Read Ebaibuli 1961 Aswamisio 3 Bible Online

Aswamisio 3 - Ebaibuli 1961 bible

Aswamisio 3

¹Kosodete edokarete Petero ka Yokana alosit oyekalu esawa loka ailip, ŋes lokikanyetekaoŋon.

² Ido adakitai etuŋanan Ioeŋwalit ameun kaurioke, lokibwaanakinio ŋinipaaran orute loka eyakalu loenyaritai Lokajokan, tetere ilipitoi nukaitim kama ejaas ituŋa luelomanarete toma oyekalu,

³Keanyu ŋol Petero ka Yokana elomarete oyekalu, kilip kes nukaitim.

⁴ Kosodi Petero kosesen ŋes nepepe ka Yokana, kotema atiar, “Kiteoi sio.”

⁵Koŋolia kes, komun adumun ibore kamakec.

⁶ Konye Petero kotema atiar, “Emamei eoŋ epuesa karaida esabu; konye yenikija keoŋ, kainakini ŋin, Kokiror loka Yesu Kristo loko Nasaret, kosakasak.”

⁷Kitiŋ akekan nakoteten, kitonyou ŋes: atipet kodomut akekeje ka ikekurunya agogoŋ.

⁸ Kodetu, kobwo, kogeu alosit; koloma oyekalu nepepe kakes, elosi, esomanari, iturit Edeke,

⁹Koanyut ituŋa kere elosi iturit Edeke.

¹⁰Kojenata ebe kerai ŋesi ŋopeŋol lokiboie ilipitoi nukaitim korute Lokajokan loka eyekalu: koumokis noi ŋin naedoikinit ŋes.

¹¹ Naperiŋa ŋesi itiŋit Petero ka Yokana, kokerut ituŋa kere mama ejaas toma alomaret naenyaritai naka Solomon, eumokinitos noi.

¹²Nakeanyunia Petero, Koboŋok ituŋa ebe, “Yes ikiliok luka Isirael, kanukinyo iwumokinitotor nu, kanukinyo da kiseseniata sio, bala Iem kitolosi ŋes kakosipedor arai bo kakosiyoŋit Edeke?

¹³ Edeke loka Aburaam, ka loka Isaak, ka loka Yakob, Edeke loka lukapapaawok etopoloo Eketelepat Yesu; loipotu yesi kijaikis, ka aiŋer kakonyen nuka Pilato, nakekotor aosikin ŋes.

¹⁴ Konye yes ipotu koŋeroto Lokalaunan Lokadoliton, kilipa ainakinio ekaaran,

¹⁵ koarata Ekapolon loka aijar; lokitajaruni Edeke kotoma okatwak, Kirai isio ikekajenak.

¹⁶Kanuka aiyuun ekekiror ainak ekekiror etuŋanan lo agogoŋ, loianyunete loijenete da; eebo, aiyuun ŋin naejai mamakeŋ ainak lo aŋaleu naeleleba kakonyenekus kere.

¹⁷ “Kwana da iinacan, ajeni ebe iswamato ŋun kanu mam ijeniata, kwape eswamaata ikayaitokokus da.

¹⁸ Konye akiro kwa nukelimonokini Edeke ameun apeŋo kaituk nuka inabin kere ebe ibusakinit Kristoke aiticanio, etodoliki kwaŋin.

¹⁹ Aso do kitoronikinos, kibelokinos, komwatarai akusidiakanareta, tetere edolete apakio nuka aisikwarunio nuepote kama ejai Ejakait,

²⁰Ido tetere ijukuni Kristo lokiseikinitai apeŋo, ŋes Yesu:

²¹loibusakinit akuj aisukunyikin aitodol apakio nuiteteunere akiro kere nukinerit Edeke kaituke nuka inabinoke lukalaunak ameun kageunet naka akwapin.

²² Naarai enerit teni Musa ebe, ‘Kitonyoikini yes Ejakait Edeke enabi kotoma oinacanakus loeputos keoŋ. Ŋol ŋes iirarete kotoma akiro kere nukilimokini yes.

²³ Kosodi kanen, ŋinituŋanan yenimam iirari enabi ŋol emudiario kotuŋa.’

²⁴Eebo, inabin kere ameun ka Samuel ka luketupakinete ŋes, kere lukineras, kelimonokinete nuka apaarasia kanu.

²⁵ Iraas yesi idwe luka inabin ka aitutuket ŋin nakitutuki Edeke kalukapapaakus, elimokini Aburaam ebe, ‘Isirereŋio atekerin kere nuka akwapin kotoma aurikon.’

²⁶ Kedau Edeke aitajarun eketelepat Yesu, kijuku ber mamakus, tetere kisirereŋi yes aibelokin ŋinidiopet kayesi kotoma nukaronokokus.”