Read Ebaibuli 1961 Igalatian 6 Bible Online

Igalatian 6 - Ebaibuli 1961 bible

Igalatian 6

¹ Iinacan, arai kedumun ituŋanan ibucarit, yes luiraas luka Emoyo kiteteut yenikoni nen komoyo lokaiyapepera. Koŋica bon, kinyek Ijo da acodunio.

²Kodakenenete nuelaŋirikinito ice, kwaŋin itodolete ikisila luka Kristo.

³Naarai arai ewomit idiotuŋanan ebe erai ibore, kwabo mam erai ibore, iŋala bon.

⁴ Konye kitem ŋinidiopet akeswam, kosodi konyet ejai naeoloboboo kanukeŋ, kwabo mere kanuka yenice.

⁵ Naarai edaki ŋinidiopet abwokonike.

⁶ Konye komorata yenisisianakinio akirot nepepe ka yenisisianakini kajokisio kere.

⁷Sirikiŋalas; mam Edeke isekelio, naarai lueyei ituŋanan, ŋupeŋul esaki da.

⁸ Naarai yeneyeikini akuanake, esaki aibos; konye yeneyeikini Emoyo, esaki aijar naka ikar kere.

⁹ Kenyeis aitapalikina aswam nuejok, naarai kedol apakike kisaki, arai mam kiilor.

¹⁰ Aso naeriŋar oni apak ejai, keswamanakisi ituŋa kere ajokis, ido aitelekarit ŋul lukokal loka aiyuun.

¹¹Koanyutu kewadikak yes inyukuta luepolok luetia nen kakanika.

¹² Ŋul luekotosi atakan ejok toma akuan, ŋupeŋul kitiŋaikinete yes akepio, konye kinyeis areio kanuka emusalaba loka Kristo.

¹³Naarai luekepitai mam ikulepek ericete ikisila, konye ekotosi yes akepio tetere eoloboboete kotoma awatekus.

¹⁴ Konye eoŋ madi akuj eoŋ aolobob, dimarai kotoma emusalaba loka Ejakaitiwok Yesu Kristo, lokotomakeŋ kibubukinio akwap kamakaŋ, eoŋ da kama kakwap.

¹⁵ Naarai akepio mam erai ibore, karaida amamus akepio, dimarai yenisubat yenikitetet.

¹⁶ Ido ŋul kere luelosenenete koikor kalo, kojai ainapakin ka aitim mamakec, ido mama ejai Isirael loka Edeke.

¹⁷ Ameari kwana kinyek idiotuŋanan aitican eoŋ; naarai adakit eoŋ imacarin luka Yesu kotoma akuanaka.

¹⁸Iinacan, kojai asianut naka Ejakaitiwok Yesu Kristo kimoyonokus. Amen.