Read Ebaibuli 1961 Yosua 24 Bible Online

Yosua 24 - Ebaibuli 1961 bible

Yosua 24

¹ Kotukok Yosua atekerin kere nuka Isirael Sekem, konyarau imakio luka Isirael, ka ikapolokokec ka ikatubokokec, ka ijakakec; kitodiaros akonyen nuka Edeke.

² Kotema Yosua ituŋa kere atiar, “Inera EJAKAIT, Edeke loka Isirael kwanata ebe, ‘Eboiete kolo lukapapaakus kokekwa loka Ecor, ŋes Tera, papa loka Aburaam, papa da loka Nakor: apotu kijaanakis icedekesio.

³ Kasodi aitonyoun papaakus Aburaam kokekwa loka Ecor, keŋarenik ŋes anatar akwap kere naka Kanaan, ketupuu aurike, kainak da ŋes Isaak.

⁴ Kainak Isaak Yakob ka Esau: kainak Esau emoru Seir airum; abu Yakob ka idweke kolototo Misiri.

⁵ Abu kejuka Musa ka Aaron, ketican Misiri, kwape ajaatar nuabu keswama kaŋina: akaulo kaŋun abu ketolom yes.

⁶ Abu ketolom lukapapaakus koMisiri: ipotu kodoloto aŋolol: kibwaput Imisirian lukapapaakus kagalin ka ikebwanenok kiton Aŋolol Nakareŋan.

⁷Kosodete kiworoto EJAKAIT, abu kibwaik amuton kidiŋikus ka Imisirian, kitoboŋik aŋolol mamakec, korapia kes; apotu akusikonye koanyut nuabu eoŋ keswama koMisiri: kiboioto da yesi kamodiŋ apaarasia nuipu.

⁸ Kasodi aitolomun yes akwap naka Imorain, lueboiete kokekwa loka Yorodan; kitijioto yes: abu kejaik kes akanikus, kirumata da yesi akecekwap; abu kamudia kes kakonyenekus.

⁹ Kosodi Balak, okoku loka Sipor, ekabaka loka Moab, anyoun asurokin Isirael; kijuka anyaraun Balaam okoku loka Beor aiken yes:

¹⁰ Konye mam abu kapupok Balaam; tape kisirereŋi yes: kwaŋin kayu yes kakanike.

¹¹ Ipotu kodokata Yorodan, kodoloto Yeriko: apotu ituŋa luka Yeriko kitijioto yes, Emorait, ka Eperisit, ka Ekanaanit, ka Ekitit, ka Egirugasit, ka Ekibit, ka Eyebusit; abu kejaik kes akaninikus.

¹² Abu kejuka ekaturuturut kiŋarenekus, loabu kireŋea kes kakonyenekus, kes ikabakan iarei luka Imorain; mere kekileŋikus karaida akabwakus.

¹³ Abu kainak yes akwap namam ipotu kitaaritos, ka ireria lumam yes kidukito, iboiete da kotoma; inyamete imusabibun ka iseitunin lumam yes kiraito.’

¹⁴ “Aso do koyoŋata EJAKAIT, kijaanakis ŋes kamunonut ka abeit: kolemasi idekesio luejaanakinete lukapapaakus kokekwa loka Ecor, koMisiri da; kijaanakisi yesi EJAKAIT.

¹⁵ Konye arai kironikinit yes aijaanakin EJAKAIT, koseutu yesi lolo loijaanakinete; arai bo idekesio luejaanakinete lukapapaakus luajaas okekwa loka Ecor, arai idekesio luka Imorain, luiboiete yesi kakwapukec: konye eoŋ ka ekakal, kijaanakini EJAKAIT.”

¹⁶Koboŋokis ituŋa ebe, “Madi akuj isio aijal EJAKAIT, aijaanakin idekesio ice;

¹⁷Naarai EJAKAIT Ewokodeke, ŋol ŋes lokitolomuni oni ka lukapapaawok kakwap nako Misiri, kotogo da loka ebulesene, loeswamai aanyuneta ŋun nukos kakonyenekosi, loabu kidar oni korot kere lokitorit, kotuŋa da kere lukipou ketoroto mamakec:

¹⁸Abu EJAKAIT kireŋea ituŋa kere kakonyenewok, kes Imorain lueboiete kakwap: kanuka ŋun kijaanakini isio da EJAKAIT; naarai erai ŋesi Ewokodeke.”

¹⁹ Kotema Yosua ituŋa atiar, “Mam yes ipedorete aijaanakin EJAKAIT; naarai erai Edeke lokalaunan; erai ŋesi Edeke lokekolo; mam isionie aibucaretakus karaida adiakaretakus.

²⁰ Arai kijalata yesi EJAKAIT, kosodete aijaanakin idekesio lumo, ibelokini do ŋesi aiswamakin yes nukaronok, kimudiari da yes, kedau ŋesi aiswamakin yes nukajokak.”

²¹Kotemasi ituŋa Yosua atiar, “Mam; konye kijaanakini isio EJAKAIT.”

²² Kotema Yosua ituŋa atiar, “Iraas yesi ikajenak kamakus ebe iseut yesi EJAKAIT aijaanakin ŋes.” Kotemasi atiar, “Kirai ikajenak.”

²³ Kotema atiar, “Aso do kolemasi idekesio lumo luejaas mamakus, kogoŋakis ikusitauon mama ejai EJAKAIT, Edeke loka Isirael.”

²⁴Kotemasi ituŋa Yosua atiar, “Kijaanakini EJAKAIT Ewokodeke, kirimari da ekeporoto.”

²⁵ Kwaŋin kitutukoto Yosua kituŋa kapaaran kaŋin, kisilak kes ekisil ka aicorakinet ko Sekem.

²⁶ Abu Yosua kiwadik akiro ŋun kere oitabo loka ekisil loka Edeke; kolem amoru naati, kosipok nen kwap kelua loedunyas kaibois nakalaunan naka EJAKAIT.

²⁷ Kotema Yosua ituŋa kere atiar, “Koany, eraun amoru na akajenan kamawok; naarai apupu akiro kere nukilimok EJAKAIT oni: eraun akajenan kamakus, kinyeis aiŋer Ekusideke.”

²⁸Kwaŋin kotwar Yosua ituŋa, kolot ŋinituŋanan airumeteke.

²⁹Kosodi kokau kaŋun, kotwana Yosua okoku loka Nun, ekejaanakinan loka EJAKAIT, korai loka ikar akwatat ka itomon.

³⁰ Kidaikisi ŋes oikor loka airumeteke Timunat-sera, loejai akwap nakiukon naka Epuraim, kari naka agolitomei naka eroŋat loka Gaas.

³¹ Kijaanak Isirael EJAKAIT apaarasia kere nuka Yosua, ka apaarasia kere nuka imakio luabusito adepar Yosua, luajenete aswam kere naka EJAKAIT, naabu kiswamak Isirael.

³² Akojo da nuka Yosep nuayaŋaunete idwe luka Isirael koMisiri, apotu kesi kidaikis Sekem, alup nuabu Yakob kogwel kaneejaas odwe luka Kamor papa loka Sekem atutubeta akwatat nuka apesan: koraunos airumet naka idwe luka Yosep.

³³ Kotwana Eleasar okoku loka Aaron; kidaikisi ŋes oukot loka okokuke Pinekas, loainakinitai ŋes kakwap nakiukon naka Epuraim.