Read Ebaibuli 1961 Aswamisio 9 Bible Online

Aswamisio 9 - Ebaibuli 1961 bible

Aswamisio 9

¹ Konye Saul, kiyatakinite nukaitukurian ka nukaiar ikesisiak luka Ejakait, kolot mama ejai losasedoti lopeti,

²kilip ibaluan lulosit Damasiko lukiwadikakinitai atukosia, tetere arai kedum ituŋa luka Erot kalo, ikiliok ka aŋor da, koeni ka ayaun Yerusalem.

³ Ido napelosi eapikinit Damasiko, atipet kimiliau aica nakebuni kokuju airiamar ŋes.

⁴Kibirokin kwap, kiira eporoto lokelimokini ŋes ebe, “Saul, Saul, kanukinyo kimanitor eoŋ?”

⁵ Kobala ebe, “Ijo iŋai, Ejakait?” Kotema ŋes atiar, “Eoŋ Yesu loimanit ijo.

⁶Konye konyou, koloma ore, kilimokinio nuibusakinit aswam.”

⁷Ituŋa da lukeupas kaŋes, kobwaata ililiŋete, iirarete eporoto, komam eanyunete etuŋanan,

⁸Konyou Saul kokwap; komudukaka akekonyen, komam eanyuni ibore; kitiŋata akan, korikosi ŋes kiton Damasiko,

⁹Kodau apaarasia auni komam eseseni, komam enyami da karaida aimat.

¹⁰ Kojai ekesisian Damasiko, ekekiror Anania, Kolimok Ejakait ŋol kaitapoet ebe, “Anania,” Kobala ebe, “Eoŋ lo, Ejakait.”

¹¹ Kotema Ejakait ŋes atiar, “Konyou, kolot orot loenyaritai Loitenara, kiŋitu kotogo loka Yuda etuŋanan loenyaritai Saul loko Taruso; naarai koany, ilipi,

¹²eanyunit da etuŋanan ekekiror Anania, elomari ka aidokokin ŋes akanin, tetere ekwenyuni bobo.”

¹³Konye Koboŋok Anania ebe, “Ejakait, abu keira akiro nuka etuŋanan kaŋol kotuŋa luipu, nukaronok nuipu nuabu kiswamak lukalaunakakon, koYerusalem;

¹⁴ kiton ne da ejai ŋes apolou naebuni kaneejaas lusasedotin lupeti ajen kere lukiwoneete ekonikiror.”

¹⁵ Konye kotema Ejakait ŋes atiar, “Kolot, naarai erai ŋol ibore yeneseunitai kamakaŋ adakar ekakiror kakonyen nuka atekerin ka ikabakan ka idwe luka Isirael;

¹⁶ naarai etodikini ŋes nuipu nuibusakinit ŋes aiticanio kanuka ekakiror.”

¹⁷Kolot do Anania koloma togo. Kidokok akanin, kotema atiar, “Onac Saul, keyaku Ejakait, ŋes Yesu lokiitakanikini jo korot lokibunio, tetere ikwenyuni bobo, kilelebi Emoyo Lokalaunan.”

¹⁸Atipet kodooto iboro kakonyeneke bala aabel, kokweny. Konyou kibatisai,

¹⁹konyam inyamat, kodum agogoŋ. Kiboioto apaarasia ace ka ikesisiak luajaas Damasiko.

²⁰Atipet kolimonok Yesu katukosia ebe, “Ŋes Okoku loka Edeke.”

²¹ Koumokis lukiirarete kere, kotemasi atiar, “Mere lo etuŋanan loabu komuna ŋul lukiwoneete ekiror ŋol koYerusalem? Ne da abu kobunite kanuka akirot kaŋin ajen kes ka ayaŋaar mama ejaas isasedotin lupeti.”

²² Konye kiyatak Saul agogoŋoor, kisitirira Iyudayan lukejaas Damasiko, itogogoŋit ebe erai ŋol Kristo.

²³ Kosodi ketuboros apaarasia nuipu, kinerut Iyudayan aiar ŋes,

²⁴ konye kojenu Saul ekecebotet. Kidarata korutei paaran ka kuare da tetere earete ŋes,

²⁵Konye koyaŋaasi ikekesisiak ŋes kuare, kitodokasi karwatat, kijoliliosi kobukit.

²⁶ Kosodi kedol ŋesi Yerusalem, abu kotam aimorikikin kikesisiak; kokuriakaros ŋes kere, naarai mam eyuunito ebe kerai ekesisian.

²⁷ Konye Baranaba koyaŋa ŋes, kitoloma mama ejaas ikiyakia, kitejen kes kwape keanyunia Ejakait koroto, ebe da kinera kaŋes, ido kwape kelimonokinia katitiŋ kokiror loka Yesu koDamasiko.

²⁸Kojau kakes kolomanari kolomununei da koYerusalem,

²⁹elimonokini katitiŋ kokiror loka Ejakait; inera ka apeg ka Iyonanin; konye komootos kesi aiar ŋes.

³⁰ Konye nakejenuniata iinacan, koyaŋaasi ŋes Kaisarea, kijukasi alosit Taruso.

³¹Kwaŋin kinapakina ekanisa anatar Yudaya kere ka Galilaya ka Samaria da, kodukoi; ido kiyatanakin kolosenenei kayoŋit Ejakait, ka aitalakar naka Emoyo Lokalaunan.

³²Kosodi kanen nakimanimania Petero owaitin kere, kijesar mama ejaas lukalaunak lukiboiete koLuda.

³³Kanen kodum etuŋanan ekekiror Aenea, eperi koitada adaun ikar ikanykauni, naarai kesenyit.

³⁴Kotema Petero ŋes atiar, “Aenea, kitaŋaleu jo Yesu Kristo; konyou, kopet ekoniitada.” Atipet konyou.

³⁵Koanyutu ŋes ituŋa kere lukiboiete koLuda, ka Saron, kibelokinos mama ejai Ejakait.

³⁶Kojai akesisian koYopa, ekekiror Tabita, apolouke ebe Dorokas arai Amiam. Eleleba aberu ŋin aswamisio nuejok ka nukaitim nuakorenenei.

³⁷Kosodi kanen kapaarasia kaŋun kodekakin, kotwana; nakedauniata ailoŋ, kiperikis agola nakokuju.

³⁸Kosodi kanueapiatar Luda ka Yopa, kiirarito ikesisiak ebe ejai Petero ŋina, kiyakiasi ituŋa iarei mamakeŋ, kiŋaiŋaata ebe, “Sirikiyap abunore mamakosi.”

³⁹Konyou do Petero kouparos kakes. Nakedolio, koyaŋaasi agola nakokuju. Kobwaata apuserun kere aapu kaŋes emonyete, ka aitodikin ikootin ka inapen lukedonyenenei Dorokas apak nakejaar kakes.

⁴⁰ Konye kitoloma Petero kes kere kiŋa, kokukokin, kilip; kedau, kibelokin neejai akuan, kotema atiar, “Tabita, konyou.” Kokwenyu ŋesi; nakeanyunia Petero, konyou kiboikin.

⁴¹ Koinak ŋes akekan kitonyou; kosodi konyarau lukalaunak ka apuserun, kitodia ŋes ejari.

⁴²Kojenunai kore kere loko Yopa, kiyuutu da ituŋa luipu Ejakait.

⁴³ Kosodi kosalak Petero Yopa apaarasia nuipu togo loka etuŋanan ekekiror Simon, ekekisikisan imukulen.