Read Ebaibuli 1961 Ipeson 6 Bible Online

Ipeson 6 - Ebaibuli 1961 bible

Ipeson 6

¹ Yes idwe, korimasi ikauriakakus kotoma Ejakait, naarai ibus ŋin.

² “Koyoŋite papakon ka totokon” ŋes aicorakinet nasodit naejai aisumunet,

³“tetere ijai ejok ido ibusi kakwap.”

⁴ Yes da lukapapa, sirikitunyunyuranakis ikusidwe, konye kosaenenete kes kariemiriem ka aituutoor naka Ejakait.

⁵ Yes ibulesin, korimasi ŋul lueraas ijakakus kwape ejaar akuan, kakurian ka amaran kaipioror naka itauonokus, kwape irimatar Kristo;

⁶mere bala kaijaanakin nakokuju kwape luitojokito ituŋa, konye kwape ibulesin luka Kristo iswamaenenete nuekot Edeke kotauon,

⁷ijaanakinete kaiyalama, bala ijaanakinete Ejakait, kwabo mere ituŋa,

⁸ kojenete ebe nuejok nuiswamai ituŋanan, ŋes einakinio bobo kama ejai Ejakait, arai erai ebulesit, arai bo erai loijakakai.

⁹ Yes da ijaka, kiswamanakinete kes kwape kwaŋin, kinyeis aitukurian, naarai ijenete ebe ejai Ejakaitikec ka lokus toma akuj, kwabo emamei atiakit ituŋa kamakeŋ.

¹⁰ Nukawasia, kojaas kagogoŋ toma Ejakait, kotoma ailerit naka agogoŋuke.

¹¹ Konapata lujiis kere luka Edeke, tetere ipedorete abwoikin ibotei luka Satana.

¹² Naarai mam kiwuta kaokot ka akuan, dimarai ka ikayaitok, ka lukapolou, ka lueyaito akwap naka amuton kana, ka ajoresio nuka imoyon luka aronis, luejaas toma aiboisio nuka akuj.

¹³ Kanuka ŋun kolemutu lujiis kere luka Edeke tetere ipedorete abwoikin kapaaran nakaronis, ido kidau aswam kere, aibwo.

¹⁴ Aso kobwaata, koenito akusiŋabes kabeit, konapito yenikatorob yenika adolit,

¹⁵ konapito da amuk nuka akapakina naka Akiro Nukajokak nuka ainapakin;

¹⁶ aitelekarit kere, kolemutu ebuku loka aiyuun, loipedoriata aitudeŋ imalia kere luenokete luka lokaronon.

¹⁷ Kijautu da akopira naka aitajario, ka ekileŋ loka Emoyo, ŋes akirot naka Edeke.

¹⁸ Kilipenenete apakio kere kOmoyo, kailip kere ka aiŋaiŋa. Kanuka ŋun kokwenyenenete kainyikokin kotoma aiŋaiŋaanakin lukalaunak kere,

¹⁹ ido kanukaŋ da, tetere kainakinio aoŋaar akaituk einer, aitejenikin katitiŋ aiyeiyea naka Akiro Nukajokak,

²⁰ nuaraar ekiyakia kotoma orikoi; tetere enera katitiŋ kotoma kaŋun, kwape kebusakinitor einer.

²¹ Konye tetere ijenunete kwape ajaar eoŋ, ka nueswamai, ebuni Tukiko onac lominat, ekejaanakinan da lomunot kotoma Ejakait aitejenikin yes akiro kere.

²² Ejuk ŋes mamakus kanuka ŋun, tetere ijenunete kwape kijaar, ŋes da italakari itauonokus.

²³Kojai ainapakin mama ejaas iinacan, ka amin, nepepe kaiyuun, nuepote kama ejai Edeke Papa, ka Ejakait Yesu Kristo.

²⁴ Kojai asianut mama ejaas ŋul kere lueminasi Ejakaitiwok Yesu Kristo kamina namam iŋoŋar.