Read Ebaibuli 1961 Yosua 23 Bible Online

Yosua 23 - Ebaibuli 1961 bible

Yosua 23

¹ Kosodi ketuboros apaarasia nuipu, kisiyeŋu EJAKAIT Isirael kama kalukasurupokec kere lualukunito, komojoŋite Yosua kokokosanite da noi;

² Abu Yosua konyarau Isirael kere, imakiokec ka ikapolokokec, ikatubokokec, ka ijakakec, kotema kes atiar, “Amojoŋ eoŋ akokosanit da noi:

³Ianyut yesi kere nuabu EJAKAIT Ekusideke kiswamak atekerin nu kere kanukus; naarai EJAKAIT Ekusideke ŋes ŋol lokijiik yes.

⁴Koany, kainak yes atekerin nu nuideuna, araun airumet naka atekerinikus, ageun koYorodan, katekerin kere nuamudia eoŋ, kiton aŋolol nakapolon kari naelomaria akoloŋ.

⁵ Eremori EJAKAIT Ekusideke kes kakonyenekus, ireŋeari kes kakonyenekus; irumete yesi akecekwap, kwape kilimokinitor EJAKAIT yes.

⁶ Aso kotitiŋioto noi aidar aiswamaenen kere nuiwadikatai oitabo loka ikisila luka Musa, kinyeis apaar teten arai kediany;

⁷ Tetere mam imorikikinos katekerin nu, nuideuna kamakus; karaida alimit ekiror loka idekesiokec, karaida aiyapo kolimito kes, karaida aijaanakin kes, karaida akukonokin kes:

⁸ Konye kimorikikinos ka EJAKAIT Ekusideke, kwape kiswamaata kiton lolo.

⁹ Naarai ereŋea EJAKAIT atekerin nukapolok nukagogoŋ da kakonyenekus: konye yes, emamei etuŋanan lokibwoikinit yes kiton lolo.

¹⁰ Ediopetuŋanan kayesi erukoria elukumit: naarai EJAKAIT Ekusideke, ŋes ŋol lokijiik yes, kwape kilimokinitor.

¹¹Kocoito do noi yesi, kominenenas EJAKAIT Ekusideke.

¹² Naarai arai kiboŋosi yesi, aimorikikin kaluideuna luka atekerin kanu, kes luideuna kamakus, kosodete amanyanakin kakes, kolomasi da mamakec, kes da mamakus:

¹³ Kojenutu cut ebe mam bobo EJAKAIT ireŋeari atekerin nu kakonyenekus; konye eraunos atacit ka eic kamakus, ka edoi kosiepionokus, ka ikukwa kakonyekus, aitodol nakimudiarere yes kakwap kana naejok nakiinak yes EJAKAIT Ekusideke.

¹⁴ “Ido koany, alosi lolo eoŋ neelosenenete lukakwap kere: ijenete yesi kotauonokus kere, ka aijarakus kere ebe emamei akirot namam edolit kakiro kere nuejok nuabu EJAKAIT Ekusideke kolimitor yes; adoloto kere, emamei akirot adiopet namam edolit.

¹⁵ Kosodi kanen, kwape kidolokinioto yes nukajokak kere nuabu EJAKAIT Ekusideke kolimokinite yes, kijukakini EJAKAIT yes kwaŋin nukaronok kere aitodol nakimudiaria yes kakwap kana naejok nakiinak EJAKAIT Ekusideke.

¹⁶Naibucariata aitutuket naka EJAKAIT Ekusideke naabu kicorak yes, kosodete alosit aijaanakin icedekesio ka akukonokin kes; inepuni do anyunyura naka EJAKAIT aluikin yes, kimudiario yes atipet kakwap naejok nakiinak ŋesi yes.”