Read Ebaibuli 1961 2 Ikorinton 1 Bible Online

2 Ikorinton 1 - Ebaibuli 1961 bible

2 Ikorinton 1

¹ Paul ekiyakia loka Kristo Yesu kanuka akot naka Edeke, ka Timoteo onacewok, Mama ejai ekanisa loka Edeke loejai Korinto, nenipe ka lukalaunak kere luejaas Akaia kere:

² Kojai asianut mama ijaas ka ainapakin nuepote kama ejai Edeke Papawok ka Ejakait Yesu Kristo.

³ Kituritete Edeke Papa loka Ejakaitiwok Yesu Kristo, Papa loka aitim, Edeke da loka aitalakar kere,

⁴lokitalakarit oni kotoma aiticanitoiwok kere, tetere oni da kipedori aitalakar ŋul luejaas toma aiticanitoi kere, kaitalakar ŋin nakitalakaria Edeke oni.

⁵ Naarai kwape iyatanakinor ariebo naka Kristo kamawok, kwape kwaŋin da iyatanakinor aitalakariowok kanuka Kristo.

⁶ Arai kiticanitoi sio, erai kanuka aitalakariokus ka aitajariokus da; ido arai kitalakario sio, erai kanuka aitalakariokus naeyauni atitiŋikin kariebo ŋin nakisiriebio sio da.

⁷Icasit amunokosi kanukus; naarai kijeni ebe kwape imoriata ariebokosi, imorete kwape kwaŋin aitalakariokosi da.

⁸ Naarai, iinacan, mam kikoto yes kinyeis ajenun aiticanitoi nakidoikinit sio ko Asia, ebe kinuaritai noi noi adepar apedorikosi, komam kiwomit aijar.

⁹Kwabo kipou isio kapuput atwanare kotomakosi, kenyeis amunokina bonik, dimarai Edeke loitajaruni lukatwak;

¹⁰ ŋes abu koyuu sio kotoma atwanare naetia nen, ido kiyuuni, lokimunokina ebe iyatanakini ayuun,

¹¹Yes da kiŋarakinos ailipanakin sio, tetere imalaete luipu kanukosi, kanuka ainakinet nakiinakinitai sio kanuka ailip naka ituŋa luipu.

¹² Naarai aolobobotekosi ŋes nata, ajenanut naka aomisiokosi ebe kipou kalosenenete kotoma akwapin aitelekarit mamakus, kotoma alaunit ka aipioror naka emoyo loebuni kama ejai Edeke, mere kanuka acoa naka akuan, dimarai kanuka asianut naka Edeke,

¹³Naarai mam kiwadikakinit yes akirot dimarai nuipedorete asoman ka ajenun, ido amuno ebe ijenunete ŋun kiton awasia,

¹⁴ kwape ipotu kojenuniata ace kamakosi, ebe kirai isio aolobobotekus, kwape irauniata yesi da nakosi, kapaaran naka Ejakaitiwok Yesu.

¹⁵Kotoma amun ŋin abu kakoto ailiŋ abunore mama ijaas, tetere idumunete asianut nakiareit;

¹⁶ aitor mamakus alosit Makedonia, ka aboŋun bobo mama ijaas anyoun ko Makedonia, ka yes da ainyamakin eoŋ alosit Yudaya.

¹⁷ Aso naakotor ŋun, apotu kereka akaomisio kijulanakinos? Arai bo abu kenerunite ŋun kopone loka akuan, tetere ikote nen kamakaŋ, “Eebo, eebo,” ka “Mam, Mam”?

¹⁸Konye kwape eraar Edeke lomunot, akosikirot mamakus mere Eebo ka Mam.

¹⁹ Naarai Kristo Yesu Okoku loka Edeke, lokipou isio kalimonokis yes, eoŋ ka Silibano ka Timoteo, mam kerai Eebo, ka Mam; dimarai tomakeŋ eraenena Eebo.

²⁰ Naarai aisumuneta kere nuka Edeke eraas Eebo kotomakeŋ, ido kanuka ŋol ŋes kibalar ebe Amen tetere itopoloorio Edeke.

²¹ Aso ŋol lokiticasi sio nenipe kayes kotoma Kristo, loinyonyoikinit da oni akinyet, ŋes Edeke.

²² Ŋes kipucakini oni aipucet, ka ainakin da Emoyo toma otauonowok araun aititiŋet.

²³ Konye eoŋ ewonet Edeke araut ekajenan loka aijaraka, ebe kanuka aitimit yes, mam abu kabu Korinto.

²⁴ Mere ŋes atemar ebe kiyait aiyuunikus, dimarai kirai ikegaŋak luka alakarakus, naarai icasitos kanuka aiyuunikus.