Read Ebaibuli 1961 Yosua 11 Bible Online

Yosua 11 - Ebaibuli 1961 bible

Yosua 11

¹ Kosodi kanen, kepupu Yabin ekabaka loka Kasor ŋun, kijukak Yobab ekabaka loka Madon, ka ekabaka loka Simuron, ka ekabaka loka Akisap.

² Ka ikabakan luajaas ari naka agolitomei, akwap nakiukon, ka Araba ari naka eŋalakimak naka Kinerot, ka apuutona, ka amukuran nuka Dor kari nakoto.

³ Mama ejai Ekanaanit loejai ari nakokide ka nakoto, ka Emorait, ka Ekitit, ka Eperisit, ka Eyebusit kakwap nakiukon, ka Ekibit kwap ka Kerumon kakwap naka Misipa.

⁴ Kolomasi kesi ka ajoresiokec kere nepepe kakes, ituŋa luipu, aipuesukec kwape kasiŋe naejai ariri naka aŋolol, kojaas kibalasin ka agalin nuipu noi.

⁵Kiriamunos ikabakan ŋul kere; kopotu kidukuroto nepepe ariri naka akipi nuka Merom, aitiji Isirael.

⁶Kotema EJAKAIT Yosua atiar, “Sirikikurianar kes: naarai moi kosawa kalo ejaikini kes aario kakonyen nuka Isirael: itaŋwali ibalasinikec, icwei agalinikec.”

⁷Kitiut kesi ebuni Yosua ka ituŋa kere lukajiok nepepe kaŋes, asurokin kes kariri naka akipi nuka Merom, kitiji Isirael kes.

⁸Kijaik EJAKAIT kes akan naka Isirael, kodanyata kes, kodapata kes kiton Sidon lokapolon, kiton Miserepot-maim, kiton aditot naka Misipe kari nakokide; kodanyata kes, aitodol neamamuunor idio da yenedeikinitai kes.

⁹Kiswamak Yosua kes kwape kicorakinia EJAKAIT ŋes: abu kitaŋwal ibalasinikec, kicwe da agalinikec.

¹⁰Koboŋo Yosua kapak kaŋin, kirum Kasor, koar ekabakake kekileŋ: naarai Kasor lem apolokinit ajakanuto ŋun kere.

¹¹Kodanyata ituŋa kere luajaas toma kakwanis naka ekileŋ, komudiasi kes cut: amamei yeneyeŋa yenedeunitai: kicwe Kasor kakim.

¹² Abu Yosua kirum ireria kere luka ikabakan kaŋul, ka ikabakanakec kere, kodany kes kakwanis naka ekileŋ, komudia kes cut; kwape ecorakinitor Musa ekejaanakinan loka EJAKAIT.

¹³Konye ireria luadukokinitai otutiokec, mam Isirael abu kicwe edio kakesi, dimarai Kasor bon; ŋes abu Yosua kicwe.

¹⁴Apotu idwe luka Isirael koyaŋaasi luŋatuna koreria kaŋul, ka ibaren; konye apotu kesi koarata ŋinituŋanan kakwanis naka ekileŋ, aitodol neamudiariata kes, komam ideunete yeneyeŋa kere.

¹⁵ Kwape ecorakinitor EJAKAIT Musa ekejaanakinanike, abu Musa da kicorak Yosua kwaŋin: kiswama Yosua kwaŋin; mam abu kinyek adiokirot kakiro kere nuecorakinit EJAKAIT Musa.

¹⁶ Kirum do Yosua akwap ŋin kere, akwap nakiukon, ka Eŋalakimak kere, ka akwap kere naka Gosen, ka apuutona, ka Araba, ka akwap nakiukon naka Isirael, ka apuutona nuka akwap kaŋin;

¹⁷ Ageun komoru Kalak, loedolit Seir, kiton Baal-gad kaditot naka Lebanon kwap kemoru Kerumon: koyaŋa ikabakanakec kere, kodany kes cut.

¹⁸Kodau Yosua apak naepol itijiei ikabakan ŋul kere.

¹⁹ Amamei ere loabu kitutuk nukainapakin kidwe luka Isirael, dimarai Ikibin luiboiete koGibeon: koyaŋaasi kere kojie.

²⁰ Naarai etogogoŋit EJAKAIT ikecetauon, aitiji Isirael, tetere emudiari kes cut, kinyeis adumun asianut, konye tetere emudiari kes, kwape ecorakinitor EJAKAIT Musa.

²¹ Kobu Yosua kapak kaŋin, komudia Anakim kakwap nakiukon, koKeburon, koDebir, koAnab, kakwap kere nakiukon naka Yuda, kakwap kere da nakiukon naka Isirael; abu Yosua komudia kes cut ka ireriakec.

²² Amamei edio luka Anakim loedeunitai kakwap naka idwe luka Isirael; konye edeuna ice koGasa, koGat da ka Asudod.

²³ Kwaŋin kirum Yosua akwap kere, kwape ajaatar kere nuabu EJAKAIT kolimok Musa; abu Yosua koinak Isirael akwap araun airumet kwape atiakanakinitere kes katekerinikec, Kiyeŋu akwap ejie.