Read Ebaibuli 1961 Ikolosain 3 Bible Online

Ikolosain 3 - Ebaibuli 1961 bible

Ikolosain 3

¹ Aso arai kitajarunitai nepepe ka Kristo, komoenenete nuejaas kuju, neejai Kristo, iboie kakan nakoteten naka Edeke.

² Koomoomoete nuejaas kuju, kwabo mere nuejaas akwap.

³ Naarai ipotu kotwaka, ibwaitai da akusiijar nepepe ka Kristo, toma Edeke.

⁴ Naetakanunia Kristo, ŋes aijarawok, kosodete yesi da itakanunete nepepe kaŋes kotoma aibuses.

⁵ Aso kitwataniasi akusitutubeta nuejaas akwap; adoteu, asilianut, ainekit, eimiel loerono, ka airaŋaanut, ŋes aima aputosia.

⁶ Kanuka ŋun ŋes ebunokinia anyunyura naka Edeke odwe luiulaka.

⁷Ipotu yesi da kolosenenete kolo kaŋun, naijariata kotomakec.

⁸ Konye yes da kwana kolemasi ŋun kere awai; anyunyura, adedeŋ, aronis, ainyanakin, einer nukileic kaitukekus.

⁹ Siriŋalaŋalas, naarai ipotu kolacasi etuŋanan lokolo nepepe kaswamisioke,

¹⁰ konapa da etuŋanan lokitetet loisiteteununio kiton ajenun kwape ejaar aput naka ŋol lokesubi ŋes.

¹¹ Emamei kanen Eyonanit, karaida Eyudayat, akepio ka amamus akepio, imoit, Esukusit, ibulesit, karaida yenijakakai, konye Kristo ŋes kere, ejai da kotoma kere.

¹² Aso konapenenete etau loka aitim, asianut, aitasono, aiyapepera, atitiŋikin, kwape luseuna luka Edeke, lukalaunak ka luminan da;

¹³ koŋirionokinos, kisionionoros, arai ejai ituŋanan kere aŋurian kayenice, ido kwape kisionio yes Ejakait, yes da kisioniete kwape kwaŋin.

¹⁴ Ido aitelekarit ŋun kere konapa amin, naerai elomorut loka adolior.

¹⁵ Kodiekenenei ainapakin naka Kristo kotoma otauonokus, nakinyarakinio da toma akuan adiopet, kimalaenenete da.

¹⁶ Kiboienenei akirot naka Kristo kabarara kotomakus, kacoa kere: kisisianakinete ido kikwenyanaros kisabulin, ka ikososio, ka nupwakan nuka emoyo; iyeonokinete Edeke kasianut kotoma otauonokus.

¹⁷ Ido nuiswamaenenete kere kakirot arai kaswam, kiswamaenenete kokiror loka Ejakait Yesu, kimalaenenete Edeke Papa kotomakeŋ.

¹⁸ Yes aŋor, kononokikis ikusikiliok, kwape ibusakinitor kotoma Ejakait.

¹⁹ Yes ikiliok, kominas akusiŋor, siridedeŋanakinete kes.

²⁰ Yes idwe, korimasi ikusikauriak kotoma akiro kere, naarai ŋin itojokit Ejakait.

²¹ Yes lukapapa, sirikitunyunyuranakis ikusidwe, kinyeis ajuruŋuŋ.

²² Yes ibulesin, korimasi ikusijaka luka akuan kotoma akiro kere; mere kaijaanakin nakokuju kwape luitojokito ituŋa, dimarai kaipioror nakotau, koyoŋito Ejakait,

²³Yeniswamaete kere, kiswamaenenete kaijar kere, bala iswamanakinete Ejakait kwabo mere ituŋa,

²⁴Kojenete ebe kiinakini Ejakait eropit loka airumet; ijaanakinete Ejakait Kristo.

²⁵ Naarai yeniswamai erono, etacakinio bobo kwape ejaar akeronis, ido emamei atiakit ituŋa.