Read Ebaibuli 1961 2 Ikorinton 6 Bible Online

2 Ikorinton 6 - Ebaibuli 1961 bible

2 Ikorinton 6

¹ Aso kiswamai nepepe kaŋes, kiŋaiŋait yes sirikicamut asianut naka Edeke atitai.

² Naarai inera ebe, “Apak naka acamunio abu keira yes, Kapaaran naka aitajario abu keŋarak yes.” Koany, kwape kwana ŋes apak naka acamunio; koany, kwape kwana ŋes apaaran naka aitajario.

³Mam kiyaun aiguikinet kere kotoma akirot kere, kinyek akosiijaanakin aitoronio,

⁴ konye kotoma akiro kere kituro kwape ikejaanakinak luka Edeke; kotoma atitiŋikin naepol, kotoma ocan, kotoma oipud, kotoma aridakinio,

⁵ kotoma aleconorio, kotoma aenio, kotoma iceleta, kotoma aitaaritoi, kotoma aikolerit, kotoma ailuŋ,

⁶ kotoma alaunit, kotoma aijen, kotoma aikany, kotoma asianut, kotoma Omoyo Lokalaunan, kotoma amin namam esoswai,

⁷ kotoma akirot naka abeit, kotoma apedor naka Edeke, kanuka lujiis luka adolit luka akan nakoteten, ka luka akan nakokediany;

⁸kanuka aitopoloorio ka amwaŋio da, kanuka amoromoroo ka aitojokio da, kwape ikeŋalak konye lukabeit,

⁹ kwape lumam ejenunio, konye luejenunio noi; kwape luetwakete, konye koany, kijari; kwape luiticanio, konye mam kiario,

¹⁰ kwape luitururuete konye luelelete tir; kwape luicanas, konye luitabarete ikepuak; kwape luemamei ibore, konye ejaas iboro kere.

¹¹ Wu yes Ikorinton, itooŋaaritai akosiituk mamakus; italalaaritai da ekositau.

¹²Mam yes iridakina tomakosi, dimarai iridakina kotauonokus.

¹³ Konye tetere kitacakinete kotiai lokidumuniata, enera kayes kwape ikadwe, kitalalai da itauonokus.

¹⁴ Sirikienikinos ajookot nepepe kalumam iyuunito. Naarai emorete biai adolit ka amamus adolit? Arai ejai eidicane enyoin kidiŋ kaica ka amuton?

¹⁵Anyoin da acamanara naka Kristo ka Belial? Arai bo anyoin akorakinet naka yeniyuunit ka yenimam iyuunit?

¹⁶ Anyoin aitutuket kidiŋ ka eyekalu loka Edeke ka aputosia? Naarai kirai oni eyekalu loka Edeke lokajaran; kwape abalar Edeke ebe, “Eboikini tomakec alosenenei da kokidiŋikec, Araun eoŋ da Edekekec, kes da eraunos ikatuŋa.

¹⁷ Kanuka ŋun ebala Ejakait ebe, Konyoutu kokidiŋikec, kotiakas kakes, Sirikitirosi ibore yenimam elai; Kesukunyuni eoŋ da yes.

¹⁸ Ebala Ejakait Lokapedor kere ebe, Araun eoŋ Papa kamakus, Yes da iraunos ikadwe lusap ka lupesur.”