Read Ebaibuli 1961 Iromayon 8 Bible Online

Iromayon 8 - Ebaibuli 1961 bible

Iromayon 8

¹Aso do kwana emamei ŋul luejaas toma Kristo Yesu atubokinio.

² Naarai kaosikis eoŋ ikisila luka Emoyo loka aijar loejai toma Kristo Yesu anyoun kokisila luka adiakar ka atwanare.

³ Naarai ŋun numam apedorito ikisila, kanuka akalanyanut naka akuan, abu Edeke, naejukunia Okokuke elopet kaput naka akuan nakadiakaran ido kanuka adiakar, kotubok adiakar kotoma akuan,

⁴ tetere aicorakineta nuka ikisila itodolikinio kotomawok, lumam kilosenenei atupar akuan dimarai atupar Emoyo.

⁵Naarai ŋul luetuparete akuan eomitos nuka akuan, konye ŋul luetuparete Emoyo, eomitos nuka Emoyo.

⁶ Naarai aomit naka akuan ŋes atwanare, konye aomit naka Emoyo ŋes aijar ka ainapakin.

⁷ Kanuka ŋun aomit naka akuan ŋes aitusurup Edeke; naarai mam enonokikinit ikisila luka Edeke, kwabo mam epedori anonokikin;

⁸kes da luejaas toma akuan mam epedorete aisiyalamikin Edeke.

⁹ Konye arai iboie Emoyo loka Edeke kotomakus, mam ijaas toma akuan dimarai toma Omoyo. Arai da emamei ituŋanan Emoyo loka Kristo, mam ŋin erai yenike.

¹⁰ Konye arai ejai Kristo kotomakus, atwakata awatekus kanuka adiakar, konye ejarete ikusimoyon kanuka adolit.

¹¹ Konye arai iboie Emoyo loka ŋol lokitajaruni Yesu kokatwak kotomakus, ŋol lokitajaruni Kristo Yesu kokatwak einakini da akusiwat nuetwakete aijar kanuka Ekemoyo loiboie kotomakus.

¹² Aso do, iinacan, kija kapesen, mere mama ejai akuan atupar aijar naka akuan,

¹³ naarai arai ijarete atupar akuan, ikotosi atwakare, konye arai kitwataniasi aswamisio nuka akuan kanuka Emoyo, ijarete do.

¹⁴Naarai kere luiŋarenikinit Emoyo loka Edeke, ŋul kes odwe luka Edeke.

¹⁵ Naarai mam idumunito emoyo loka ebulesene aboŋor bobo akurian, dimarai idumunito emoyo loka araun odwe. Kanuka ŋol kimonya ebe, “Abba! Papa!”

¹⁶ Emoyo elopet itejenikini imoyonowok ebe kirai idwe luka Edeke,

¹⁷ arai kirai idwe, kirai da ikerumak, ikerumak luka Edeke, luirumete nepepe ka Kristo, arai ca kiiticani nepepe kaŋes, tetere kitubusikinio da kaŋes.

¹⁸ Aomit eoŋ ebe aiticanio naka apak kana mam ibusakinit aitiirianio kaibuses naekoto apukokinio oni.

¹⁹ Naarai idarete isuban keimiel noi apukokinio naka odwe luka Edeke;

²⁰ naarai kitononokikinai isuban aamameak, mere kanuka eipudikec, dimarai kanuka ŋol lokitononokikini kotoma amun;

²¹ naarai eosikinio isuban da anyoun kobulesene loka aibos, alomar aosikinio naka aibuses naka idwe luka Edeke.

²²Naarai kijeni ebe idinyasi isuban kere, eriebasi da nepepe kiton tinenikwana;

²³ kwabo mere ŋul bon, dimarai oni da ikulepek luejaas araito nugeet nuka Emoyo, kidinya oni da kotomawok, kedareto araut odwe, ŋes atemar ebe alakun naka awatewok

²⁴ Naarai kiponi kitajari kanuka amun. Konye ketakanu ibore yenikemunoi emamei bobo amun. Naarai iŋai tope emunokina ibore yenetakani?

²⁵Konye arai kimunokina yenimam etakani, kidaret katitiŋikin.

²⁶Kwape kwaŋin da isigalikini Emoyo akalanyanutuwok; naarai mam kijeni kwape ibusakinitor ailip, konye kinainaanakin Emoyo oni keidiny lomam inerio.

²⁷ Ŋol da loirerei itauon ejeni aomisio nuka Emoyo, kwape ejaatar, naarai iŋaiŋaaŋakini lukalaunak kwape ekotor Edeke.

²⁸ Kijeni ebe iswamaete iboro kere nepepe kanuka ajokis mama ejaas ŋul lueminasi Edeke, ŋes atemar ŋul lukenyaraunio kanuka alosikiniteke.

²⁹ Naarai ŋul luabu kojenu sek, abu koseu da sek aituput kes aput naka Okokuke, tetere erauni ŋesi ekiyai kotoma oinacan luipu.

³⁰Ŋul da luabu koseu sek, konyarau da kes; ŋul da luabu konyarau, kitojok da kes; ŋul da luabu kitojok, kitubusik da kes.

³¹ Aso do kinera anu kaŋun? Arai ejai Edeke kanuwok iŋai tope kisurokini oni?

³² Ŋol lomam abu kimik Okokuke elopet, konye koinak ŋes kanuwok kere, mam kereka kikorakini iboro kere da nepepe kaŋes?

³³ Iŋai bo iwosai luseuna luka Edeke? Edeke itojokit;

³⁴ iŋai bo etubokini? Kristo Yesu loketwani, konye aitelekarit lokitajarunio, loejai akan nakoteten naka Edeke, loiŋaiŋaanakini oni.

³⁵Iŋai bo kitiaki oni kamin naka Kristo? Arai bo ican, arai aridakinio, arai areio, arai ebeli, arai amujalal, arai aronis, arai ekileŋ?

³⁶ Kwape iwadikatere ebe, “Kanukon kiario aitiwar akwap, Kimario bala amerekekin nutubutubo.”

³⁷ Konye kotoma ŋun kere kipikori noi kanuka ŋol lokimina oni.

³⁸Naarai etogogoŋi ebe karaida atwanare, karaida aijar, karaida imalaikan, karaida lueyaito, karaida nuejaas, karaida nuejaunete, karaida lukapedor,

³⁹karaida amukurur, karaida aidules, karaida isubat kere, mam kipedorete aitiak oni kamin naka Edeke naejai toma Kristo Yesu Ejakaitiwok.