Read Ebaibuli 1961 1 Ikorinton 5 Bible Online

1 Ikorinton 5 - Ebaibuli 1961 bible

1 Ikorinton 5

¹ Isiarakina eemut ebe ejai adoteu kotomakus, adoteu da namam ejauna kotoma atekerin; ebe etuŋanan ajaut kaberu naka papake.

²Yes da idakanunos, kwabo mam kikadakinit, tetere elemario kokidiŋikus ŋol lokiswamai akirot ŋin.

³ Naarai, karaida amamei kakuan, konye ajai komoyo, adau eoŋ elopet atubokin ŋol lokiswamai akirot ŋin kwape tikajaar,

⁴ kotoma okiror loka Ejakait Yesu, naitukonokinotor nepepe ka ekamoyo, ka apedor da naka Ejakaitiwok Yesu,

⁵ kijaikis ŋol Satan tetere emudiario akuanake, tetere itajario emoyoke kotoma apaaran naka Ejakait Yesu.

⁶ Mam aolobobokus ejok. Mam kereka ijenete ebe aitubuunet naedit itubuuni aluŋuret kere?

⁷ Kitesegaaros do kaitubuunet namojoŋ, tetere iraunos aluŋuret nakitetet, kwape iraatar lumam itubuuno. Naarai aponi Kristo Aleleŋewok koinakinai araut asubanit.

⁸ Aso karicata epucit, mere kaitubuunet namojoŋ, karaida kaitubuunet naka ameŋeranut ka aronis, dimarai ka namam itubuuno naka aipioror naka emoyo ka abeit.

⁹ Abu kewadikak yes kotoma obaluaka ebe sirikimorianakinos kidotea;

¹⁰mam abala ebe kinacata cut idotea luka akwapin kanu, arai ikeraŋak, arai ikaŋatak, karaida ŋul luemaete aputosia, naarai arai kerai kwaŋin ti ibusakinit anyoun kakwapin kanu.

¹¹ Konye kwana kewadikakini yes ebe sirikimorianakinos kaloenyaritai onac arai erai edote, arai ekeraŋan, arai loemai aputosia, arai ekamoromoron, arai ekameran, arai ekaŋatan; etuŋanan loikoni kwaŋin mam acamunit yes karaida aimor kaŋes.

¹² Naarai anyoin ajokis kamakaŋ atubokin luejaas kiŋa? Mam kereka yes itubokinito luejaas toma okanisa?

¹³ Konye etubokini Edeke ŋul luejaas kiŋa, Kireŋeasi yesi ekaronon ŋol loejai kidiŋikus.