Read Ebaibuli 1961 Aswamisio 25 Bible Online

Aswamisio 25 - Ebaibuli 1961 bible

Aswamisio 25

¹Kosodi nakedolio Pesito obuku, ketuboros apaarasia auni kodoka Yerusalem anyoun koKaisarea.

² Kikujokis ŋes isasedotin lupeti ka ikeŋarenok luka Iyudayan nuka Paul, kiŋaiŋaata ŋes,

³ kilipata kasianutuke ayaun Paul Yerusalem, tetere eperunete ka aarakin orot,

⁴Konye Koboŋok Pesito ebe idario Paul koKaisarea, eapie ŋes da alosit ŋina.

⁵Kobala ebe, “Aso ŋulluejai apedor kayesi kauparos kaeoŋ, arai kito ejai akirot naerono kotuŋanan kaŋol, kiwosata do.”

⁶Nakesalitor kakes apaarasia numam edeparito akanykauni arai atomon, kijesar Kaisarea; apaaran naetupakini kiboikin oicoloŋ loka etube, kicorak Paul ayaunio.

⁷Nakedolunio Paul, kobwaata Iyudayan lukijesunos koYerusalem airimor ŋes, kiwosata ŋes akiro nuipu nuelaŋir, numam apedorete aitogogoŋ,

⁸Kobala Paul eiyar ebe, “Mam eoŋ adiakit akirot karaida kokisila luka Iyudayan, karaida oyekalu, karaida mama ejai Kaisar.”

⁹ Konye Pesito kekoto aitojokio kama ka Iyudayan, Koboŋok Paul ebe, “Ikoto kereka ijo alosit Yerusalem atubokinio kaŋina kakonyeneka kakiro kanu?”

¹⁰Konye kobala Paul ebe, “Abwoi eoŋ kane koiŋaren keicoloŋ loka etube loka Kaisar, nekebusakinitor atubokinio; mam adiakit akirot koYudayan, kwape ijenia ijo kotenan.

¹¹Aso arai adiakit, arai eswamat akirot naibusakinitor atwania, mam aŋeri atwanare; konye arai emamei abeit kanukewosatotor, emamei yenepedori aijaikin eoŋ akaninikec. Eyatakinit mama ejai Kaisar.”

¹²Kosodi nakedaunia Pesito einer kituŋa luka aurianet Koboŋok ebe, “Iyatakinit ijo mama ejai Kaisar; ilosi do mama ejai Kaisar.”

¹³Ketuboros apaarasia, kodol Agiripa ekabaka, ka Berenike Kaisarea ayogan Pesito.

¹⁴ Nakesalitotor nen apaarasia nuipu, kitatamik Pesito ekabaka akiro nuka Paul ebe, “Ejai ne etuŋanan lokinyeini Pelikis eenitai;

¹⁵lokekujokinete isasedotin lupeti ka imakio luka Iyudayan akiroke nakajaar Yerusalem, kokotosi ŋes atubokinio.

¹⁶Abu kaboŋok kes ebe mam erai epone loka Iromayon aijaikin etuŋanan kere eroko yeniwosatai etereikina ka luiwosato, ka adumun apak naka aiyar kotoma kanuiwosatai.

¹⁷Aso naketukonokinotor ne, mam abu keyap, konye apaaran naatupakini keboikin oicoloŋ loka etube, kecorak etuŋanan ŋol ayaunio.

¹⁸Kosodi nakebwoiata lukiwosato ŋes mam eyauna akirot naerono kwape abu kaomitor;

¹⁹ konye ejaas aiŋiseta ace nuka edinikec, ido nuka etuŋanan ece Yesu loabu kotwana, konye loitogogoŋit Paul ebe ejari.

²⁰Kaoliki eoŋ aiŋic aiŋiseta ŋun, abu keŋit arai ekoto alosit Yerusalem atubokinio kaŋina kakiro kaŋun.

²¹Konye Paul kiyatak aidario tetere etubokini Kaisar, kecorak ŋes aidario kiton neejukaria ŋes mama ejai Kaisar.”

²² Kotema Agiripa Pesito atiar, “Eoŋ da elopet abu kakoto apupun etuŋanan ŋol.” Kobala ebe, “Ipupuni ŋes moi.”

²³ Kosodi kapaaran naatupakini kobu Agiripa nepepe ka Berenike kaibuses naepol, kolomasi aibois naka aipup akiro nepepe ka ikapolok luka iserikalei ka ikiliok luejenikina lukore. Kicorak Pesito Paul ayaunio.

²⁴ Kotema Pesito atiar, “Ekabaka Agiripa, ka yes kere luijaas ne nepepe kasio, ianyut etuŋanan lo lokelipito eoŋ Iyudayan kere luko Yerusalem ka ne da, kiworoete ebe mam bobo ebusakinit ŋes aijar.

²⁵Konye abu kaany ebe mam iswamat akirot naibusakinitor atwanare; ŋes da elopet iyatakinit mama ejai Kaisar, abu kaomite aijukar.

²⁶Eoŋ da emamei akirot nakabeit naewadikakini ejakait. Kanuka ŋun ayau ŋes ne akonyenekus, aitelekarit akonyenekon, wu Ekabaka Agiripa, tetere kidau aiŋitiŋit kadum akirot naewadikai.

²⁷Naarai aomit eoŋ ebe mam ejok aijukar eenat komam itodiara nuiwosatere ŋes.”