Read Ebaibuli 1961 Ikolosain 1 Bible Online

Ikolosain 1 - Ebaibuli 1961 bible

Ikolosain 1

¹ Paul ekiyakia loka Kristo Yesu kanuka akot naka Edeke, ka Timoteo onacewok.

² Mama ejaas lukalaunak ka iinacan luiyuunito lukotoma Kristo luejaas Kolosai: Asianut ka ainapakin kojaas mama ijaas nuepote kama ejai Edeke Papawok.

³ Kimalaenenei Edeke Papa loka Ejakaitiwok Yesu Kristo apaarasia kere nakilipanakinia yes,

⁴ naarai kipou keirasi nuka aiyuunikus kotoma Kristo Yesu, ka aminakus mama ejaas lukalaunak kere,

⁵ naejai kanuka amun naiŋadakinio toma akuj kanukus. Ipotu kiirasi ŋin kolo toma akirot naka abeit naka Akiro Nukajokak,

⁶ nuadolokis yes; ido kwape eraiata araito, iyatanakinos da kotoma akwapin kere, kwape kwaŋin kotomakus da, ameun kapaaran naipupioto, kojenut da asianut naka Edeke kabeit,

⁷ kwape isisiaata kama ka Epapurasi ebulesit aupawok lominat. Erai ŋesi ekejaanakinan lomunot loka Kristo kanukosi,

⁸lokitejenik da sio akusimin kotoma Omoyo.

⁹ Kanuka ŋun sio da, ameun kapaaran nakipupunio, mam kinyeinenei ailipanakin yes kaiŋaiŋa ebe, kilelebikin ajenun nuekoto Edeke, kacoa kere, ka acoit naka emoyo,

¹⁰ kolosenenete kwape luibusakinito Ejakait aisiyalamikin ŋes kakiro kere, koraete araito kotoma kaŋiniswam kere naejok, kiyatanakinos da ajenun Edeke.

¹¹ Kitogogoŋoi kapedor kere, kwape ejaar agogoŋ naka aibusesuke, kiton atitiŋikinit kere, ka aikany da nepepe kaiyalama,

¹² kimalaenenete Papa lokitubusikinit oni aimor kairumet naka lukalaunak kotoma aica.

¹³ Abu ŋesi kolaku oni alemar kapolou naka amuton, kisibwot alomar ajakanut naka Okokuke lominat.

¹⁴ Kija kalakunio kotomakeŋ, ŋes aisionio naka adiakanareta.

¹⁵ Erai ŋesi aput naka Edeke lomam etakani, ekiyai loka isuban kere;

¹⁶ naarai kotomakeŋ ŋes kesubere iboro kere, luejaas toma akuj, ka luejaas toma akwap, luetakanete ka lumam etakanete, arai iicoloŋo lukajakanuto, arai ijaka, arai ikayaitok, arai lukapolou, kesubio iboro kere kotomakeŋ ido kanukeŋ.

¹⁷ Egeikinit ŋesi iboro kere, icasito da iboro kere nepepe kotomakeŋ.

¹⁸ Erai ŋesi da akou naka akuan, ŋes ekanisa; erai ŋesi ageunet, ekiyai kotoma okatwak, tetere eraun ŋesi elopet losodit kotoma kere.

¹⁹ Naarai kotomakeŋ kitojokit aitekoro naka Edeke aiboienen,

²⁰ kotomakeŋ da aitupuc iboro kere mamakeŋ, arai luejaas akwap, arai da luejaas akuj, kisinapik kanuka aokot nuka emusalabake.

²¹ Ka yes da lukolo igelara, lukasurup da kaomisiokus, kaswamisio nueroko, konye kwana abu ŋesi kitupuc yes

²² kotoma akekuan naka etuŋanan, kanuka aketwanare, tetere kitodiari yes lukalaunak, luemamei akemer ka luemamei aitoronet da kakonyeneke,

²³ arai bo isalenenete kotoma aiyuun, iketakina apetetaitikus, icasito komam iriaŋiriaŋas, ainyein amun naka Akiro Nukajokak nuipotu kopuput, nuaponi kolimonokin ŋinisubat kere yenejai kwap kakuj, nuabu karaunor eoŋ, Paul, ekejaanakinanikec.

²⁴ Kwana eyalamikin arieboka kanukus, etodoli da nuikadidio nuka aiticanio naka Kristo toma akuanaka kanuka akuanake, ŋes ekanisa,

²⁵ lokaraunor eoŋ ekekejaanakinan kwape ejaar aijokokinet naka Edeke nakainakinitai kanukus, aitodolikin akirot naka Edeke,

²⁶ aiyeiyea nakibwaitai ameun kikar ka aturio da, konye kwana ikujokinitai mama ejaas lukalaunakake.

²⁷ Abu Edeke kokoto kes aitejenikin Imo abar kwape ejaar naka aibuses naka aiyeiyea kaŋin, naerai Kristo kotomakus, amun naka aibuses.

²⁸ Kilimonokini ŋes, kekwenya ŋinituŋanan, kisisianakini da ŋinituŋanan kacoa kere, tetere kitodiari ŋinituŋanan epol kotoma Kristo.

²⁹ Kanuka ŋun ŋes etaaritor aut kwape ejaar akegogoŋ naiswamai kotomakaŋ kapedor.