Read Ebaibuli 1961 Yosua 20 Bible Online

Yosua 20 - Ebaibuli 1961 bible

Yosua 20

¹ Kotema EJAKAIT Yosua atiar,

² “Kolimok idwe luka Isirael ebe, Koseutu yesi ireria lukuianara, luabu kalimok yes kama ka Musa:

³Tetere ikaaran yeneari ituŋanan komam epeleikinit, komam ejeni da, ekereari ŋina: eraunos kamakus luikuianarete kaneejai ekenyaŋaran aokot.

⁴ Ekereari ore ediopet koreria kaŋul, ebwoi korute loka ere, kosodi alimokin imakio luka ere kaŋol akekiro; itolomarete kesi ŋes ore mamakec, einakinete ŋes aibois, tetere iboikin mamakec.

⁵ Arai kedap ekenyaŋaran aokot ŋes, mam kes ijaikinete ekaaran mamake: naarai aar ekeidunyet komam ejeni, komam lem da elait ŋes.

⁶ Iboikin ore ŋol aitodol naebwoia atubokinio kakonyen nuka ekodet, aitodol da naetwania esasedoti lopeti lokejai kapaarasia kaŋun: ŋes konyet eboŋunio ekaaran, ebunio da oreke, togoke, ore loakerea.”

⁷ Kotiakut Kades koGalilaya kakwap nakiukon naka Naputali, ka Sekem kakwap nakiukon naka Epuraim, ka Kiriat-araba (ŋopeŋol ŋes Keburon) kakwap nakiukon naka Yuda.

⁸ Kokekwa loka Yorodan da koYeriko kari nakokide, apotu koseut Beser kamodiŋ kapuuton naka ateker naka Reuben, ka Ramot koGilead naka ateker naka Gad, ka Golan koBasan naka ateker naka Manase.

⁹ Ŋul kes ireria luaseikinitai idwe kere luka Isirael ka imoit yeneboie kamakec, tetere ŋinituŋanan yeneari ituŋanan komam epeleikinit ekereari ŋina, komam ekenyaŋaran aokot eari ŋes, aitodol naebwoia kakonyen nuka ekodet.