Read Ebaibuli 1961 Ipeson 3 Bible Online

Ipeson 3 - Ebaibuli 1961 bible

Ipeson 3

¹ Kanuka ŋun eoŋ Paul, eenat loka Kristo Yesu kanukus kImo,—

² arai ipotu kiirasi nuka aijokokinio naka asianut naka. Edeke nakainakinio kanukus,

³ kwape ketejenikinere kapukokinio aiyeiyea kwape abu kewadikaa sek kanuesupaaka.

⁴ Naisiomiata nu ipedorete ajenun akamisianut nakotoma aiyeiyea naka Kristo,

⁵namam apotu odwe luka ituŋa kojenut katurio ace, kwape apukorere kwana mama ejaas ikekiyakia lukalaunak ka inabin da kotoma Omoyo;

⁶ ŋes atemar ebe eraas Imo ikerumak nepepe kasio, atutubeta nuka akuan adiopet, ka ikamorak da luka aisumunet kotoma Kristo Yesu kanuka Akiro Nukajokak.

⁷ Abu eoŋ karau ekejaanakinan loka ŋun, kwape ejaar ainakinet naka asianut naka Edeke nakainakinitai eoŋ, kwape ejaar aswam naka akepedor.

⁸ Kainakinitai eoŋ asianut na, loarai loadit noi adepar lukalaunak kere alimonokin Imo Akiro Nukajokak nuka abar namam imarun naka Kristo,

⁹ ka aitacaikin da ituŋa kere tetere eanyunete aijokokinio kwape ejaar nakaiyeiyea nakibwaitai ameun apeŋo kotoma Edeke lokesubi iboro kere;

¹⁰ tetere ejenunete ikayaitok ka lukapolou lukotoma aiboisio nuka akuj, acoa naka Edeke nakiponesio luipu, kotoma okanisa;

¹¹ kwape ejaar alosikinit naka ikar kere nakelosikinit kotoma Kristo Yesu Ejakaitiwok.

¹² Kotomakeŋ kija katitiŋ, kikunyakini da kamun, kanuka aiyuun ŋes.

¹³ Kanuka ŋun kelipit yes sirikitapalikinos kanuka aiticanioka kanukus, naerai aibusesukus.

¹⁴Kanuka ŋun akukonokin Papa kakuŋinika,

¹⁵kama emaikinere eipapaene kere loka akuj ka loka akwap da,

¹⁶ ebe koinak yes kwape ejaar abar naka akeibuses, aitogogoŋio kapedor kotoma Omoyoke toma otuŋanane lokotoma,

¹⁷ kiboienenei Kristo kotoma otauonokus kanuka aiyuun; tetere yes, icasete aliasiokus, iketakina da apetetaitikus, kotoma amin,

¹⁸ kogogoŋoros ajenun nepepe kalukalaunak kere kwape ejaar alalau, ka aojau, ka amukurur, ka aidules,

¹⁹ ka ajenun da amin naka Kristo naedeparit ajenunio, tetere itekoro kiton aitekoro kere naka Edeke.

²⁰ Aso mama ejai ŋol loepedori aswam noi noi adepar kere nukilipi arai nukiwomit, kwape ejaar akepedor naiswamai kotomawok,

²¹kojai aibuses kotoma okanisa, kotoma Kristo Yesu da, kiton aturio kere ikar ka ikar. Amen.