Read Ebaibuli 1961 1 Isesalonikan 1 Bible Online

1 Isesalonikan 1 - Ebaibuli 1961 bible

1 Isesalonikan 1

¹ Paul ka Siluano ka Timoteo, mama ejai ekanisa loka Isesalonikan kotoma Edeke Papa ka Ejakait Yesu Kristo: Asianut kojai mama ijaas ka ainapakin.

² Kimalaenenei Edeke kanukus kere apaarasia kere, kilimununei yes kotoma ailipikosi,

³ komam kinyeinenei aiitunun kakonyen nuka Edeke Papawok aswamukus naka aiyuun, ka aitaaritoi naka amin, ka atitiŋikin da naka amuno naka Ejakaitiwok Yesu Kristo,

⁴Naarai iinacan luemina Edeke, kijeni aseuniokus;

⁵ naarai Akosikiro Nukajokak mam apotu kodolokis yes kotoma akirot bon, dimarai kotoma apedor, ido kotoma Omoyo Lokalaunan, ido kaitogogoŋio naepol, kwape ijeniata epone lokitodiaror tomakus kanukus.

⁶ Ido ipotu koputosi sio ka Ejakait, naarai ijaut akirot kotoma aiticanio naepol, kaiyalama naka Emoyo Lokalaunan;

⁷ kosodete araun aanyunet mama ejaas luiyuunito kere kotoma Makedonia ka Akaia da.

⁸ Naarai anyoun kamakus epup akirot naka Edeke, mere kotoma Makedonia ka Akaia bon, dimarai isiarakina akusiiyuun kotoma Edeke ŋiniibois kere, emamei bobo sio eipud einer akirot kere.

⁹ Naarai alimosi kesi ikulepek akirokosi kwape kiilomunia mamakus, ido kwape ibelokinotor mama ejai Edeke, kinyeis aputosia, tetere ijaanakinete Edeke lokajaran lokabeit,

¹⁰ ka aidareun Okokuke abunore kokuju, lokitajaruni ŋesi kokatwak, ŋes Yesu lokiyuuni oni kotoma anyunyura naebunit.