Read Ebaibuli 1961 Iromayon 6 Bible Online

Iromayon 6 - Ebaibuli 1961 bible

Iromayon 6

¹ Aso do kinera anu? Kasalakis kereka adiakanar, tetere iyatakin asianut?

² Madi akuj! Oni lukitwaka kama kadiakar kikwaikini ai kirina kibusi kotomakeŋ?

³ Arai bo mam ijenete ebe oni kere lukibatisatai kotoma Kristo Yesu, aponi kibatisai kotoma atwanareke?

⁴ Aso aponi kidaai nepepe kaŋes kanuka aibatis kotoma atwanare, tetere kwape kitajarunere Kristo kokatwak kanuka aibuses naka Papa, kwape kwaŋin oni da kilosenenei kaijar nakitetet.

⁵ Naarai arai kirotakinitai kaŋes kotoma aput naka atwanareke, kwape kwaŋin kirotakinio kotoma aput naka ajarunike.

⁶ Kijeni na ebe aponi etuŋananiwok lokolo kibubukinoi kaŋes, tetere itapalaunio akuan nakadiakanar, komam bobo adiakanar kitubuleseni oni.

⁷ Naarai yenatwana eosikinitai anyoun kadiakar,

⁸Konye arai kipou katwaka nepepe ka Kristo, kiyuunit ebe kijari da nepepe kaŋes.

⁹Kijeni ebe kedau Kristo ajarun kokatwak, mam etwani bobo, mam bobo atwanare eyait ŋes.

¹⁰ Naarai atwanare naketwani, abu kotwanik adiakar irwan atipet bon, konye aijar naejari, ejari mama ejai Edeke.

¹¹ Yes da kwape kwaŋin koomito bonik araut lukatwak kama ejai adiakar, konye ikajarak mama ejai Edeke kotoma Kristo Yesu.

¹² Aso kinye adiakar airum awatekus nuetwakete, yes arimar aiŋobelekec.

¹³ Kwabo sirijaikinete akusitutubeta mama ejai adiakar aitwasamaa amamus adolit, dimarai kijaikis bonik mama ejai Edeke, kwape ikajarak luanyout kokatwak, akusitutubeta da mama ejai Edeke aitwasamaa adolit;

¹⁴ naarai mam adiakar kiyait yes, naarai mere ikisila kiyaito yes, dimarai asianut.

¹⁵ Biai bo do? Kadiakasi, naarai mam ikisila kiyaito oni, dimarai asianut? Madi akuj!

¹⁶ Mam kereka ijenete ebe loijaikinos bonik arimar kwape ibulesin, iraas do ibulesin luka ŋol kaloirimarito, arai adiakar naeyauni atwanare, arai bo arima naeyauni adolit?

¹⁷Konye kimalai Edeke, naarai iraas kolo ibulesin luka adiakar, konye ipotu korimasi kotauonokus aput naka aisisianakin nakiinakinio yes,

¹⁸ ido nakiwosikinere anyoun kadiakar koraut ibulesin luka adolit.

¹⁹Enera eoŋ kopone loka etuŋanan kanuka akalanyanut naka awatekus. Naarai kwape kijaikiniata kolo atutubetakus aitwasamao kotoma amodokok, ka epali loeyauni epali, kwape kwaŋin kijaikis do kwana atutubetakus aitwasamao kotoma adolit naeyauni aitalaunio.

²⁰Naarai nakiraatar ibulesin luka adiakar, kiwosikinitai anyoun kadolit.

²¹ Anyoika kereka araito nuipotu kodumut kapaarasia kaŋun, kakiro kaŋun nukisurumito kwana ileic? Naarai awasia naka akiro kaŋun ŋes atwanare.

²² Konye kwana kidaut aosikinio anyoun kadiakar iraut ibulesin luka Edeke, idumut araito nueyaunete alaunit, awasiakec da ŋes aijar naka ikar kere.

²³ Naarai eropit loka adiakar ŋes atwanare, konye ainakinet naka Edeke erai aijar naka ikar kere kotoma Kristo Yesu Ejakaitiwok.