Read Ebaibuli 1961 Yosua 10 Bible Online

Yosua 10 - Ebaibuli 1961 bible

Yosua 10

¹ Kosodi kanen kepupu Adoni-sedek ekabaka loka Yerusalem ebe erum Yosua Ai, ebe da amudia cut ŋes; kwape eswamakinitor Yeriko ka ekabakake, abu kiswamak kwaŋin Ai ka ekabakake; ebe da apotu lueboiete koGibeon kopucoto ka Isirael, ejaas da mamakec;

² Apotu kokuriakata noi, naarai kerai Gibeon ere loapol, kwape ediopet koreria luajaas ikabakan, ido naarai apol adepar Ai, ituŋake da kere araas lukirigin.

³ Kanuka ŋun kijuka Adoni-sedek ekabaka loka Yerusalem, mama ejai Kokam ekabaka loka Keburon, ka Piram ekabaka loka Yaramut, ka Yapia ekabaka loka Lakis, ka Debir ekabaka loka Egilon, kobala ebe,

⁴ “Kopotu neajai, keŋarakis, kadanyata Gibeon: naarai apucoto ka Yosua ka idwe luka Isirael.”

⁵ Kanuka ŋun kotukokinos ikabakan ikany luka Imorain, ekabaka loka Yerusalem, ka ekabaka loka Keburon, ka ekabaka loka Yaramut, ka ekabaka loka Lakis, ka ekabaka loka Egilon, koloto kesi ka ajoresiokec kere, kidukuroto asurokin Gibeon, kitijioto ŋes.

⁶ Kijukakis ituŋa luka Gibeon Yosua koidukurun Giligal, ebe, “Sirikijalakin akonikan ainyein ikonikejaanakinak; kiwonyuni mamakosi, kitajar sio, kiŋarak da; naarai atukonokinos ikabakan kere luka Imorain luiboiete kakwap nakiukon aitiji sio.”

⁷ Konyou Yosua koGiligal, ŋes ka iketuŋa lukajiok, ka ituŋa kere lukirigin luetitiŋ.

⁸ Kotema EJAKAIT Yosua atiar, “Sirikikurianar kes: naarai ejaik kes akanikon; mam ediotuŋanan kakesi kibwoikini jo.”

⁹Kitiut kesi edolokini kes Yosua; naarai alosi anyoun koGiligal akuare kiya.

¹⁰ Kisiara EJAKAIT kes kakonyen nuka Isirael, kodany kes kaario naepol koGibeon, korukio kes korot loedokarere Betkoron, kodany kes kiton Aseka, kiton Makeda da.

¹¹ Kosodi kanen ekerete kesi kakonyen nuka Isirael ijesaros kesi koBet-koron, kitetep EJAKAIT amor nuepolok nuapote kokuju mamakec kiton Aseka, kotwakata; epu luaari akak adepar kwi luaarete idwe luka Isirael kekileŋ.

¹² Kosodi Yosua atemar EJAKAIT kapaaran naejaikinia EJAKAIT ŋes Imorain kakonyen nuka idwe luka Isirael; kotema kakonyen nuka Isirael atiar, “Akoloŋ, kobwou ijo koGibeon; Ijo da, Elap, kaditot naka Aiyalon.”

¹³ Kobwou akoloŋ, kosalak elap, Aitodol naenyaŋia ateker kama ejaas lukasurupokec. Mere iwadikatai ŋin oitabo loka Yasar? Kosalak akoloŋ kidiŋ akuj, komam iwonyari alomar bala apaaran kere.

¹⁴ Ido amamei apaaran naaputos kaŋin apeŋo karaida ameun kaŋin, naapupunio EJAKAIT eporoto loka etuŋanan: naarai EJAKAIT ajiikinit Isirael.

¹⁵Koboŋo Yosua, ka Isirael kere kaŋes, Giligal oidukurun.

¹⁶Kokerata ikabakan ŋul ikany, koŋopata kotoma abua koMakeda.

¹⁷Kolimokinai Yosua ebe, “Adumun ikabakan lukany, eŋopito kabua koMakeda.”

¹⁸Kotema Yosua atiar, “Kikokorikisi amor nuepolok aituk naka abua, kibwaikis ituŋa aidar kes:

¹⁹Konye yes sirikipaikis; kodapata lukasurupokus, kodanyata lukec lukokau; sirikicamakis kes alomar oreriakec: naarai ejaiki EJAKAIT Ekusideke kes akanikus.”

²⁰Kosodi kanen, kedau Yosua ka idwe luka Isirael aiar kes kajar naepol, aitodol neamudiarere, nealomariata da luedeuna kakesi oreria luabwaitai.

²¹ Koboŋosi ituŋa kere Makeda oidukurun neajai Yosua kainapakina: mam idio yenabu kipen akeŋajep amoromoroo idwe luka Isirael.

²²Kosodi Yosua atemar ebe, “Kopukosi aituk naka abua, kitolomut ikabakan ŋul ikany koyaut mama ajai.”

²³Kiswamata kesi kwaŋin, kitolomut ikabakan ŋul ikany kabua mama ejai ŋesi, ekabaka loka Yerusalem, ka ekabaka loka Keburon, ka ekabaka loka Yaramut, ka ekabaka loka Lakis, ka ekabaka loka Egilon.

²⁴ Kosodi kanen, kitolomut kesi ikabakan ŋul neajai Yosua, konyarau Yosua ituŋa kere luka Isirael, kotema ijaka luka ituŋa lukajiok lualosito kaŋes atiar, “Kikunyutu, kidokokis akusikeje omurisiŋa luka ikabakan kalu.” Kikunyut, kidokokis akecekeje omurisiŋakec.

²⁵ Kotema Yosua kes atiar, “Sirikikuriakata, karaida aiyaloŋoŋ; kicata, kotitiŋioros: naarai iswamakini EJAKAIT kwaŋin lukasurupokus kere luitijiete yesi.”

²⁶ Akaulo kaŋun kodany Yosua kes, koara kes, komiedanak kes okito ikany: kijekos kokito kiton eboŋ.

²⁷ Kosodi kanen, kapak naalomaria akoloŋ kicorak Yosua, koŋedununai kes kokito, kocakanakinai abua naaŋopitotor, kibwaikinai amor nuepolok aituk naka abua, kiton lolo.

²⁸ Kirum Yosua Makeda kapaaran kaŋin, kodany lukore kaŋol ka ekabakakec kakwanis naka ekileŋ; komudia kes cut ka ituŋa kere luajaas toma, komam ideuni idio da: kiswamak ekabaka loka Makeda kwape eswamakinia ekabaka loka Yeriko.

²⁹ Konyou Yosua koMakeda, ka Isirael kere nepepe kaŋes, kitor Libuna, kitiji lukoLibuna:

³⁰Kijaik EJAKAIT kes da, ka ekabakakec akan naka Isirael; kodany kes kakwanis naka ekileŋ, ka ituŋa kere luajaas toma; komam ideuni idio da kotomakeŋ, kiswamak ekabakake kwape eswamakinia ekabaka loka Yeriko.

³¹ Konyou Yosua koLibuna, ka Isirael kere nepepe kaŋes, kitor Lakis, kidukur asurokin kes, kitiji:

³²Kijaik EJAKAIT Lakis akan naka Isirael, kirum ŋes apaaran nakiareit, kodany kes kakwanis naka ekileŋ, ka ituŋa kere luajaas tomake, kwape ajaatar kere nueswamakinit Libuna.

³³ Kobu Koram ekabaka loka Geser aiŋarakin Lakis; kodany Yosua ŋes ka iketuŋa, aitodol neamamuunor yenedeikina ŋes.

³⁴Konyou Yosua koLakis, ka Isirael kere nepepe kaŋes, kitor Egilon; kidukuroto asurokin kes, kitijioto kes;

³⁵Kirumata ere kapaaran kaŋin, kodanyata kes kakwanis naka ekileŋ, komudia cut kapaaran kaŋin ituŋa kere luajaas toma, kwape ajaatar kere nueswamakinit Lakis.

³⁶ Konyou Yosua koEgilon, ka Isirael kere nepepe kaŋes, kitor Keburon, kitijioto kes:

³⁷Kirumata ere, kodanyata kes kakwanis naka ekileŋ, ka: ekabakakec, ka ireriakec kere, ka ituŋa kere luajaas toma; komam ideuni idio, kwape ajaatar kere nueswamakinit Egilon; konye abu komudia cut ere, ka ituŋa kere luajaas toma.

³⁸ Koboŋo Yosua, ka Isirael kere nepepe kaŋes Debir; kitiji kes:

³⁹Kirum ere ka ekabakake, ka ireriake kere; kodanyata kes kakwanis naka ekileŋ, komudiasi cut ituŋa kere luajaas toma; komam ideuni idio da: kwape eswamakinia Keburon, abu kiswamak kwaŋin Debir, ka ekabakake; kwape eswamakinia Libuna ka ekabakake.

⁴⁰ Kwaŋin kodany Yosua luka akwap kere, luka akwap nakiukon, ka Eŋalakimak, ka apuutona, ka neijululue, ka ikabakanakec kere; komam ideuni idio da: konye komudia cut kere lueyeŋas, kwape ecorakinitor EJAKAIT, Edeke loka Isirael.

⁴¹ Kodany Yosua kes anyoun koKades-barunea kiton Gasa, ka akwap kere naka Gosen, kiton Gibeon.

⁴² Kimoria Yosua airum ikabakan ŋul kere ka akecekwap, naarai ajiikinit EJAKAIT, Edeke loka Isirael, Isirael.

⁴³Koboŋ Yosua, ka Isirael kere nepepe kaŋes, oidukurun Giligal.