Read Ebaibuli 1961 2 Ikorinton 11 Bible Online

2 Ikorinton 11 - Ebaibuli 1961 bible

2 Ikorinton 11

¹Arai koŋirikinito eoŋ kotoma abaŋaanut naedit; eebo, koŋirikinito eoŋ!

² Naarai ekokotikinit yes kekokote loka Edeke, naarai abu kesinerik yes ekiliokit ediopet, tetere ketodiari kwape abekot naelai mama ejai Kristo.

³ Konye acoit kinyeis akusiwomisio aitapaario kama ka aipioror ka alaunit nuka Kristo, kwape ejodijodio emun Keba kotoma apirianutuke.

⁴ Naarai arai ebuni ituŋanan elimonokini Yesu ece lomam sio kilimonokinit, arai bo idumunete emoyo ece lomam idumunito, arai bo icamunito Akiro Nukajokak nuegelara kanuipotu kocamut, iŋirikinete ejok.

⁵ Naarai aomit ebe mam eoŋ eŋoŋara kadiokirot nakejaatar ikiyakia lukapolok noi.

⁶ Konye karaida arai eoŋ lomam ajeni einer, mere kwaŋin kotoma acoa; konye koponesio kere kitodia ŋin kakiro kere mamakus.

⁷ Adiakarit kereka eoŋ aitasonikin tetere yes kitopoloorio, naarai abu kalimonok yes Akiro Nukajokak nuka Edeke, komam eropit?

⁸ Abu kaŋat ikanisan ice adumunio aropio kamakec tetere kejaanakini yes.

⁹ Ido nakijaar kayes, elwaritoi da, mam abu kalaŋirik ituŋanan, naarai apotu iinacan lukepote koMakedonia kainakis lukepuda. Bon da kotoma akiro kere abu kedarakina kenyek alaŋirikin yes, ido edarakina.

¹⁰ Kwape ejaar abeit naka Kristo tomakaŋ, emamei ituŋanan yeniketubutaari kotoma aolobobot ŋin kotoma atutubeta nuka Akaia.

¹¹Kanukinyo? Naarai mam kamina yes? Ejeni Edeke.

¹²Konye nueswamai, eyatakini aswam, tetere egaliori einer loka ŋul kaluekotosi einer, tetere kotoma kaŋin naeolobobototor kotakanete araut kwape kasio.

¹³ Naarai luikote nen eraas ikiyakia lukeŋalak, ikeswamak aimod, luituluoros bonik bala ikiyakia luka Kristo.

¹⁴Mam erai nakaumokin, naarai Satan da ituluonor bon bala emalaika loka aica.

¹⁵Aso mam erai naepol arai ikekejaanakinak da ituluoros bonik kwape ikejaanakinak luka abeit. Eraun awasiakec kwape akeceswamisio.

¹⁶ Enera bobo ebe kinyek ituŋanan aomit eoŋ araut ebaŋ; konye arai kiwomito eoŋ kwaŋin, kocamunitos eoŋ kwape ebaŋ, tetere eoŋ da aoloboboi nuikidioko.

¹⁷Naenera, mam enera kaicorakinet naka Ejakait, konye kwape toma abaŋaanut, kotoma atitiŋ na naka aolobobot.

¹⁸Naarai eolobobotos luipu kopone loka akuan, eoŋ da aoloboboi.

¹⁹Naarai iŋirikinitos luebaŋaka kaiyalama, iraas yesi lukacoal

²⁰Naarai iŋirikinitos arai kiitubulesen yes ituŋanan, arai kiiliko yes, arai kiiŋata, arai kedakunun, arai kiibapana yes akonyen.

²¹Enera kanuka aitisilikin, ebe kirai isio lukalanyak. Konye arai etitiŋikini ituŋanan akirot kere, — enera kabaŋaanut, — eoŋ da atitiŋ.

²² Eraas kereka kesi Iburanian? Eoŋ da. Eraas kereka kesi Isiraelin? Eoŋ da, Eraas kereka kesi aur naka Aburaam? Eoŋ da.

²³ Eraas kereka kesi ikejaanakinak luka Kristo? Enera bala loikerepikinit-eoŋ adeparit-kotoma aitaaritoi naedeparit noi, kotoma aenio naedeparit noi, kotoma aleconorio numam imarunos, irwan ipu kotoma atwanare.

²⁴ Irwan akany aponi kaleconor koYudayan idas akais aoŋon alemar idiopet.

²⁵ Irwan auni aponi kaleconor kasureta; irwan atipet aponi kebiribirii kamor. Irwan auni abu ataker kobwaŋa; ajai ataro akuare ka apaaran;

²⁶ irwanipu kotoma alosit, karonis naka icorin, karonis naka ikaŋatak, karonis naka lukatekereka, karonis naka Imo, karonis kotoma oreria luepolok, karonis nakotoma amodiŋ, karonis nakotoma aŋolol, karonis naka iinacan lukeŋalak;

²⁷ kaitaaritoi ka ailolony, irwan ipu kotoma aikoler, kotoma eteŋei ka akure, irwan ipu kotoma ailuŋ, kaaterot ka amujalal da.

²⁸ Komam imarakinit nukokiŋa, ejai nakalanirikinit tiritir, ŋes aiyaloŋoŋ kanuka ikanisan kere.

²⁹ Iŋai bo ekalanyana, komam eoŋ da akalanyana? Iŋai bo kitiguikinitai, komam eoŋ da anoki?

³⁰ Arai kebusakinit aolobob, aoloboboi kanuka akiro nuka akalanyanutuka.

³¹ Edeke Papa loka Ejakait Yesu loituritoi ikar kere ejeni ebe mam eŋalai.

³² Ko Damasiko, abu ekayaiton loka Areta ekabaka kidar ere loka Damasiko tetere kekamuni,

³³ konye kejoluluun kotoma obukit kadirisa naka arwatat, kakuu kotoma akaninike.