Read Ebaibuli 1961 Yosua 1 Bible Online

Yosua 1 - Ebaibuli 1961 bible

Yosua 1

¹ Kosodi kanen kedau Musa ekejaanakinan loka EJAKAIT atwanare, kotema EJAKAIT Yosua okoku loka Nun, ekejaanakinan loka Musa atiar,

² “Atwana Musa ekejaanakinanika; aso kwana konyou, kodok ecor lo Yorodan, ijo ka ituŋa lu kere, kolomasi akwap naainakinit eoŋ kes, idwe luka Isirael.

³ Ŋiniibois neicakete akusikeje, kainak yes, kwape kolo alimokinia Musa.

⁴ Ameuni kamodiŋ, ka Lebanon lo, aitodol ocor lokapolon, ecor Eupurat, akwap kere naka Ikitin, kiton aŋolol nati ape neelomanari akoloŋ, ŋes eraun ekusiikor;

⁵ Emameun ituŋanan kere yenepedori abwoikin jo apaarasia kere nuka akoniijar: kwape ajaar kolo ka Musa, ajaikin kwape kwaŋin kajo da: mam ketukurwori jo, karaida aijal.

⁶ Kicat, kotitiŋior, naarai isurumi ijo ituŋa lu akwap nakolo eyapoikin ainakin lukapapaakec.

⁷ Konye kicat ber kotitiŋior noi, aricit aswam kwape ejaatar ikisila lu, lukicorakini ekakejaanakinan Musa: siripaanari kakan nakoteten karaida kediany, tetere irereŋior kama ilosenenei kere.

⁸ Eitabo lo loka ikisila sirenyoununei kaitukukon, konye koomoomoenenei ŋes paaran ka akuare da, tetere iricit aswam kere kwape ejaatar nuiwadikatai toma: naarai kwaŋin ŋes erereŋior ekonirot, ikerianaror da;

⁹ Mere eoŋ kecorak jo? Kicat, kotitiŋior; sirikikurianar karaida aiyaloŋoŋ: naarai ejai EJAKAIT Ekonideke kajo kama ilosenenei kere.”

¹⁰Kosodi kicorak Yosua ijaka luka ituŋa atiar,

¹¹ “Kitoro kidiŋ oidukurun, kicorakis ituŋa atiar, ‘Kitemonokisi inyamat, naarai eriŋa apaarasia auni etuboro idokete ecor lo Yorodan, alomar airum akwap, nakiinakini EJAKAIT Ekusideke airum.’ ”

¹² Abu Yosua kolimok Ireubenin ka Igadin, ka atutubet naka ateker naka Manase ebe,

¹³ “Kiitutu akirot nakicorakini yes Musa ekejaanakinan loka EJAKAIT, ebe, ‘EJAKAIT Ekusideke kiinakini yes aiyeŋun, kiinakini da akwap na.’

¹⁴Akusiŋor, ka ikusidwe, ka ikusibaren, iboikinos akwap nakiinakini Musa kokekwa loka Yorodan; konye yes idokarete kakonyen nuka iinacanakus ikapitos lujiis, ituŋa kere lukirigin, luetitiŋ, iŋarakinete kes:

¹⁵ Aitodol naedaunia EJAKAIT aisiyeŋun ikusiinacan, kwape yes, ido kedaut kesi da airum akwap naeinakini EJAKAIT Ekusideke, kosodete iboŋorete kirumata akwap naka airumetekus, nakiinakini Musa ekejaanakinan loka EJAKAIT kokekwa loka Yorodan mape elomununia akoloŋ.”

¹⁶Koboŋokis Yosua ebe, “Kere nukicorak ijo sio kiswamai, ido kere nekijukanari kilosenenei.

¹⁷ Kwape kiipupenenoo Musa kakiro kere, kipupenenei jo da kwape kwaŋin: konye kojai EJAKAIT Ekonideke kajo, kwape kejaar ka Musa.

¹⁸Ŋinituŋanan kere yenipaliikini akoniicorakinet, ido yenimam epupenenei akonikiro kere nuicorakini ŋes, eareneneo: konye kicat, kotitiŋior.”