Read Ebaibuli 1961 Iromayon 3 Bible Online

Iromayon 3 - Ebaibuli 1961 bible

Iromayon 3

¹Itelekarit kereka Eyudayat kinyo? Arai anyoin bo ajokis naka akepio?

² Itelekarit noi kaŋolipone. Nasodit, naarai isiŋadikinitai Iyudayan akiro nuka Edeke.

³ Anyoika bo arai ice kakesi araas lumere lumunon? Amamus amunonutukec itapalauni tope amunonut naka Edeke?

⁴ Madi akuj! Korai Edeke lokabeit, ŋinituŋanan da ikeŋalan, kwape iwadikatere ebe, “Tetere itojokio araut loedolit kakirokon, Ipikori da kotoma atubokiniokon.”

⁵Konye arai amamus adolitewok iticasi adolit naka Edeke, kenera anu? Ebe Mam Edeke erai loedolit aitican oni kanyunyura? (Enera kopone loka etuŋanan.)

⁶Madi akuj! Kanuka ŋun ikonakini ai Edeke etubokini akwapin?

⁷Konye arai kanuka aiŋalaka iyatanakini abeit naka Edeke aitodiar akeibuses, kanukinyo eriŋa katubokinitere eoŋ kwape ekadiakanaran?

⁸ Ido kanukinyo mam kibalar ebe, “Keswamata nukaronok tetere epote nukajokak”? kwape kisabanakiniata icetuŋa sio ebe kinera isio kwaŋin, Edolit atubokiniokec.

⁹ Biai bo do? Kijokuka oni aitelekarit ice? Mam cut, nepepec da; naarai kidau aosan Iyudayan ka Iyonanin da kere ebe eyait adiakanar kes,

¹⁰ kwape iwadikatere ebe: “Emamei ikadoliton, karaida idiopet;

¹¹Emamei yenejenuni, emamei da yenemoot Edeke.

¹²Apaasi kere, emamei kes kere ajokis; Emamei yeniswamai nuejok, emamei karaida idiopet.”

¹³ “Elogorotokec ŋes ailit naeŋaara; Ijodijodete kaŋajepakec, Ejai aisorit naka emusaga kwap kaŋajepakec.”

¹⁴ “Ileleba aitukekec elamit ka adwaris.”

¹⁵ “Erurukito akejenekec abukor aokot.

¹⁶Ejai amudiar ka aburun orotinikec.

¹⁷Mam apotu kojenut erot loka ainapakin.”

¹⁸ “Emamei ayoŋit Edeke kakonyenekec.”

¹⁹ Aso kijeni ebe akiro kere nuelimito ikisila, inerasi mama ejaas ŋul lueyaito ikisila, tetere itubutario ŋiniituk, akwap kere da kojau otube loka Edeke.

²⁰ Kanuka ŋun emamei yenejai akuan yenitojokio araut yenedolit kakonyeneke kanuka aswamisio nuka ikisila, naarai kanuka ikisila ŋes ejenunor adiakar.

²¹ Konye kwana edeleleu adolit naka Edeke komameete ikisila, itejenunitai kokisila ka inabin da,

²² ŋes adolit naka Edeke naejai kanuka aiyuun Yesu Kristo, mama ejaas kere luiyuunito. Naarai emamei atiaketait;

²³ naarai adiakasi kere, komam edolokinito aibuses naka Edeke,

²⁴ akesianut naeinakini atitai ŋes itojokit kes araut luedolito, kanuka alakunio naejai toma Kristo Yesu,

²⁵ loibwaikinit Edeke araut aitupucet kanuka aiyuun akeokot, tetere itodikini akedolit kanuka ajalakin adiakanareta nukolo nueŋirikinit Edeke;

²⁶kosodi kitodik adoliteke kapak kana, tetere eraun loedolit ka loitojoki da ŋin yeniyuuni Yesu araut loedolit.

²⁷ Aso ai bo ejai aolobobot? Agolor kiŋa, Kanuka ikisila inyoika tope? Luka aswamisio? Mam cut, konye kanuka ikisila luka aiyuun.

²⁸ Naarai kitogogoŋit ebe itojokio ituŋanan araut yenedolit kanuka aiyuun, komameete aswamisio nuka ikisila.

²⁹ Erai kereka Edeke loka Iyudayan bon? Mam kereka erai loka Imo da? Eebo, loka Imo da,

³⁰ naarai erai Edeke ediopet; loitojoki luekepitai kotoma aiyuun, ka lumam ekepitai da kanuka aiyuun ŋipeŋin.

³¹ Aso kitapalauni kereka ikisila kanuka aiyuun ŋin? Madi akuj! Konye kiticasi ikisila.