Read Ebaibuli 1961 Yosua 18 Bible Online

Yosua 18 - Ebaibuli 1961 bible

Yosua 18

¹ Kotukonokin ekodet kere loka idwe luka Isirael Silo, kosipokis nen ewema loka airiamunun: kononokik kes akwap.

²Asalito atekerin akanykaarei kodwe luka Isirael numam ber akorokoroto airumetekec.

³ Kotema Yosua idwe luka Isirael atiar, “Itodolete yesi ai ikalanyaka alomar airum akwap nakiinak yes EJAKAIT Edeke loka lukapapaakus?

⁴Koseutu yesi ituŋa iuni kaŋiniteker: kejuka kes, enyounete, itorete akwap kere, iwadikaete kesi kwape eputor kwape ejaar airumetekec; eboŋunete neajai.

⁵ Ekorokoroete akwap atutubeta akanykaarei; iboikini Yuda oikoruke kari naka eŋalakimak, ekal da loka Yosep iboikini oikorukec kari naka agolitomei.

⁶ Iwadikaete kwape eputor akwap kotoma atutubeta akanykaarei, koyaut nuiwadikaete mama ajai eoŋ: kelamilamakini eoŋ yes eroet kane kakonyen nuka EJAKAIT Ewokodeke.

⁷ Naarai amamei Ilebin akorakinet kamakus; naarai esasedotene loka EJAKAIT ŋes airumetekec: adumut Gad ka Reuben ka atutubet naka ateker naka Manase airumetekec kokekwa loka Yorodan kari nakokide, naainakini kes Musa ekejaanakinan loka EJAKAIT.”

⁸Konyout ituŋa koloto: kicorak Yosua ŋul lualosete aiwadik akwap ebe, “Koloto kitoro akwap kere, kiwadikata kwape eputor, koboŋut neajai, kelamilamakini eoŋ yes eroet kane koSilo kakonyen nuka EJAKAIT.”

⁹Koloto ituŋa, kitoro akwap kere, kiwadikata oitabo kwape eputor koreria, kotoma akorakineta akanykaarei, kopotu neejai Yosua oidukurun Silo.

¹⁰ Kilamilamak Yosua kes eroet koSilo kakonyen nuka EJAKAIT: kokorokor Yosua akwap kanen mama ejaas idwe luka Isirael kwape atiakanakinitere kes.

¹¹Kobe eroet ateker naka idwe luka Benyamin kwape ajaatar ikekiakec: kojai eikor loka eroetekec kidiŋ idwe luka Yuda ka idwe luka Yosep.

¹² Kari naka agolitomei ageunit eikorukec koYorodan; kobe eikor osiep loka Yeriko kari naka agolitomei, kitor akwap nakiukon kari nakoto; kosaŋ amodiŋ naka Bet-aben.

¹³ Kitor eikor nen kiton Lus, airirikina Lus (ŋopeŋol ŋes Bet-el), kari naka eŋalakimak; kijesar eikor kiton Atarot-adar, ariri naka eroŋat loejai ari naka eŋalakimak naka Bet-koron loijesara.

¹⁴ Kigirunai eikor kokudo kari nakoto ari naka eŋalakimak ageun koroŋat loejai kiŋaren ka Bet-koron kari naka eŋalakimak; kosaŋ Kiriat-baal (ŋopeŋol ŋes Kiriat-yearim), ere loka idwe luka Yuda: ŋol ŋes ewai lokoto.

¹⁵ Ewai da loka ari naka eŋalakimak ageunit katutubet naesaŋit Kiriat-yearim, kitor eikor ari nakoto, kiton atan naka akipi nuka Neputoa:

¹⁶ Kijesar eikor atutubet naesaŋit eroŋat loejai kiŋaren kaditot naka okoku loka Kinom, loejai aditot naka Repaim kari naka agolitomei; kijesar kiton aditot naka Kinom, kiton osiep loka ari naka eŋalakimak loka Eyebusit, kobe En-rogel;

¹⁷ Kigirunai kari naka agolitomei, kitor En-semes, kobe Gelilot, loitei needokarere Adumim; kijesar kiton amoru naka Bokan okoku loka Reuben;

¹⁸Kiriria osiep loka Araba kari naka agolitomei kijesar kiton Araba:

¹⁹Kiriria eikor osiep loka Bet-kogila kari naka agolitomei agor naka Aŋolol naka Abalaŋ, osaŋe loka Yorodan kari naka eŋalakimak: ŋol ŋes eikor loka ari naka eŋalakimak.

²⁰Korai Yorodan eikoruke kowai lokokide. Ŋin ŋes airumet naka idwe luka Benyamin, kwape ejaatar iikorunokec luelukunito, kwape ejaatar ikekiakec.

²¹ Ireria luka ateker naka idwe luka Benyamin, kwape ejaatar ikekiakec kes Yeriko, ka Bet-kogila, ka Emek-kesis;

²²ka Bet-araba, ka Semaraim, ka Bet-el;

²³ka Abim, ka Para, ka Opura;

²⁴ ka Keparamoni, ka Opuni ka Geba; ireria itomon ka luarei ka ireriakec ludidik:

²⁵Gibeon, ka Rama, ka Beerot;

²⁶ka Misipe, ka Kepira, ka Mosa;

²⁷ka Rekem, ka Iripeel, ka Tarala;

²⁸ ka Sela, ka Elep, ka Eyebusit (ŋopeŋol ŋes Yerusalem), ka Gibeat, ka Kiriat; ireria itomon ka luoŋon ka ireriakec ludidik, ŋin ŋes airumet naka idwe luka Benyamin kwape ejaatar ikekiakec.