Read Ebaibuli 1961 Aswamisio 28 Bible Online

Aswamisio 28 - Ebaibuli 1961 bible

Aswamisio 28

¹Nakidaunia aiku, kajenut ebe apujan ŋin kenyaritai Melita.

² Kiswamakis sio ikulepek akwap asianut namam etapit, naarai apotu kinokokis akim, kisukunyikis sio, kanuka edou loketepi, ido kanuka aterot da.

³Nakeraraa Paul ekesit loka akito, kibwaik akim, kolom emusaga kanuka amwanis, kidolakin akanike.

⁴Nakeanyuniata ikulepek akwap emun edelideli kakanike, kotemanaros ebe, “Abeit erai etuŋanan lo ekaaran, Karaida kekuit kaŋolol, mam Etube isiikit ŋes aijar.”

⁵ Konye ŋes kilakilakak emun akim komam edumunit amusuŋut.

⁶ Kidarito, komunosi ŋes abuun arai aibiror atwanare eŋeso; konye kedaut aidar apak naepol koanyut ebe amamei adiomusuŋut kere, kibelokinos kotemasi ebe erai edeke.

⁷Aapu kaibois kaŋin kejaas amanat nuka ekapolon loka apujan, ekekiror Publio, kisukunyik ŋol sio ketau loka eipaperone apaarasia auni.

⁸Kosodi kanen kedeka papa loka Publio ekamidi ka aleporit aokot, koloma Paul mamakeŋ, kilip, kidokok ŋes akekanin, kitaŋaleu,

⁹Akaulo kaŋun, kopotu ice lukedekas kapujan kaŋin kitaŋaleunoi.

¹⁰Kosodete kitubusikis sio kainakineta nuipu; ido nakikwaŋaror kibwaikis iboro kere lukipuda ataker.

¹¹Akaulo naka ilapio iuni, kediata kataker naka Alegesanderia, nakesalakinit apujan apakio nuka aterot, aanyuneteke kerai Iinacan Imwatok,

¹²Kadolo Surakusa, kasalakis nen apaarasia auni.

¹³Anyoun kanen kerimosi kadolo Regium; ketubor apaaran adiopet kokut ekwam lokeŋalakimak, kadolo Puteoli apaaran nakiareit.

¹⁴Kanen kadumut iinacan, kiŋaiŋaata sio asalakin mamakec apaarasia akanykaarei. Kwaŋin kadolo do Rome.

¹⁵Kiirasi iinacan lukaŋina nukosi, kopotu kiton Agwelanaret naka Apius ka Iswamin Iuni aisiriam sio. Nakeanyunia Paul kes, kimal Edeke, kotitiŋior.

¹⁶ Nakilomaria Rome, kocamakinai Paul aiboi bon nepepe ka eserikalet loidari ŋes.

¹⁷ Akaulo kapaarasia auni konyarau lukeraas ikapolok koYudayan; kedaut atukokin, kotema kes atiar, “Iinacan, karaida mam eswamat aronis kotuŋa karaida koponesio luka lukapapaawok, aponi kejaikin ko Yerusalem toma akanin nuka Iromayon aenio.

¹⁸Kaadaut aiŋitanar, kakotosi alacakin, naarai kemamei adiokirot kamakaŋ naaret.

¹⁹ Konye nakepegatar Iyudayan, ketiŋaikin aiyatakin mama ejai Kaisar-kwabo amamei nakiwosaet ituŋa luka atekereka.

²⁰ Aso kanuka ŋun kanyarautu yes aponare aanyun eoŋ keiner keoŋ, naarai kanuka amun naka Isirael ŋes kaenitere korikot kalo.”

²¹Kotemasi kesi ŋes atiar, “Mam sio kidumunit ebalua anyoun koYerusalem kakirokon, ido emamei onace edio da loebunit ne loelimorit ka ainerit akirot naerono kanukon.

²² Konye kikoto apupun kamakon nuiwomit; naarai kanuka akiro nuka erioŋet kalo ejenikina kamakosi ebe ereitai noi kaŋinikibois.”

²³Kedaut aseikin ŋes apaaran kopotu luipu noi mamakeŋ togo lokiboio. Kitetemik kes ka aitejenun ameun tupuruc kiton eboŋ nuka ajakanut naka Edeke, ikujokini akiro nuka Yesu kanuka ikisila luka Musa ka inabin da.

²⁴Apotu ice kiyuut nuenerai, kwabo ice mam iyuuna.

²⁵Namam kecamanarotor, koloto do, kedau Paul einer akirot adiopet na ebe: “Abu Emoyo Lokalaunan kinera kotenan kama ka enabi Isaia mama ka lukapapaakus ebe:

²⁶ ‘Kolot mama ejaas ituŋa lu, kolimok kes ebe: Kiiranarete konye mam ijenunete, Koanyuŋunete da konye mam imisiikinete,

²⁷Abaŋaakata itauon luka ituŋa kalu, Ijikititas akiikec, Itumudakito akecekonyen, Kinyeis aanyun kakonyenekec, Ka aiirar kakeceki, Kojenut kotauonokec, Kibelokinos ketaŋaleu kes.’

²⁸ Aso kojenutu ebe ejukakin aitajario na naka Edeke Omo: iirarete kesi da.” [

²⁹Kedau einer ŋun koloto Iyudayan, epeganakinos noi.]

³⁰Kodau Paul ikar iarei kotogoke loketacanakini, kisukunyanakinenei kere lukeponenenete mamakeŋ,

³¹ elimonokini ajakanut naka Edeke, ido ka aisisianakin katitiŋ akiro nuka Ejakait Yesu Kristo, komam itikokinio.