Read Ebaibuli 1961 1 Ikorinton 3 Bible Online

1 Ikorinton 3 - Ebaibuli 1961 bible

1 Ikorinton 3

¹ Eoŋ da, iinacan, mam apedorit einer kayes kwape luka emoyo, dimarai luka akuan, kwape imukerun kotoma Kristo.

² Abu ketamata yes akile, kwabo mere inyamat; naarai mam ipedorito; eebo, kiton kwana da mam ipedorito,

³ naarai iriŋa iraas luka akuan. Naarai naejaar ekokote ka aŋolopa, mam kereka iraas ituŋa luka akuan, ilosenenete kwape ituŋa atai?

⁴ Naarai naebalar idiopet ebe, “Arai eoŋ yenika Paul,” ice da ebe, “Arai eoŋ yenika Apolo,” mam kereka iraas ituŋa atai?

⁵ Aso iŋai bo Apolo? Iŋai bo da Paul? Kes ikejaanakinak lukiyuunete yesi kamakec, ka ŋin diopet da kwape keinakinia Ejakait.

⁶ Abu eoŋ kera, kicoco Apolo, konye kitopolo Edeke.

⁷Kwaŋin ekeraan mam erai ibore, karaida ekecocoan, dimarai Edeke loitopoloi.

⁸Aso loirai ka loicocoi eraas ipe, ido edumuni ŋinituŋanan ekeropit kwape ajaar akeitaaritoi.

⁹ Naarai kirai isio ikeswamak nepepe ka Edeke; iraas yesi amana naka Edeke, aduket naka Edeke.

¹⁰ Kwape ejaar asianut naka Edeke nakainakinitai eoŋ, abu kapesik apetetait kwape ekadukon lokapolon lokacoa, konye eduki ece. Konye kocoite ŋinidiopet kwape edukio.

¹¹ Naarai emamei yenepedori apesikin apetetait ace, dimarai ŋin naedaunitai apesikin, ŋes Yesu Kristo.

¹²Konye arai keduk ituŋanan toma apetetait ŋin esabu, arai epuesa, arai amor nuketiai, arai akito, arai anya, arai ariaŋ da,

¹³ etakanuni aswam naka ŋinituŋanan; naarai isideleleuni Apaaran, naarai epukorio kotoma akim, itemi da akim aswam naka ŋinituŋanan kwape ejaar.

¹⁴Arai esalit aswam naedukit ituŋanan toma apetetait, edumuni ŋesi eropit.

¹⁵Arai kidopoo aswam naka ituŋanan, etwaniari, kwabo itajario ŋes, konye bala kotoma akim.

¹⁶ Mam kereka ijenete ebe iraas yesi eyekalu loka Edeke, ebe da iboie Emoyo loka Edeke kotomakus?

¹⁷Arai kemuna ituŋanan eyekalu loka Edeke, emunaari Edeke ituŋanan ŋin. Naarai erai eyekalu loka Edeke lokalaunan, ŋes yesi.

¹⁸ Sirikemodakin ituŋanan. Arai ejai kotomakus ituŋanan yeneomit ilopet araut yenikacoa kokar kalu, korau ŋesi yenibaŋ, tetere eraun yenikacoa.

¹⁹ Naarai acoa naka akwap kana ŋes abaŋaanut kama ka Edeke. Naarai iwadikatai ebe, “Ikamuni ŋesi lukacoa koboteikec.”

²⁰ Bobo da ebe, “Ejeni Ejakait aomisio nuka lukacoa, ebe eraas aamameak.”

²¹Kwaŋin kinyek ituŋanan aolobobot kotoma otuŋa. Naarai eraas kere lukus,

²²arai Paul, arai Apolo, arai Kepa, arai akwap, arai aijar, arai atwanare, arai nuejaas kwana, arai nuepote, kere eraas nukus,

²³iraas yesi da luka Kristo, Kristo da loka Edeke.