Read Ebaibuli 1961 Yosua 17 Bible Online

Yosua 17 - Ebaibuli 1961 bible

Yosua 17

¹ Lo ŋes eroet loabeit ateker naka Manase; naarai ŋes arai ekiyai loka Yosep. Naarai arai Makir ekiyai loka Manase, papa loka Gilead, etuŋanan lokajiot, ŋes akorakinere Gilead ka Basan.

² Abeit eroet idwe kere luka Manase luedeuna kwape ajaatar ikekiakec; idwe luka Abieser, ka idwe luka Kelek, ka idwe luka Asuriel, ka idwe luka Sekem, ka idwe luka Keper, ka idwe luka Semida: ŋul kes idwe lukiliok luka Manase okoku loka Yosep kwape ajaatar ikekiakec.

³ Konye Selopekad, okoku loka Keper, okoku loka Gilead, okoku loka Makir, okoku loka Manase, amameete idwe lusap, dimarai apesur: lu kes ikiroria luka adweke, Mala, ka Noa, ka Kogila, ka Milika, ka Tirusa.

⁴ Apotu kesi kikunyut akonyen nuka Eleasar esasedoti, akonyen nuka Yosua okoku loka Nun, akonyen da nuka ikapolok, kotemasi atiar, “Abu EJAKAIT kicorak Musa akorakin sio airumet kama ejaas iinacanakosi:” kanuka ŋun abu kokorak kes airumet kama ejaas iinacan luka papakec kwape ajaar aicorakinet naka EJAKAIT.

⁵Kobeata Manase atutubeta atomon, kogelara akwap naka Gilead ka Basan, naejai okekwa loka Yorodan;

⁶ Naarai adumunito adwe nuka Manase airumet kama ejaas odweke: akwap da naka Gilead arai naka odwe luka Manase kere luedeuna.

⁷Ageunit eikor loka Manase koAser kiton Mikimetat, loitei Sekem; kitor eikor akan nakoteten, kiton neajaas lueboiete koEn-tapua.

⁸ Korai akwap naka Tapua naka Manase: konye Tapua loejai oikor loka Manase korai loka idwe luka Epuraim.

⁹ Kijesar eikor kiton aguurut naka Kana, ari naka eŋalakimak naka aguurut: araas ireria lu luka Epuraim koreria luka Manase: ajai eikor loka Manase ari naka agolitomei naka aguurut, kosaŋ aŋolol:

¹⁰Kari naka eŋalakimak korau naka Epuraim, kari da naka agolitomei korai naka Manase, aŋolol ŋes arai eikorukec; kodolokis Aser kari naka agolitomei, ka Isakar kari nakokide.

¹¹ Adumunit Manase kotoma Isakar ka Aser Bet-sean ka ireriake, Ibileam ka ireriake, ka lueboiete koDor ka ireriake, ka lueboiete koEn-dor ka ireriake, ka lueboiete koTaanak ka ireriake, ka lueboiete koMegido ka ireriake, kes amukuran auni.

¹² Konye mam idwe luka Manase apotu kopedosi aireŋear lueboiete koreria kaŋul; konye kiketakinos Ikanaanin aiboi kakwap kaŋin.

¹³ Kosodi kanen, kegogoŋioto idwe luka Isirael, apotu kitaraut Ikanaanin ikeswamak lukailolitoi, komam ireŋearere kes cut.

¹⁴ Kotemasi idwe luka Yosep Yosua atiar, “Kanukinyo kitebea ijo eoŋ eroet ediopet, ka atutubet adiopet araun airumeteka, kwabo kirai isio ituŋa luipu, naarai kisirereŋ EJAKAIT sio kiton lolo?”

¹⁵Kotema Yosua kes atiar, “Arai iraasi yesi ituŋa luipu, koloto yesi amagoro, kojeput yesi kanen akwap naka Iperisin, ka Irepaim; naarai kididiŋikinit yes akwap nakiukon naka Epuraim.”

¹⁶ Kotemasi idwe luka Yosep atiar, “Kikadit isio akwap nakiukon: Ikanaanin da kere luiboiete kakwap naka aditot ejaas agalin nuka asua, ŋul luejaas Bet-sean ka ireriake, ka ŋul da luejaas aditot naka Yesereel.”

¹⁷Kotema Yosua ekal loka Yosep, ŋes Epuraim ka Manase atiar, “Iraasi yesi ituŋa luipu, epol da agogoŋ: mam kitebeo edioperoet bon:

¹⁸ Konye do eraun akwap nakiukon nakus; karaida kerai amagoro, ijepunete yesi ŋes, eraunos da awaitinike nukus: naarai ireŋearete yesi Ikanaanin, karaida kejaas kes agalin nuka asua, karaida kegogoŋ kesi.”