Read Ebaibuli 1961 Aswamisio 26 Bible Online

Aswamisio 26 - Ebaibuli 1961 bible

Aswamisio 26

¹Kobala Agiripa Paul ebe, “Kinup jo einer kanukon.” Kosodi korio Paul akekan, koiyar, kobala ebe:

²“Wu Ekabaka Agiripa, kekemer naarai kaiyar lolokakonyenekon kanuka akiro kere nukewosatotor Iyudayan,

³aitelekarit naarai ijeni ijo iponesio kere ka aiŋiseta da kere nuejaas oYudayan. Kanuka ŋun kemaimait kopupok eoŋ katitiŋikinit.

⁴Naarai ejenete Iyudayan kere ekajautene ameun keitelepane, lokejai kageunet kotoma atekereka, ido ko Yerusalem da.

⁵ Apotu kajenut ameun apeŋo, arai ekotosi aitejenun, ebe abu karai Eparisayot lokorioŋet loetokit noi kotoma odinikosi.

⁶ Kwana da abwoi kane atubokinio kanuka amun aisumunet nakisumunit Edeke lukapapaakosi,

⁷ naemunosi atekerinikosi atomon ka nuarei adolokin, emaenenete Edeke kainyikokinit paaran ka kuare da.

⁸Kanukinyo eomitere kamakus araut akirot namam ecamuna ebe itajari Edeke ikatwak?

⁹ “Abeit abu eoŋ elopet kaomite ebe kebusakinit aswam nuipu airebokin ekiror loka Yesu Enasarayot.

¹⁰Abu keswama ŋun ko Yerusalem; abu kaen ice kalukalaunak aidaris, kadau ainakinio apedor kaneejaas isasedotin lupeti, ido da abu kekeik akan luaario.

¹¹Ido irwan ipu abu keticanenenei kes katukosia kere, ketiŋaikinite ainyanakin Edeke; kareite kes kaibworit kiton oreria lukokiŋa da.

¹²“Kasodi alosit Damasiko kanuka aswam kaŋin, kija kapedor ka anupakinio naka isasedotin lupeti.

¹³Kosodi kidiŋ paaran, wu ekabaka, abu kaany aica nakebuni kokuju, nakedeparit ailiya naka akoloŋ, kacaikin eoŋ ka ŋul lukija nenipe keoŋ.

¹⁴Kebirokinos isio kere kwap, keira eporoto lokinera keoŋ kaŋajep naka Aburanian ebe, ‘Saul, Saul, kanukinyo kireitor eoŋ? Kitionikinit ijo aipet iketetin.’

¹⁵Kabala ebe, ‘Iŋai bo ijo, Ejakait?’ Katema eoŋ Ejakait atiar, ‘Eoŋ Yesu loireit ijo.

¹⁶ Konye konyou, kobwo kakejekon; naarai ketakanikin jo kanuka nu, adakakin jo araun ekejaanakinan ka ekajenan loka akiro nuibu koanyunia eoŋ, ido kaŋun nuketakanikinor,

¹⁷ kayuuni jo kama kituŋakon ka Imo da-lukeyakiari mamakec,

¹⁸ aitwekenyun akecekonye, tetere ibelokinos ainyein amuton kesesenata aica, ainyein da apedor naka Satan kosesenata Edeke, kosodete adumun aisionio adiakanareta, ka airumet kokidiŋ; kaŋul kaluitalaunitai kanuka aiyuun naejai tomakaŋ.’

¹⁹ “Kanuka ŋun, wu Ekabaka Agiripa, mam abu kepaliik aitapoet nakakuj,

²⁰ konye abu kageu alimonokin luko Damasiko, kosodi koYerusalem, kotoma akwap kere da naka Iyudayan, ka Imo da, ebe kitoronikinos, kibelokinos mama ejai Edeke, iswamaete aswamisio nuibusakinito aitoronikin.

²¹ Kanuka ŋun ŋes kekamuniata Iyudayan kotoma oyekalu, katamakis aiar da.

²² Aso kiton lolo adum aisigalikinio naebuni kama ejai Edeke, abwoi aitejenun ludidik ka lukapolok da, kwabo mam eneri akirot dimarai ŋun nukinerasi Musa ka inabin ebe ejaunete:

²³ ebe ibusakinit Kristo aiticanio, ido da korau ŋesi losodit ajarun kokatwak, elimonokini aica mama ejaas ituŋakosi ka Imo da.”

²⁴Kosodi nakeiyaror kwaŋin, kotema Pesito keporoto loepol atiar, “Kikerepiki cama ijo, Paul, kijulaki jo aisisiakon naepol.”

²⁵Konye kobala Paul ebe, “Mam kekerepikinit, wu Pesito lokaibuses, dimarai enera akiro nukabeit ka nukapirianut da obe.

²⁶ Naarai ejeni ekabaka nuka akiro kaŋun, eoŋ da enera kaŋes katitiŋ; naarai etogogoŋit ebe emamei akirot kotoma kaŋun naimunonikinitai ŋes, naarai mam nu eswamas kagor.

²⁷Ekabaka Agiripa, iyuunit tope ijo inabin? Ajeni ebe iyuunit.”

²⁸ Kotema Agiripa Paul atiar, “Kanaesupaana ikoto aituluor eoŋ da Ekristayot!”

²⁹Koboŋok Paul ebe, “Arai kanaesupaana, arai kanaepol elipi Edeke mere ijo bon, konye kaŋul da kere lukapupete lolo, koraut kwape keoŋ-dimarai aeneta nu.”

³⁰Kosodi kobwo ekabaka, ka ekayaiton ka Berenike, ka ŋul lukiboiete kakes;

³¹napenyounete, kineranakinos ebe, “Mam etuŋanan lo iswamat akirot naibusakinitor atwanare karaida aenio.”

³² Kobala Agiripa Pesito ebe, “Arai kedim etuŋanan ŋol aiyatakinit mama ejai Kaisar ti kelacakin.”