Read Ebaibuli 1961 Iromayon 13 Bible Online

Iromayon 13 - Ebaibuli 1961 bible

Iromayon 13

¹ Kononokikinite ŋinituŋanan ikapolok lueyaito, naarai emamei apolou dimarai naebuni kama ejai Edeke, ka ŋin da naejai icorakinit Edeke.

²Kanuka ŋun yenitepegi apolou etepeg aicorakinet naka Edeke, ido luitepegete itudumikinos etube.

³ Naarai ikayaitok mere luitukurianete kotoma aswamisioit naejok, dimarai kotoma naerono. Ikoto kereka ijo kinyek akurian apolou? Kiswama do nuejok, kituri ŋesi jo.

⁴ Naarai erai ŋesi ekejaanakinan loka Edeke kamakon kanuka ajokis, Konye arai kiswama naerono, kokuriana, naarai mam edakit ekileŋ atai; erai ŋesi ekejaanakinan loka Edeke, loinyaŋi kanyunyura yeniswamai nueroko.

⁵Kanuka ŋun ibusakinit anonokikin, mere kanuka anyunyura bon, dimarai kanuka aomisio nuilepilepete.

⁶ Naarai kanuka ŋun itacete da esolo, naarai eraas kesi ikejaanakinak luka Edeke, icebokinito ŋipeŋin.

⁷ Kotacanakisi kere nuebeito, loitelemi esolo loka ituŋa, esolo loka ituŋa; loitelemi esolo da loka iboro, esolo loka iboro; kotacanakisi ayoŋit luebeito ayoŋit, aibuses da mama ejaas lukaibuses.

⁸ Sirijaas kapesen mama ejai ituŋanan kere, dimikito aminanara; naarai yenemina aupake etodol ikisila.

⁹ Naarai na ebe, “Siridote, Siriari, Sirikokoi, Siriŋobelei,” ka aceicorakinet kere, imorikikinitai toma akirot na ebe, “Komina ikoniidunyet kwape iminar bon.”

¹⁰ Amin mam ikonakini iidunyet erono; kwaŋin amin ŋes aitodolikinet naka ikisila.

¹¹ Ka ŋun da, ijenete apak, ebe adol esawa yes akwenyun kajoo. Naarai kwana eapie aitajariowok aitelekarit nakigeunia aiyuun;

¹² aeka akuar, eapie da apaaran. Aso kalacasi aswamisio nuka amuton, kanapa lujiis luka aica.

¹³ Kalosenenete kebusak kwape paaran, mere kotoma aboliasio ka emeret, mere kotoma adoteu ka abenyanut, mere kotoma aŋolopa ka ekokote,

¹⁴ konye konapa Ejakait Yesu Kristo, kwabo siribuakinito akuan aitodol nuimiela.