Read Ebaibuli 1961 Aswamisio 23 Bible Online

Aswamisio 23 - Ebaibuli 1961 bible

Aswamisio 23

¹ Kikesite Paul akonye kaurianet, kobala ebe, “Ikiliok iinacan, abu kajar kakonyen nuka Edeke ketau kaloejok kiton lolo.”

² Kicorak Anania losasedoti lopeti lukebwoete aapu kaŋes aibap ŋes akeituk.

³ Kosodi Paul atemar ŋes atiar, “Kibapi jo Edeke, ijo arwatat naiworiworitai kakwanis! Iboikin kereka ijo atubokin eoŋ kwape ejaatar ikisila, kwabo icorak eoŋ aibapio aitegelikin ikisila?”

⁴Kobalas lukebwoete aapu kaŋes ebe, “Ijo ba, imoromoroi kereka esasedoti lopeti loka Edeke?”

⁵ Kotema Paul atiar, “Iinacan, mam ajeni ebe erai esasedoti lopeti; naarai iwadikatai ebe, ‘Sirikiner erono mama ejai ekayaiton loka ikonituŋa.’ ”

⁶ Konye nakejenunia Paul ebe atutubet adiopet kerai naka Isadukayon, ka nace da naka Iparisayon, kiworo kaurianet ebe, “Ikiliok iinacan, arai eoŋ Eparisayot, okoku loka Iparisayon; katubokinitai eoŋ kanuka amun naka ajarun naka ikatwak.”

⁷Nakedaunia einer ŋun, kojau epeget kidiŋ Iparisayon ka Isadukayon; kotiaka atukot.

⁸ Naarai ebalas Isadukayon ebe emamei ajarun, karaida emalaika, karaida emoyo; konye ecamunito Iparisayon ŋun kere.

⁹ Kojau ecelet loepol; kobwaata ikewadikak ice owai loka Iparisayon, koutasi kobalas ebe, “Mam sio kidumuni adiokirot naerono kotuŋanan kalo. Arai bo emoyo inera kaŋes, arai bo emalaika?”

¹⁰Kiyatakin ecelet apoloor, kokurianar ekapolon ebe enyilinyiliete kesi Paul, kicorak iserikalei adokun ka alemun ŋes kagogoŋ kakaninikec, ainyakar da ore loka iserikalei.

¹¹ Kakuare kaŋin kobwo Ejakait aapu kaŋes, kobala ebe, “Kotitiŋior, naarai kwape itejenunia nukaŋ koYerusalem, kwape kwaŋin ibusakinit ijo aitejenun ko Rome da.”

¹²Nakiwala akwap, kitutuko Iyudayan, koenikinos kaiyaposit ebe mam enyamete karaida aimat kiton neaariata Paul.

¹³Lukiyapoikinete kwaŋin emwaasi ituŋa akaisaoŋon ka adepar da.

¹⁴ Koloto kesi mama ejaas isasedotin lupeti ka imakio, kotemasi atiar, “Kienikin noi kaiyaposit ebe mam kiiri ibore kiton nekiaria Paul.

¹⁵Aso do kwana, kikwenyasi yesi ka aurianet ekapolon ayaŋaun Paul mama ijaas, bala ikotosi ajenun kotenan akekiro, Kikapakina isio da aiar ŋes eriŋa eekuna die.”

¹⁶Kiira ecen loka Paul nuka aperunikec; kolot koloma ore loka iserikalei, kolimok Paul.

¹⁷Konyarau Paul ekapolokiton ediopet kotemaatiar, “Koyaŋa etelepat lo mama ejai ekapolon; naarai ejai akirot naelimokini ŋes.”

¹⁸Kanuka ŋun koyaŋa ŋes, kitoloma neejai ekapolon, kobala ebe, “Abu Paul ŋol eenat kanyara eoŋ, kelip aitolomun etelepat lo mamakon, naarai ejai akirot naineras kajo.”

¹⁹Kitiŋ ekapolon akekan kogitaros kaŋes, kiŋit kaiyeiyea ebe, “Anyoin akirot naikoto ijo alimokin eoŋ?”

²⁰Kobala ebe, “Enerut Iyudayan aiŋitun jo aitodokar Paul moi toma aurianet, bala ekotos aiŋitiŋit kotenan akekiro.

²¹Aso siri jo kicam; naarai eperunito ŋes ituŋa luedeparito akaisaoŋon kakesi, luaenikinos kaiyaposit ebe mam enyamete karaida aimat kiton neaariata ŋes; aso kwana ekapakina kesi, idaretos akoniisumunet.”

²²Kosodi kotwar ekapolon etelepat, kicoro ebe, “Sirikilimok idiotuŋanan ebe kikwenyarit eoŋ.”

²³Kosodi konyarau ikapolokitok iarei, kobala ebe, “Kitemokis iserikalei akwat aarei, ka ikebwanenok akaisakanykaarei, ka lukakwaras da akwat aarei, alosit kiton Kaisarea, osawa lokiwuniet loka akuar.

²⁴Kitemokis itiaŋ lukisibwaneno Paul da, koyaŋaasi ŋes mama ejai Pelikis ekayaiton eiyara.”

²⁵Kiwadik ebalua kepone kalota:

²⁶ “Kulaudio Lusia mama ejai ekayaiton lokaibuses Pelikis, ayogan.

²⁷ Ikamunito Iyudayan etuŋanan lo, aapikinito aiar ŋes, kabunok kes nepepe ka iserikalei, kayu, kajenu ebe erai Eromayot.

²⁸ Kakoto ajenun akirot naeosatotor, ketodoka aurianetekec.

²⁹ Kadum ebe kiwosatai kanuka aiŋiseta nuka ikisilakec, kwabo mam kiwosatai adiokirot kere naibusakinitor aaria karaida aenia.

³⁰ Kosodi nakapukokinere ebe ejaun ebotet loebilakinete ekiliokit lo, atipet kejuku mamakon, kecoraki da lukewosatok einer akecekiro kakonyenekon.”

³¹Kosodete koyaŋaasi iserikalei Paul kwape kicorakinitere kinyamasi kuare kiton Antipaturi.

³²Tupuruc do koboŋosi kesi ore loka iserikalei kinyeis ikebwanenok aiyatakin alosit kaŋes,

³³Kedolo ŋul Kaisarea, ka ainakin ekayairon ebalua, kisibwaata da Paul kakonyeneke.

³⁴ Ŋes da nakedaunia asoman, kiŋit ebe, “Erai ŋesi loko buku ali?” Nakejenunia ebe erai loko Kilikia,

³⁵kotema atiar, “Keirari jo naeponiata lukiwosato.” Kicorak aidario kotogo lokapolou loka Kerode.