edeke, lokikurauni kakeokot elopet.

²⁹ Ajeni ebe kanyou eoŋ epote ipeen luededeŋ mamakus, mam itimete esipan;

³⁰ bobo da enyounete kotomakus ikiliok luineras nuitapaarete airiar ikesisiak atupar kes.

³¹ Asokokwenyete, kiitunitos ebe ikar iuni mam abu kenyek aicor ŋinituŋanan paaran ka kuar kakiyo.

³² Kwana da ketitiŋ yes Edeke, ka akirot naka akesianut naepedori aiduk yes ka ainakin da airumet nepepe kaŋul kere luitalaunitai.

³³ Mam abu kemiela epuesa karaida esabu karaida inapen luka ituŋanan.

³⁴ Ijenete yesi ebe akakanin nu apotu kiswamata nukeipudika, ka loka ŋul kalukija nepepe keoŋ.

³⁵Kotoma akiro kere ketodik yes ebe kaitaaritoi naikoni nen ibusakinit aiŋarakin luekalanyaka, kaiitunite akiro nuka Ejakait Yesu, nukebala ebe, ‘Ainakin erai nakarereŋ adepar adumun.’ ”

³⁶ Nakedaunia einer ŋun kokukokin kilip nepepe kakes kere.

³⁷ Komonyata noi kere, kotunata Paul konuata.

³⁸ Ekadakinitos noi kanuka akirot ŋin nakinera ebe mam bobo eanyunete akekonyen. Kinyamakis do kiton ataker.