Read Ebaibuli 1961 Yosua 2 Bible Online

Yosua 2 - Ebaibuli 1961 bible

Yosua 2

¹ Kijuka Yosua okoku loka Nun ituŋa iarei anyoun koSitim airot akwap kaiyeiyea, kobala ebe, “Koloto korota akwap, ka Yeriko.” Apotu koloto kodoloto togo loka naadote ekekiror Rakab, koperoto nen.

² Kolimokinai ekabaka loka Yeriko ebe, “Koany, elomunito ituŋa ne luka idwe luka Isirael akuare na airot akwap,”

³Kijukak ekabaka loka Yeriko Rakab atiar, “Kitolom ituŋa lueponito neijai ijo, lualomasi togokon: naarai eponito airot akwap kere.”

⁴ Koyaŋa aberu ituŋa ŋul luarei, kibwa kes; kotema atiar, “Eebo, aponito ituŋa neajai eoŋ, konye mam ajeni neaponiata:

⁵Kosodi kapak naagolere erute, kemutonor akwap, apotu ituŋa kolomasi: mam ajeni neapotu koloto: aso kibwapakisi kes atipet; naarai idolokinete kes.”

⁶ Konye abu ŋesi koyaŋa kes oswi, kibwa kes kakopit nuka abirai nualoikinit ŋesi oswi.

⁷Kibwapata ituŋa kes korot loebei Yorodan, kiton odoket: napelomarete luebwapito kes kiŋa kogolokinoi erute.

⁸Eroko kes kepero, abu aberu kolot oswi neajaas kesi;

⁹ Kotema ŋesi ituŋa atiar, “Ajeni ebe kiinak EJAKAIT yes akwap, kibunok da isio etasurokus, luiboiete kakwap kere eburunito kakonyenekus.

¹⁰ Naarai kipupu kwape etoonio EJAKAIT akipi nuka Aŋolol Nakareŋan kakonyenekus, nailomuniata koMisiri; ka nuipotu yesi kiswamakis ikabakan iarei luka Imorain, luajaas okekwa loka Yorodan, kes Sikon ka Og, luipotu yesi komudiasi cut.

¹¹ Napekipupunio isio ŋun, apotu ikositauon koburut, kipirisiar etau loka ŋinituŋanan kanukus: naarai EJAKAIT Ekusideke, ŋes Edeke kokuju toma akuj, kokwap da toma akwap.

¹² Aso do, keŋaiŋait, kiyapoikinoi eoŋ, kolimitos EJAKAIT, naarai kekonak yes nukasianut, yes da kikonakis ekaloka papaka nukasianut, koinakis eoŋ aanyunet nakabeit:

¹³Ebe itajarete papaka; ka totoka, ka iinacanaka, ka ainacanaka, kere da luejaatar kesi, iyuunete aijarakosi kotoma atwanare.”

¹⁴ Kotemasi ituŋa ŋes atiar, “Akosiijar itia nakus, arai mam ilimorete akosikiro nu; ejaun do ebe, nakiinakinia EJAKAIT sio akwap, kikonakini jo nukasianut ka nukabeit.”

¹⁵ Kosodi do ŋesi aijoluluun kes kauno kadirisa; naarai ajai etogoke arwatat naka ere, kiboienenei ŋesi karwatat.

¹⁶Kotema kes atiar, “Kodokasi oroŋat, kinyeis lukibwapito adumun yes; koŋopata kanen apaarasia auni aitodol naeboŋunioto lukibwapito: akaulo kaŋun ilosete konyet.”

¹⁷ Kotemasi ituŋa ŋes atiar, “Emamuunete nukibeikinete sio kanuka aiyapositikon na nakisiyapo ijo sio.

¹⁸ Koany, nakilomunia isio akwap, ienikini auno na nakareŋan adirisa nakijolulunio ijo sio: itukokini papakon ka totokon ka iinacanakon, ka lukokaloka papakon kere togo mama ijai.

¹⁹ Ejaun do ebe, ŋin yenelomuni kotogokon alosit orot, ejaunos aokotoke akouke, emamuunete nukibeikinete sio: ŋin yenejai kajo togo, ejaunos aokotoke akoukosi, arai kesuroki ŋes adiokan.

²⁰Konye arai kilimo ijo akosikiro nu, emamuunete do nukibeikinete sio kanuka aiyapositikon nakisiyapo sio.”

²¹Kotema ŋesi atiar, “Kikote nepenen, kwape ejaatar akusikiro.” Kotwar kes, konyout: koenik auno nakareŋan adirisa.

²²Koloto, kodoloto oroŋat, kiboikinos nen apaarasia auni, aitodol naaboŋunioto lukibwapito: komoata lukibwapito kes orot kere, konye mam apotu kodumut kes.

²³Kosodete ituŋa luarei aboŋor, kodokut koroŋat, kikwaŋaros, kodoloto neajai Yosua okoku loka Nun; kolimokis ŋes kere nuapotu kodoikis kes.

²⁴ Kotemasi Yosua atiar, “Abeit kijaik EJAKAIT akwap kere akaniniwok; bobo da eburunito luiboienenete kakwap kakonyenewok.”