Read Ebaibuli 1961 Aswamisio 27 Bible Online

Aswamisio 27 - Ebaibuli 1961 bible

Aswamisio 27

¹ Kosodi nakicorakinere sio aikwaŋar kiton Italia, kijaikis Paul ka ienan ice mama ejai ekapolokiton erioŋet loka Augusito, ekekiror Yulio.

² Kadokas ataker naka Aduramutio, nakekapakina alosit kiton oreria luka oitolima luka Asia, kekwaŋasi, kauparos ka Arisitariko Emakedoniat loko Sesalonika.

³ Apaaran naatupakini kadolo Sidon; kikonak Yulio Paul asianut, kocamak ŋes alosit mama ejaas ipaperoke tetere imukeo.

⁴Kanyoutu kanen kekwaŋaros kediata keririto Kupuro, naarai kemeunito ikwamin kakonyen.

⁵Ketoro aŋolol naka Kilikia ka Pampulia, kadolo Mura nako Lukia.

⁶Kanen kodum ekapolokiton ataker naka Alegesanderia idiai Italia, kadokikis ŋin,

⁷Kekwaŋaros motimot apaarasia nuipu, kadolo Kinido kationis, ido naarai kitikokinit ekwam, keririata Kurete katereikina Salumone,

⁸Ketoroto kationis aapu koitolima, kadolo aibois naenyaritai Odoketa Lukajokak naidunyas ka ere Lasea.

⁹ Kiilonya apaarasia, kojau aronis alosit naarai atuboros apaarasia nuka Ailuŋ, kidelu Paul,

¹⁰kobala kes ebe, “Lukipa, aanyunit eoŋ ebe ejaun amunaar ka atwaniar alosit na, mere iboro bon ka ataker, konye aijarawok da.”

¹¹Konye abu ekapolokiton kopupok ekekwaŋan lokapolon ka elopet ataker aitelekarit ŋun nuenera Paul.

¹²Ido da mam ebusakinit edoket ŋol aiboio apak naka aaterot, kidelut luipu kakesi aikwaŋar anyoun kanen, tetere elemuni edolete Poenike, edoket loka Kurete, loetereikina agolitome nakokide, ka egalakimak nakokide, kasala nen kapak naka aaterot.

¹³Kosodi napekusi ekwam lokeŋalakimak kiyamakina, koomitos ebe adumutu nukekotos, kibwosut edobo lokitapaikinet, kikwaŋaros aapu koitolima loka Kurete.

¹⁴Ketubor apak naedit kokut ekwam lokagogoŋ, loenyaritai Eurakulon ebuni kaneonit,

¹⁵Kokutar ataker, mam epedoro atereikina ekwam, kajalakisi kikutario,

¹⁶Kanen ketoro atipet ariri naka apujan naedit naenyaritai Kulauda, kekurautu ajen itaker.

¹⁷Kekiasi ŋes, kitwasamata aisigalikineta, koenikis kwap ataker; ido naarai kokuriaka aipok koSuritis, kijoliliosi iboro, kwaŋin kokutarai.

¹⁸Naarai kiiliilit ekwam, apaaran naatupakini kogeut acakar iboro aŋolol;

¹⁹apaaran nakiwuniet da kocakanasi kakaninikec ikulepek iboro luka ataker.

²⁰Mam atakani akoloŋ karaida aacer apaarasia nuipu, kokuta sio ekwam loededeŋ, kokau kodaun amun kere naka aitajario.

²¹Nakiboioto apak naapol mam enyamete, kosodi kobwo Paul kokidiŋikec, kotema atiar, “Lukipa, ti ebusakinit yes aiirar eoŋ, amamus aikwaŋar anyoun koKurete, adumun amunaar ka atwaniar na.

²²Aso kwana kecori yes kolakaros; naarai emameun yenetwaniari akeijar, dimarai ataker bon.

²³Naarai kakuar kana abu emalaika loka Edeke, loarai eoŋ lokeŋ, loamaenenei da, kobwo aapu keoŋ,

²⁴ kalimok eoŋ ebe, ‘Paul, sirikikurianar; ibusakinit ijo aibwo kakonyen nuka Kaisar; ido koany, kiinak Edeke ituŋa lu kere luiupatar.’

²⁵Aso, lukipa, kolakaros, naarai eyuunit eoŋ Edeke, ebe ejaun kwape kalimokinitere.

²⁶ Konye ibusakinit aipok kapujan.”

²⁷Kosodi kedol apaaran nakitomonet kaoŋon, nakikaleleor aŋolol naka Adiria, bala kidiŋ ebai koomitos ikekwaŋak ebe aapikis neeonit.

²⁸Kitemo, kodumut aidules akaisaarei; kiyatakis edit kitemo bobo, kodumut aidules atomon kakany.

²⁹Kokuriakaros aipok katiban, koosikis idoboi iwoŋon lukitapaikinet kokori, kilipa akwap aiwalar.

³⁰Nakekototor ikekwaŋak aisii kataker, apotu kijoliliosi itaker toma aŋolol, kijoseikinito bala eosikinete idoboi lukitapaikinet kokume.

³¹Kolimok Paul ekapolokiton ka iserikalei ebe, “Dimikito esalete ituŋa lu ataker, mam ipedorete aitajario.”

³²Kosodete iserikalei aitub aunoi nuka itaker, kojalakis kodo.

³³ Napiwalari, kiŋaiŋa Paul kes kere ainyam inyamat, kobala ebe, “Lolo ŋes apaaran nakitomonet kaoŋon aidaret kailuŋ, komam inyamete ibore.

³⁴ Aso keŋaiŋait, konyamata; naarai eraun mamakus aitajario, naarai emamei karaida etimat loka akwesikus loeoliori.”

³⁵ Kedau einer ŋun, kolem emugati, kimala Edeke kakonyenekec kere, kobil, kogeu ainyam.

³⁶Kosodete kolakaros kere, konyama kesi da.

³⁷Isio lukija toma ataker kimwa ituŋa kere akwat aarei ka akaisakanykaarei, ka lukanykape.

³⁸Kedaut aimonikin, kitebebenata ataker, kocakakis akima aŋolol.

³⁹Kiwala akwap, mam ejenuna akwap ŋin, dimarai apotu koanyutu agule naejai oitolima, kinerut aisukunyar ataker ŋina arai epedor.

⁴⁰Kocakasi idoboi lukitapaikinet, kinyeis kes kaŋolol, nepepe kaijarijar aunoi nueenis aiteteneta; kikeut egoe tetere ekutari ekwam kobeasi oitolima.

⁴¹Konye kodoloto neiriamata akailan kipok ataker kokwap, kiminaikin ekume, kosalak komam ijaŋijaŋa, konye kobila akailan ekori.

⁴²Kinerut iserikalei aiar ienan, kinye idiokakesi aiduor ka aisi;

⁴³konye kokoto ekapolokiton aituku Paul, kitikok kinyeis aswam nuenerunitotor. Kicorak luapedorete aidu kisiaut aibironokin aŋolol kobeata neeonit,

⁴⁴ lukesalete da kabaoi ka oboro ke luka ataker. Kwaŋin kokuasi ituŋa kere neeonit.